तातोपानी धारामा आकर्षक श्रृंङ्गेश्वर महादेव 

भोटेकोशी गाउँपालिका २ का अध्यक्ष कुमार श्रेष्ठका अनुसार तातोपानी धारामा अघिल्लो स्थानीय सरकारबाट विनियोजित ५० लाख बजेटमा २१ फिट अग्लो शिव नन्दीमूर्ती, सामुदायिक भवन, मन्दिरसहित अन्य विभिन्न संरचना ठड्याइएको छ । ‘अघिल्लो ०७४ मा निर्वाचित सरकारबाट आएको बजेटबाट भए पनि केही समयअघि महादेव मूर्ति र अन्यको निर्माण सकिएको छ, त्यही मूर्ति हेर्न दर्जनौं यात्रु र पर्यटक आउन थालेका छन्,’ वडाध्यक्ष श्रेष्ठले भने ।

जिल्लाबाट चीन जोड्ने उत्तरी नाकाको सीमाक्षेत्र तातोपानी बजारको तातोपानी धारामा महादेवको मूर्तिका कारण आउनेको संख्या बढेपछि यहाँ सञ्चालनमा आएका दुई दर्जनभन्दा बढी होटेल, रिसोर्ट र पसल भरिन थालेका छन् । श्रेष्ठका अनुसार तातोपानी धाराको इतिहास हिन्दू धर्मावलम्बीका आराध्यदेव देव महादेव, महायोगी श्रृङ्गी ऋषिदेखि बौद्ध धर्मका बज्रगुरु रिन्पोछे (पदमसम्भवा) र नागराज, देविदेवतासँग जोडिएको छ । महादेव ,ऋषि श्रृङ्गी र पद्मसम्भव यहाँ आएर बसेको र स्नानका लागि नागले तातोपानी धारा उत्पन्न गरिदिएको जनश्रुति रहिआएको छ ।

२०५० सालयता पारिवारिक, सामूहिक रुपमा नुहाउन ७ वटा धारामध्ये महिला र पुरुषका लागि अलग राखिए पनि बाथरोगी, अलग्गै नुवाउन इच्छुकलाई स्विमिङ पुल बाथको समेत व्यवस्था गरिएको छ । भूकम्प, भोटेकोसी बाढीपछि बर्सेनि ठूलो संख्यामा तातोपानी धारामा नुवाउन आउने आन्तरिक पर्यटकको संख्यामा भारी गिरावट आएको थियो । भूकम्पअघि वर्ष पाँच हजार आन्तरिक पर्यटकले तातोपानी धारामा मेला भरेको तातोपानी धारा निर्माण सुधार समितिले जनाएको छ ।