संसार हेर्ने धोको [फोटोफिचर]

शब्द/तस्बिर : आश गुरुङ

मनाङ — हिमाली जिल्ला मनाङमा मंगलबारदेखि २ दिने आँखा शिविर सुरु भएको छ । सदरमुकाम चामेस्थित सामुदायिक आँखा केन्द्रमा संचालित शिविर बुधबारसम्म चल्नेछ । तिलगंगा आँखा प्रतिष्ठानका कार्यकारी निर्देशक वरिष्ठ आँखा रोग विशेषज्ञ डा. सन्दुक रुइतको नेतृत्वमा तिलगंगा आँखा प्रतिष्ठान काठमाडौंका १५ जना स्वास्थ्यकर्मी शिविरमा खटिएका छन् ।

डा. रुइतले मंगलबार ६२ जना वृद्धवृद्धाका आँखाको शल्यक्रिया गरेका छन् । आँखा शिविरमा कहिल्यै आँखाको परीक्षण नगरेका विरामीहरु समेत उक्त शिविरमा आएको बताएका छन् । आँखा शिविरमा २ दिन हिँडेर दुर्गम नार्पाभूमिको नारगाउँदेखि समेत विरामी आएका छन् । सदरमुकाम चामे, तल्लो मनाङको नासों र माथिल्लो मनाङको मनाङ ङिस्याङ गाउँपालिकाबाट आएका आँखाका विरामीले सेवा लिएका छन् । तिलगंगा आँखा प्रतिष्ठान, तेज कोहली एण्ड रुइत फाउन्डेशन र सामुदायिक आँखा केन्द्र मनाङको आयोजनामा संचालित शिविरमा करीब ८ सयजनाको आँखा परीक्षण गरिएको छ ।

परीक्षणपछि शल्यक्रिया गर्नुपर्ने आँखाका विरामीको आँखा शल्यक्रिया गरिएको तिलगंगा आँखा प्रतिष्ठानका बाह्य कार्यक्रम अधिकृत नामखेन लामाले बताए । उनका अनुसार शल्यक्रियाका लागि लमजुङ र गोरखाबाट समेत विरामी आएका छन् । चामेमा यस्तोखाले आँखा शिविर पहिलोपटक आयोजना भएको स्थानीयले बताएका छन् ।


प्रकाशित : जेष्ठ १०, २०७९ २०:५०
प्रतिक्रिया
पठाउनुहोस्

ललितपुर महानगरमा परिणाम सार्वजनिक नहुँदै विजय जुलुस 

तस्बिर : इलिट जोशी/कान्तिपुर

ललितपुर — पाँच दलीय गठबन्धनबाट ललितपुर महानगरपालिका मेयरका उम्मेदवार नेपाली कांग्रेसका उम्मेदवार चिरीबाबु महर्जन र उपमेयरमा एमालेका उम्मेदवार मञ्जली शाक्य बज्रचार्यले विजय जुलुस मनाएका छन् । दुवै उम्मेदवारको जित सुनिश्चित भएपछि जावलाखेलमा मंगलबार साँझ विजय जुलुस मनाएका हुन् ।

तर मुख्य निर्वाचन अधिकृतको कार्यालय ललितपुरले मतगणनाको अन्तिम परिणाम सार्वजनिक गरेको छैन । अधिकृतको कार्यालयका अनुसार मेयर/उपमेयर, २८ र २९ वडाको अन्तिम मत परिणाम घोषणना बाँकी छ । ललितपुरमा ८६ हजार ५ सय ४० मत खसेकोमा मंगलबार दिउँसो ३ बजेसम्म ८२ हजार ४० मतगणना भइसकेको छ । जसमा महर्जनले ४० हजार २ सय ६३ मत प्राप्त गरेका छन् भने उनका निकटतम प्रतिद्वन्द्वी एमालेका हरिकृष्ण व्यञ्जनकारले २३ हजार ८ सय १० मात्र मत प्राप्त गरेका थिए ।

उपमेयरमा गठबन्धनका साझा उम्मेदवार माओवादी केन्द्रका बाबुराजा बज्रचार्यलाई पछि पार्दै नेकपा एमालेकी मञ्जली शाक्य बज्रचार्यले २४ हजार १ सय ३९ मत प्राप्त गरेकी छन् । बाबुराजाले १८ हजार ११ मात्र मत पाएका छन् । २०७४ को स्थानीय तहको निर्वाचनमा पनि कांग्रेसबाट उम्मेदवार महर्जनले ३ सय २६ मतान्तरले व्यञ्जनकारलाई पराजित गरेका थिए । त्यतिबेला महर्जनले २४ हजार ६ सय ४२ मत प्राप्त गर्दा व्यञ्जनकारले २४ हजार ३ सय १६ मात्र मत प्राप्त गरेका थिए ।


प्रकाशित : जेष्ठ १०, २०७९ २०:२८
पूरा पढ्नुहोस्
प्रतिक्रिया
पठाउनुहोस्
×