आफ्नै लयमा तकगाउँ

खर्कमा भेडा चराउने, उन काटने र त्यसको प्रशोधन गरेर कपडा बनाउनेदेखि झारा लगाउने चलनसम्म तकमा कायमै छ । झारा अर्थात कसैको घर बनाउनु परे गाउँका सबै घरधुरीका एक सदस्य अनिवार्य श्रम गर्न जानैपर्ने नियम । तक पुग्दा कुनै अनौठो बस्तीमा पुगेजस्तो, कुनै ऐतिहासिक ठाउँमा पुगेजस्तो अनुभूति हुन्छ ।

राम्रो स्वास्थ्य सुविधा र गतिलो यातायातको प्रबन्धबाट धेरै पर छ तक गाउं । अर्थोपार्जनका उपाय सीमित छन् । खाद्यान्नको पर्याप्त उत्पादन नहुने तक आफ्नै परम्परागत लयमा चलेको छ । अप्ठ्यारा र दुःख झेल्दै बाँचिरहेको जस्तो देखिए पनि तकका मानिसहरूको अनुहारबाट खुसी हराइसकेको देखिन्न ।