कान्तिपुर हिसान एडुफेयरमा अवलोकनकर्ताको ओइरो [तस्बिरहरु]

मेला घुम्न आउने विद्यार्थीलाई शिक्षण संस्था सञ्चालक, शिक्षक, स्वयंसेवक र त्यहाँ अध्ययनरत विद्यार्थीले परामर्श दिने गरेका छन् । एसईई उत्तीर्णपछि कक्षा ११ मा भर्ना हुने विद्यार्थीलाई लक्षित गरी एडुफेयर सञ्चालन गरिएको हिसान अध्यक्ष रमेश सिलवालले जानकारी दिए । शुक्रबार प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठले मेलाको उद्घाटन गरेका थिए । मेला सोमबारसम्म सञ्चालन हुनेछ ।

उच्च शिक्षालय तथा माध्यमिक विद्यालय संघ नेपाल (हिसान) र कान्तिपुर पब्लिकेशन्स्‌ले संयुक्तरूपमा मेला आयोजना गरेका हुन् । मेलामा विभिन्न प्रतियोगिता पनि आयोजना गरिएको छ । विजयी विद्यार्थीले छात्रवृत्ति र नगद पुरस्कार प्राप्त गर्ने व्यवस्था गरिएको छ । मेलामा एक हजारभन्दा बढी विद्यार्थीका लागि पूर्ण तथा आंशिक छात्रवृत्तिको समेत व्यवस्था गरिएको छ । एडुफेयरको यो सातौं संस्करणमा २ लाखभन्दा बढीले सहभागिता जनाउने आयोजकको अनुमान छ ।