लुम्बिनीमा एकै पटक बने पाँच सय भिक्षु [तस्बिरहरु]
कपिलवस्तु — बुद्ध जन्मस्थल लुम्बिनीमा बिहीबार एकै पटक ५ सय जनाले सामूहिकरुपमा प्रबज्या लिएर भिक्षु बनेका छन् । भिक्षु जीवनमा प्रवेशसँगै श्रामनेर भएका उनीहरुले बुद्ध शिक्षा, शिल र चिबर लिएर भिक्षु जीवन धारण गरेका छन् । उनीहरुलाई थाई भिक्षुले शिल चिबर प्रदान गरे । भोजपुरदेखि कैलालीसम्मका सर्वसाधारण सहभागी छन् ।
फागुन २७ गते केश मुण्डन गराई गृहस्थी त्यागेर उनी भिक्षु जीवनमा प्रवेश गरेका थिए । ‘यो अल्पकालीन प्रबज्या हो,’ लुम्बिनी विकास कोष सदस्य सचिव सानुराजा शाक्यले भने, ‘बुद्ध धर्मअनुसार शाक्यहरु एकदिनका लागि भए पनि भिक्षु बन्नै पर्छ भन्ने मान्यता रहेको छ ।’ प्रबज्या लिए पछि कतिपय भिक्षु नै हुन्छन् । कतिपय फेरि गृहस्थी जीवनमै फर्कन्छन् । लुम्बिनीमा प्रबज्या भएका उनीहरु चैत १७ गते लुम्बिनीमा भिक्षाटन गरी काठमाडौं फर्कनेछन् । यो कार्यक्रम अखिल नेपाल भिक्षु महासंघ र थाई भिख्खु महासंघको आयोजना गरिएको थियो ।
