‘न्याय नपाएसम्म गाउँ फर्किन्नँ’

अहिले प्रेमनारायणसँग ४ कठ्ठा घरबारी मात्रै बाँकी छ भने २२ कठ्ठा १० धुर बन्धकीमा छ । उनी भन्छन्, ‘बरु प्राण जाओस्, न्याय नपाएसम्म गाउँ फर्किन्नँ ।’
तस्बिर/शब्द: प्रकाशचन्द्र तिमिल्सेना

काठमाडौँ — पश्चिम नवलपरासीबाट आएका मिटरब्याजी पीडितहरू १९ दिनदेखि माइतीघरमा धर्नामा छन् । सुरुका दिनमा करिब २ सयको संख्या अहिले ६० मा झरेको छ । उक्त समूहमा सबैभन्दा ज्येष्ठ व्यक्ति हुन् ७६ वर्षीय प्रेमनारायण कोइरी । पीडितहरू दिनभर माइतीघरमा धर्नामा बस्छन्, बेलुका कीर्तिपुर जान्छन् । ६० जनाको समूह कीर्तिपुरको एउटा अस्थायी टहरामा बस्दै आएको छ ।

प्रेमनारायण बिहानै ६ बजे उठ्छन् । एउटै मात्र शौचालय रहेकाले लाइन बस्नुपर्छ । त्यसपछि उनी नुहाएर पूजापाठमा व्यस्त हुन्छन् । ९ बजेदेखि साढे ९ बजेसम्म खाना खाएर उनी आन्दोलनमा जान तयार हुन्छन् । श्रीमतीसँगै कीर्तिपुरबाट बस चढ्छन् । उनीहरू त्रिपुरेश्वरमै ओर्लिन्छन् अनि नारा लगाउँदै धर्नास्थल माइतीघर आइपुग्छन् । दिनभर धर्ना बसेपछि उनीहरू बेलुका ५ बजेतिर पुनः कीर्तिपुर फर्कन्छन् ।

दुखजिलो गरी बनाउँदै गरेको घरलाई पैसा नपुगेपछि उनले साहुसँग २०७३ सालमा ९ लाख रुपैयाँ ऋण लिए । १२ कठ्ठा जग्गा बन्धकी राखेर उनले ऋण लिएका हुन् । अहिलेसम्म उनले १२ लाख तिरिसके । सुदखोरले भने अझै ४२ लाख रुपैयाँ मागिरहेका छन् । अर्का साहुसँग पनि उनले १० कठ्ठा १० धुर जग्गा बन्धकी राखेर १ लाख ५० हजार रुपैयाँ ऋण लिएका थिए । उनले ६ लाख तिरिसके तर साहुले अझै १५ लाख मागिरहेका छन् ।

प्रेमनारायणलाई शरीर सुन्निने रोग लागेको २ वर्ष भयो । अहिले उनीसँग ४ कठ्ठा घरबारी मात्रै बाँकी छ भने २२ कठ्ठा १० धुर बन्धकीमा छ । पूर्वमन्त्रीसमेत रहेका जनता प्रगतिशील पार्टीका अध्यक्ष हृदयेश त्रिपाठी उनका छिमेकी हुन् । तर पनि त्रिपाठीले समस्या समाधानका लागि कुनै चासो नदेखाएको प्रेमनारायण बताउँछन् । उनी भन्छन्, ‘बरु प्राण जाओस्, न्याय नपाएसम्म गाउँ फर्किन्नँ ।’


प्रकाशित : भाद्र ४, २०७९ १४:०६
प्रतिक्रिया
पठाउनुहोस्

'कोभिड फ्रन्टलाइनर'हरुको स्मृतिमा बनाइएको मुरल महानगरपालिकाले मेटायो

वडाको अनुमतिले हुँदैन,कार्यपालिकाको निर्णय चाहिन्‍छ : महानगर प्रवक्ता
तस्बिर/शब्द: प्रकाशचन्द्र तिमिल्सेना

काठमाडौँ — 'कोभिड फ्रन्टलाइनर'हरुको स्मृतिमा रत्नपार्कको आकाशे पुलमुनि बनाइएको मुरल काठमाडौं महानगरपालिकाले मेटाएको छ । भित्तामा कोरोना महामारीमा अग्रपंक्तिमा खटिएका सुरक्षाकर्मी, स्वास्थ्यकर्मी, सञ्चारकर्मी र सरसफाइमा खटिएकाहरूको चित्र कोरिएको थियो । बुधबार महानगर प्रहरीले महानगरपालिकाबाट निर्देशन आएको भन्दै उक्त मुरल मेटेका हुन् ।

काठमाडौंको वडा नम्बर २८ पुरानो बसपार्कले सन्देशमूलक मुरलका लागि अनुमति दिएको थियो तर महानगरपालिकाले भने वडाको अनुमतिले मात्रै नपुग्ने बताउँदै मुरल मेटाएको बताएको छ । काठमाडौं महानगरपालिकाका प्रवक्ता इश्वरमान डंगोलसँग यस विषयमा बुझ्न खोज्दा उनले वडाले वाल पेन्टिङका लागि अनुमति दिन नमिल्ने बताए । उनले इकान्तिपुरलाई भने,'काठमाडौं‌ महानगरपालिकाले वाल पेन्टिङका लागि कसैलाई पनि अनुमति दिएको छैन । वडालाई पनि अधिकार छैन । कार्यपालिका बैठकले निर्णय गरेर दिने निर्णय गरेको भए पाइन्थ्यो तर त्यसो गरिएको छैन । नियम र प्रक्रिया नपुगेकाले मेटाइएको हो । '

आकाशेपुलको मुरल मेटिएपछि आफूहरु निकै दुखी भएको मुरलको नेतृत्वकर्ता दुजांग शेर्पाले बताए । उनले भने, 'सरकारलाई राम्रो काम गरेको मन नपर्दो रहेछ।'

एक हप्ता लगाएर चार जना कलाकार र तीन जना स्वयंसेवकहरुले सडक कलालाई अन्तिम रुप दिन खटिएका थिए । मुरल कोर्ने कलाकारहररु साङ्गे थिमे लामा, कृपा शेर्पा, सुम्निमा श्रेष्ठ र राजेश महर्जन रहेका थिए । उक्त कामको नेतृत्व दुजांग शेर्पाले लिएका थिए ।


कोरोनाको महामारीमा क्रममा अग्रपंक्तिमा खटिएका सम्पूर्ण व्यक्तिहरुप्रति माया र सम्मान व्यक्त गर्दै उनीहरूको काममा थप हौसला मिलोस् भनेर सडक कला बनाइएको दुजांग शेर्पाले बताए । कलाका माध्यमबाट नागरिकस्तरबाट अग्रपंक्तिमा खटिनेलाई थोरै भए पनि मनोबल बढाउने काम यस कलाले गरेको उनको भनाइ छ । नेपालको झण्डा, ट्राफिक प्रहरी,डाक्टर र नर्स, जनपथ प्रहरीका सुरक्षाकर्मी, सेना र शव व्यवस्थापनमा खटिएका सैनिक, पाइलट ,सञ्चारकर्मी र सरसफाइमा खटिएका व्यक्तिहरूको चित्र मुरलमा समेटिएको थियो ।

तस्बिर : केशव थापा

कोरोनाबाट ज्यान गुमाएका 'फ्रन्टलाइनर'हरुको स्मृतिमा असार ३१ गते रत्नपार्कमा दीप प्रज्वलन समेत गरिएको थियो ।

प्रकाशित : असार १६, २०७८ १८:४१
पूरा पढ्नुहोस्
प्रतिक्रिया
पठाउनुहोस्
×