काष्ठमण्डपमा अञ्जली दिदीको भाइटीका
काठमाडौँ — हिन्दु नेपालीको महत्त्वपूर्ण चाड तिहारको अन्तिम दिन बिहीबार भाइटीका । देशभर महिलाहरूले आफ्ना दाजु-भाइको दिर्घायु र सुस्वास्थ्यको कामना गर्दै भाइटीका लगाउँदै यो पर्व मनाइन्छ । यस अवसरमा दाजु-भाइ नहुने दिदिबहिनीहरूले आफन्त वा अन्य पुरुषहरूलाई पनि दाजु-भाइ नाता गाँसेर भाइटीका लगाइदिने चलन छ । साथै दिदिबहिनी नहुने पुरुषहरू पनि अन्य महिलाहरूलाई दिदि वा बहिनी बनाएर भाइटीका ग्रहण गर्ने गर्छन् ।
काठमाडौंमा २०५५ सालदेखि नै सामूहिक रुपमा भाइटीका लगाउँदै आएकी ताहाचलकी अञ्जली दिदीले पनि अघिल्ला वर्षहरू झैं यस वर्ष पनि सामूहिक रुपमा भाइटीका लगाइदिइन् । काठमाडौंको मरुमा रहेको काष्ठमण्डप मरु सतलको गोरखनाथ परिसरमा बिहीबार उनले २ सय जनालाई भाइटीका लगाइदिएको बताइन् । देशभरका मानिस बसोबास गर्ने राजधानी काठमाडौंमा सामूहिक रुपमा भाइटीका लगाएर चर्चा कमाएकी अञ्जली मास्के पछिल्लो समय अञ्जली दिदीको रुपमा चिनिएकी छन् ।
२०७२ सालको भूकम्पले काष्ठमण्डप भत्किएपछिका तिहारमा भने अञ्जली दिदीले काष्ठमण्डप बाहिरको मन्दिर र डबलीमा पाल हालेर भाइटीका लगाइदिने गरेकी थिइन् । पछिल्लो समय उनीसँग भाइटीका लगाउन विदेशी पर्यटकहरू पनि आउन थालेका छन् ।
