वर्षाले माइतीघर जलमग्न
काठमाडौँ — काठमाडौं उपत्यका लगायत विभिन्न स्थानमा शुक्रबार वर्षा भयो । वर्षासँगै काठमाडौंका विभिन्न स्थानमा पानी जमेर यात्रुले सास्ती भोग्नु परेको छ। सवारीको अत्यधिक चाप हुने स्थानमध्ये माइतीघरमा पनि वर्षा सुरु भएको केही बेरमै पानी जमेर तलाउ जस्तै बनेको थियो ।
वर्षाका कारण पानी जम्दा यहाँ सवारीसाधनहरूको ठूलो जाम भएको थियो । कतिपय सवारीसाधनभित्र पानी पस्दा घण्टौं रोकिएका छन्। माइतीघर चोकमै पानी जमेर तलाउ बन्दा ठूलो संख्यामा यात्रुहरूलाई आवतजावतमा कठिनाइ भएको थियो । वर्षाका कारण सवारी अवरुद्ध हुँदा ट्राफिक प्रहरी र महानगरका कर्मचारीको टोलीलाई पानीको निकास खुलाउन मुस्किल परेको थियो ।
