भक्तपुरमा विश्वकप क्रिकेटको ट्रफी

तस्बिर : हेमन्त श्रेष्ठ

काठमाडौँ — अस्ट्रेलियामा यसै वर्ष आयोजना हुने आईसीसी पुरुष ट्वान्टी-२० विश्वकप क्रिकेटको ट्रफी भक्तपुरमा प्रदर्शन गरिएको छ । सोमबार नेपाल क्रिकेट संघ (क्यान) ले पत्रकार सम्मेलन गर्दै विश्वकप ट्रफी नेपाल आइपुगेको जानकारी गराएको थियो।

ट्रफी बुधबार भक्तपुर दरबार स्क्वायरमा ११:३० बजेबाट प्रदर्शनीमा राखिएको हो। ट्रफी प्रदर्शनीमा नेपाली टिमका पूर्वकप्तान विनोद दास, खेलाडी शरद् भेषावकर, महबुब आलम, रुबिना क्षेत्री र कलाकार सरोज खनाललगायतका व्यक्ति उपस्थित थिए । त्यस्तै ट्रफी सर्वोच्च शिखर सगरमाथाको आधार शिविरमा पुर्‍याइने क्यानले जानकारी दिएको छ ।

सगरमाथाको फेदमा रहेको गोक्यो तालमा ट्रफीको प्रदर्शनी गरिने क्यानले जनाएको छ । क्रिकेटको विश्वकप ट्रफी नेपालमा दोस्रो पटक ल्याइएको हो । यसअघि सन् २०१८ मा एकदिवसीय विश्वकपको ट्रफी नेपाल ल्याइएको थियो । टी–ट्वान्टी विश्वकपको ट्रफी भने पहिलो पटक नेपाल ल्याइएको छ ।

विश्वकपको ट्रफी दुई दिन नेपालमा रहने क्यानले जानकारी गराएको छ । विश्वकपको १०० दिने ट्रफी भ्रमणअन्तर्गत ट्रफी नेपाल ल्याइएको हो । ट्रफी विश्वको १३ राष्ट्रको ३५ स्थानमा प्रदर्शन गरिँदैछ ।

विश्वकपको ट्रफी निशान कम्पनीले विश्वभर प्रदर्शन गरिरहेको हो । अस्ट्रेलियाको ७ सहरमा आयोजना हुने विश्वकप अक्टोबर १६ देखि नोभेम्बर १३ सम्म हुनेछ । विश्वकपमा १६ राष्ट्रले प्रतिस्पर्धा गर्नेछन् ।


प्रकाशित : भाद्र १५, २०७९ १२:५९
प्रतिक्रिया
पठाउनुहोस्

तयारीमा व्यस्त नेपाली महिला टिम [तस्बिरहरु]

तस्बिर : हेमन्त श्रेष्ठ

काठमाडौँ — नेपाली राष्ट्रिय महिला फुटबल टिम घरेलु भूमिमा हुने छैटौं साफ महिला च्याम्पियनसिप २०२२ को तयारीमा व्यस्त छ । पहिलोपल्ट च्याम्पियन बन्ने दाउमा रहेको नेपाली टिमले आइतबार सेन्ट जेभियर स्कुल, जावलाखेलको मैदानमा अभ्यास गर्‍यो । भदौ २१ देखि असोज ३ गतेसम्म काठमाडौंमा हुने च्याम्पियनसिपमा अघिल्ला पाँचै संस्करणको विजेता भारत, चारपल्टको उपविजेता नेपाल, एकपल्ट फाइनल खेलेको बंगलादेशसहित दक्षिण एसियाका सातै देशका टिमले प्रतिस्पर्धा गर्दैछन् । भुटानी टिमले काठमाडौं ओर्लेर तयारी गरिरहेको छ । च्याम्पियनसिप जित्ने लक्ष्यसाथ मुख्य प्रशिक्षक कुमार थापाले २३ सदस्यीय नेपाली टिम घोषणा गरिसकेका छन् । टिम घोषणा भएपछि पहिलोपल्ट गरिएको अभ्यासका केही तस्बिरहरू :


प्रकाशित : भाद्र १२, २०७९ १९:४७
पूरा पढ्नुहोस्
प्रतिक्रिया
पठाउनुहोस्
×