कान्तिपुर वेबसाईट
AdvertisementAdvertisement

सर्वोच्च अगाडि न्याय माग्दै बिनु

तस्बिर : प्रकाशचन्द्र तिमिल्सेना

काठमाडौँ — आफूले न्याय नपाएको भन्दै सोलुखुम्बुकी बिनु यादवले सर्वोच्च अदालतको गेटमा रङ फ्याँक्दै विरोध गरेकी छन् । श्रीमान्‌ले आफूमाथि हिंसा गरेको तर त्यसविरुद्ध उजुरी दिँदा पनि आफूले न्याय नपाएको भन्दै यादवले सर्वोच्चको गेट अगाडि रातो रङसहितको पानी फ्याँकेर विरोध जनाएकी हुन् ।

आफूलाई श्रीमान्‌को परिवार नै मिलेर शारीरिक र मानसिक रुपमा हिंसा गरेको भन्दै उनले प्रहरीकहाँ उजुरी दिएकी थिइन् । अहिले उनको मुद्दा उच्च अदालत पाटनमा विचाराधीन रहेको छ ।

त्यसअघि रामेछाप जिल्ला अदालतको इजलासमै बिनुले विष पिएर आत्महत्याको प्रयास गरेकी थिइन् ।


प्रकाशित : मंसिर १३, २०७९ १२:१४
प्रतिक्रिया
पठाउनुहोस्

रोकिएको उदयपुर-१ को मतगणना सुरु

एमालेलगायत दलका उम्मेदवारद्वारा मतगणना बहिष्कार
डिल्लीराम खतिवडा

उदयपुर — तीन दिनदेखि रोकिएको उदयपुर-१ को मतगणना ११ बजेदेखि  सुरु भएको छ । निर्वाचन आयोगले मुख्य निर्वाचन अधिकृत कृष्णप्रसाद सुवेदीलाई निर्वाचन  कानुनको अधीनमा रही मतगणना अधिकारको अख्तियारी दिएपछि विवाद भएको सय मत बदर गरी गणना सुरु गरेका छन् ।


गणना सुरु गर्ने निर्णयसँगै एमाले उम्मेदवार मञ्जुकुमारी चौधरीलगायत उम्मेदवारले गणना बहिष्कार गरी गणनास्थलबाट बाहिर निस्किएका छन् । गणनामा कांग्रेस र राष्ट्रिय स्वतन्त्र पार्टीका उम्मेदवार‚ तिनका प्रतिनिधि, निर्वाचन पर्यवेक्षक र सञ्चारकर्मीको सहभागिता छ ।

मतगणनाको क्रममा पछिल्लोपटक आइतबार बिहान खोलिएको १० वटा ब्यालेट बक्समा उदयपुर १ (२) प्रदेशसभाको १०० मत पत्र भेटिएकाले गणना रोकिएको थियो ।

६३ हजार ८० मत गणना भैसकेपछि थप गणनाका लागि १० वटा मतपेटिका खोलिएको थियो । त्यसै क्रममा प्रदेशसभाको क्षेत्र नम्बर २ को सय मतपत्र भेटिएपछि दलहरूले गणना रोक्न माग गर्दै अवरुद्ध गरेका हुन् ।

७६ हजार ७५६ मत खसेको यो क्षेत्रको ६३ हजार ८० मत गणना भैसकेको छ । गणना भैसकेको मतअनुसार कांग्रेसका नारायण खड्काले १ हजार ८२५ मतले अग्रता लिएका छन् । खड्काले २७ हजार ४८४ मत प्राप्त गरेका छन् भने एमालेकी मन्जुकुमारी चौधरीले २५ हजार ६५९ मत प्राप्त गरेको निर्वाचन अधिकृतको कार्यालयले जनाएको छ ।

प्रकाशित : मंसिर १३, २०७९ ११:२७
पूरा पढ्नुहोस्
प्रतिक्रिया
पठाउनुहोस्
×