कान्तिपुर वेबसाईट
AdvertisementAdvertisement

घर फर्किँदै झापाका डुबान पीडित

पर्वत पोर्तेल

झापा — बुधबार दिउँसोदेखि वर्षा कम हुन थालेपछि झापाका विभिन्न स्थानबाट विस्थापित भएका डुबान पीडितहरू घर फर्किन थालेका छन्। जिल्ला प्रहरी कार्यालय झापाका अनुसार बुधबार प्रभावितमध्ये एक सयभन्दा धेरै परिवार आआफ्नो घर फर्किएका छन्। एसपी विश्वमणि पोख्रेलले वर्षा कम भइ नदीको बाढीसमेत घटेका कारण विस्थापितहरू घर फर्किन थालेको बताए।

धेरैजसो पीडित भने अझै नजिकैको विद्यालय, धर्मशाला र मन्दिरहरुमा आश्रित छन्। आश्रितहरूलाई नेपाल रेडक्रस सोसाइटी र विपद्‍ व्यवस्थापन समितिले विभिन्न राहत वितरण गरेको छ। रेडक्रसले बुधबार र गौरीगन्ज १ का ५० बढी विस्थापित परिवारहरूको लागि ६० थान त्रिपाल र ६० थान हाईजिन किट वितरण गरेको छ । जिल्लास्थित सुरक्षा निकाय, राजनीतिक दल तथा जनप्रतिनिधिहरूको टोलीले बाढी प्रभावित क्षेत्रको स्थलगत अवलोकन गरेको थियो ।

प्रकाशित : असार १५, २०७९ २०:२३
प्रतिक्रिया
पठाउनुहोस्

सुनसरीका ६ स्थानीय तहका बस्ती डुबानमा

सप्तकोसीमा पानीको बहाब बढ्नेक्रम जारी
प्रदीप मेन्याङ्बो

सुनसरी — अविरल वर्षाका कारण सुनसरीका आधादर्जन बढी स्थानीय तहका बस्तीहरु डुबानमा परेका छन् । हालसम्म मानवीय क्षति नभएपनि डुबानका कारण दर्जनौं घर परिवार विस्थापित भएका छन् ।  

सुनसरीका विभिन्न बस्तीमा बाढी र डुबान । तस्बिरः कान्तिपुर

जिल्ला प्रशासन कार्यालयकाअनुसार दुइदिनदेखि परेको वर्षाका कारण खोला नदीमा आएको बाढीले सुनसरीका धेरै बस्ती डुबानको चपेटामा परेका छन् । बाढी र डुबानबाट सुनसरीका ६ पालिका प्रभावित भएका छन् ।

तीमध्ये सुनसरीको भोक्राहा नरसिंह गाउँपालिका–५ र ७ वडाका सयौं घर सुनसरी खोलाको बाढीले डुबान परेका छन् । सुनसरीका प्रमुख जिल्ला अधिकारी इन्द्रदेव यादवले भोक्राहा नरसिंह–७ का १ सय ५० घर पूर्णरुपमा डुबानमा परेको र १ सय ८८ घर आंशिक डुबानमा परेको बताए ।

भोक्राहा नरसिंह गाउँपालिका–५ मा ३० घरपरिवार विस्थापित भएका छन् । तीमध्ये १६ घरका ९० जना त्रिपाल टाँगेर बसेका छन् भने १४ घरका ८० जना छरछिमेकको घर टहरामा आश्रय लिएर बसेका छन् ।

यादवले भने, ‘डुबानको कारण सुनसरीमा २ सय ३९ जनाभन्दा बढी मानिस विस्थापित हुन पुगेका छन् । सुनसरीका भोक्राहा नरसिंह गाउँपालिका, इटहरी उपमहानगरपालिका, बर्जु गाउँपालिका सबैभन्दा बढी बाढीको चपेटामा परेको छ ।’

जिल्ला प्रशासन कार्यालयले दिएको जानकारीअनुसार बर्जु गाउँपालिका–६ चिमडीमा ३० देखि ४० घर परिवारका सयजना विस्थापित भएर डुबान नभएको उच्च स्थानमा पाल टाँगेर बसेका छन् । यसैगरी बर्जु–५ मा ट्याङ्ग्रा खोलामा आएको बाढीले पण्डित टोलमा ६ परिवार, गुरुङ टोलमा ८ परिवार पनि विस्थापित भएका छन् । प्रजिअ यादवका अनुसार विस्थापित ८ घरका ३२ जनालाई मुसहर भवन र ७ घरका २९ जनालाई रामजानकी प्राविमा स्थानान्तरण गरेर राखिएको छ ।

दुहबी नगरपालिका– ४ ढकिबुन्ना टोलमा बुढी खोलामा आएको बाढीले कटान गर्दा शोभा चौधरी र विकास विकको घर भत्किँदा ९ जना विस्थापित भएका छन् । उनीहरुलाई उद्धार गरेर नजिकैको आधारभूत विद्यालयमा राखिएको छ ।

सुनसरी खोलामा आएको बाढीले इनरुवा नगरपालिका– ८ उराव टोलका २० घर डुबानमा परेको छ । हरिनगर गाउपालिका –५ स्थित वसन्तपुरमा केही घर विस्थापित हुने अवस्थामा रहेको प्रशासनले जनाएको छ ।

इटहरी उपमहानगरपालिका–५ स्थित सिमरवनामा सिकुमारी खोलामा आएको बाढीले रामवृक्ष चौधरीको २ तले घर कटान भएर भत्किएको छ भने घरको सबै सामग्री बगाएको प्रशासनले जनाएको छ । चौधरीका ८ जना परिवार हाल छिमेकीको घरमा शरण लिएर बसेका छन् । बराहक्षेत्र नगरपालिका –१ चतराको भित्रि सडक खण्डमा आएको पहिरोले १० मिटर सडक पुरिएको छ । उक्त सडक खण्ड अवरुद्ध भएको जिल्ला प्रशासनले जनाएको छ ।

सप्तकोसीमा पानीको बहाब निरन्तर बढ्दै

सप्तकोसीमा पानीको बहाब बढ्ने क्रम जारी रहेको छ । बुधबार अपरान्ह ४ बजेसम्ममा १ लाख ८१ हजार ९५ क्युसेक प्रतिसेकेण्ड पानीको बहाब रहेको छ । बुधबार बिहान १० बजे कोसी ब्यारेजमा १ लाख ५८ हजार क्युसेक पानी मापन गरिएकोमा मध्यान्हमा १ लाख ६६ हजार ६ सय २० क्युसेक प्रतिसेकेण्ड पानीको बहाब रहेको थियो ।

यसअघि मंगलबार साँझमा १ लाख ३१ हजार ३० क्युसेक प्रतिसेकेण्ड पानीको वहाव रहेको थियो । कोसीमा दुईलाख क्युसेक प्रतिसेकण्ड पानीको बहाब भएमा खतराको संकेत मानिने गरिएको छ ।

प्रकाशित : असार १५, २०७९ २०:२०
पूरा पढ्नुहोस्
प्रतिक्रिया
पठाउनुहोस्
×