कान्तिपुर वेबसाईट
AdvertisementAdvertisement

बाल मन्दिर परिसरका ३५ रुख काटिए [तस्बिरहरू]

शब्द : अब्दुल्लाह मियाँ, तस्बिर : सन्जोग मानन्धर

काठमाडौँ — नक्सालस्थित बाल मन्दिर परिसरमा रहेका सल्लाका बुढा–पुराना रुख हटाइएको छ । हावाहुरीका बेला रुख ढलेर मान्छे घाइते हुने, ढलेर नजिकका घरलगायतका संरचनामा क्षति हुने सम्भावना बढेको भन्दै नेपाल ललितकला प्रज्ञा प्रतिष्ठानले रुख हटाउने अनुमतिका लागि डिभिजन वन कार्यालय, काठमाडौंसँग गत वर्ष नै आग्रह गरेको थियो ।

‘प्रतिष्ठानको बोर्डले निर्णय गरेर रुख कटान गरी हटाउने अनुमतिका लागि हामीसँग आग्रह गरेको थियो’, डिभिजनल वन अधिकृत बद्रीबहादुर कार्कीले भने, ‘हामीले स्थलगत अध्ययन गरेर कटान सिफारिस दिएका हौं ।’ ‘सरकारी रुखहरु हटाउने सम्बन्धी मापदण्ड, २०७१’ को ५ मा जग्गाधनी प्रमाणपूर्जा भएका सरकारी कार्यालय, संस्थान, समिति कार्यालयह हाताभित्रका रुख हटाउनुपर्ने भएमा सम्बन्धित कार्यालयको विभागीय निर्णयका आधारमा डिभिजनल वन अधिकृत संयोजक रहेको जाँजुबझ समितिले सिफारिस गरेमा हटाउन स्वीकृति दिन सक्ने व्यवस्था छ ।

प्रतिष्ठानले परिसरका ४९ वटा रुख कटान माग गरेको थियो । तर, वन कार्यालयले ३५ वटा मात्र रुख कटान अनुमति दिएको थियो । ‘रुखको प्रकृति हेर्दा पुराना, धोद्रा र जतिबेला पनि ढल्न सक्ने भएकाले कटान अनुमति दिएका हौं’, कार्कीले कान्तिपुरसित भने ।

वन कार्यालयले गत पुस ५ गते ती रुख हटाउन दिइने निर्णय गरेको थियो । ३५ मध्ये ३२ वटा खोटे सल्लाका रुख हुन् भने बाँकी कपुरका हुन् । परिसरमा रहेका बाँकी रुख भने कम उमेरका र साना छन्, तिनले तत्काल कुनै हानी गर्ने नदेखिएको कार्कीले बताए । डिभिजनल वन अधिकृत कार्कीले नक्सालबाहेक उपत्यकाभित्र अन्य स्थानमा पनि बुढा–पुराना रुख हटाउनुपर्ने देखिएको तर धेरैले ध्यानै नदिएको बताए । ‘अन्य स्थानमा पनि बुढा रुख ढलेर क्षति गर्ने सम्भावना छ’, कार्कीले सुनाए, ‘केही महिनाअघि सिंहदरबारभित्रै रुख ढलेर घाइते भएको हामीले विर्सन हुँदैन ।’ त्यस्ता बुढा रुखबारे अध्ययन गरेर सम्वन्धित निकायले हटाउन चासो दिनुपर्ने उनले बताए ।


प्रकाशित : असार १५, २०७९ १९:३०
प्रतिक्रिया
पठाउनुहोस्

सरकारले देशव्यापी बजार अनुगमन गर्छ : उद्योगमन्त्री बडू

कान्तिपुर संवाददाता

काठमाडौँ — उद्योग, वाणिज्य तथा आपूर्तिमन्त्री दिलेन्द्रप्रसाद बडूले महँगी नियन्त्रणका लागि सरकारले देशव्यापी बजार अनुगमन गर्ने बताएका छन् ।

बुधबार वाणिज्य मन्त्रालयमा पत्रकार सम्मेलन गर्दै मन्त्री बडूले महँगी नियन्त्रणका लागि देशव्यापी बजार अनुगमन गर्न लागेको बताएका हुन् ।

उनले सरकारले संघ, प्रदेश, जिल्ला प्रशासन र स्थानीय तहका सबै संयन्त्र परिचालन गरेर बजार अनुगमन प्रभावकारी बनाउने बताए ।

मन्त्री बडूले इन्धनको मूल्य एक्कासी बढेपछि खाद्यान्न, औषधि र सेवामा गरिएको मूल्यवृद्धि घटाउन र उपभोक्तालाई राहत दिन देशभर एकैसाथ एउटै समयमा अनुगमन गर्ने तयारी गरेको बताए ।

उनले देशव्यापी बजार अनुगमन गर्न र मूल्य नियन्त्रणका लागि अनुगमन तथा निरीक्षण अधिकृत तोक्न जिल्ला प्रसासन र स्थानीय तहलाई पत्राचार गरिसकिएको पनि जानकारी दिए । इन्धनको मूल्य उच्च रुपमा बढ्दै गएपछि बजार मूल्य नियन्त्रण गर्न सरकार प्रतिवद्ध रहेको मन्त्री बडूले बताएका थिए ।

‘सरकारले बजार अनुगमनको विधि परिवर्तन गर्नुपर्छ । जनताले अनुभूति हुने गरी प्रभावकारी भयो भने घट्न जरुरी हुन्छ । त्यो स्थिति सरकारले निर्माण गर्नुपर्छ । मन्त्रालयको अनुगमन निकाय, अन्य मन्त्रालयका निकाय, सात वटै प्रदेशका निकाय, निर्देशनालयहरू र ७७ वटै जिल्लाका जिल्ला अनुगमन अधिकारीहरू, प्रहरी तथा ७५३ वटै स्थानीय तहमा पनि अनुगमन अधिकार तोक्न निर्देशन दिएका छौं । यी सबै निकायमा एकसाथ एकै समयमा अनुगमन गर्नुपर्छ । सरकारले बजार अनुगमनको संयुक्त र एकीकृत रुपमा गर्छ,' मन्त्री बडूले भने ।

प्रकाशित : असार १५, २०७९ १९:२६
पूरा पढ्नुहोस्
प्रतिक्रिया
पठाउनुहोस्
×