सिथि नख: मा पानीका स्रोतको सफाइ
काठमाडौँ — नेवार समुदायले आजका दिन टोल छिमेकमा रहेका पानीका स्रोतहरू सफा सुग्घर पारी सिथि नख: विशेष रुपमा मनाउँदै छन् । ढुंगेधारा, इनार, कुवा लगायत पानीका स्रोत तथा मुहान सरसफाइ गर्ने चाडको रुपमा सिथि नख: मनाउने गरिन्छ । आजकै दिन पानीका स्रोतहरूको पूजा समेत गरिन्छ । भक्तपुरको दत्तात्रयमा सिथि नख: का अवसरमा पानीका स्रोतहरू सफा गरिएको छ ।
हिन्दु धर्मशास्त्र अनुसार महादेवको जेठो पुत्र कुमारको जन्मदिनमा यो चाड मनाउने प्रचलन छ । यस अवसरमा उपत्यकाका नेवार समुदायले पानीका स्रोत सफा गरी विभिन्न परिकार बनाएर खाने गर्छन् । विशेषगरी चामलको पिठो, मास, केराउ र मुगीको बाराको परिकार बनाएर खाने प्रचलन छ । हिन्दु धर्मअनुसार यस चाडलाई कुमारको पूजा गर्ने दिनको रुपमा पनि मनाइन्छ ।
