सिम्रौनगढको चुनावी सरगर्मी

तस्बिर : दीपक केसी

सिम्रौनगढ, बारा — वैशाख ३० मा हुने स्थानीय तह निर्वाचनमा बारा जिल्लाका १६ स्थानीय तहमध्ये सिम्रौनगढलाई चुनाव लागिसकेकको छ । जिल्लाको दक्षिणपूर्वमा रहेको र छिमेकी भारतसँग सीमा जोडिएको यो नगरपालिका गत स्थानीय चुनावमा सबैभन्दा कम अन्तरले हार–जित निर्धारण भएको क्षेत्र हो । नेपाली कांग्रेसका विजयशंकर यादव ५ हजार १३५ मत ल्याएर विजयी हुँदा उनका निकटतम प्रतिस्पर्धी लोसपा (तत्कालीन राजपा) का किशोरीप्रसाद कलवार (प्राप्त मत– ५ हजार ११५) जम्मा २० मतले पराजित भएका थिए ।

आसन्न चुनावमा पनि मुख्य प्रतिस्पर्धा यिनै दुई उम्मेदवारबीच हुन गइरहेको छ । यादव नेपाली कांग्रेसबाट र कलवार लोसपाबाट मेयरका लागि चुनावी मैदानमा उत्रिसकेका छन् । यादव नेपाली कांग्रेसका महामन्त्री गगनकुमार थापा नेतृत्वको घोषणापत्र निर्माण समितिमा सदस्य थिए । करीब ३० हजार मतदाता रहेको सिम्रौनगढमा ११ वटा वडाहरू छन् । यी वडाहरूमा पनि मुख्य प्रतिस्पर्धा नेपाली कांग्रेस र लोसपाकैबीचमा हुँदैछ । सम्भवत: सबैभन्दा तीव्र प्रतिस्पर्धा भएर होला, बाराका अन्य नगरपालिकामा चुनावी प्रचार–प्रसार सुरु नहुँदै सिम्रौनगढमा राजनीतिक माहोल गर्माइसकेको छ । उम्मेद्वारी दर्ता लगत्तै हरेक दिन बजारका मुख्य–मुख्य क्षेत्रमा माइकिङसहित झण्डा फरफराउँदै मतका लागि आह्वान गर्ने समूह निस्किरहेका भेटिन्छन् । सडकभर तुल र पम्प्लेटहरू टाँसिएका छन् । साइकल, रिक्सा र यातायातका अन्य साधनमा चुनावी नारा, पर्चा, पम्प्लेट, झण्डा झुण्डाएर हिँडिरहेका भेटिन्छ ।

प्रतिनिधिसभामा क्षेत्र नं. १ अन्तर्गत पर्ने सिम्रौनगढबाट नेपाली कांग्रेसका उमाकान्त चौधरी सांसद् निर्वाचित छन् । यद्यपि यस क्षेत्र अन्तर्गतका दुवै प्रदेशसभामा कांग्रेसले जित्न सकेको थिएन । १ (क) बाट एमालेका त्रिलोकी चौधरी र १ (ख) बाट लोसपाका सरोज यादव विजयी छन् ।

१६ वटा स्थानीय तह रहेको बाराका दुई वटा उपमहानगरपालिका र एउटा नगरपालिकामा सत्तारुढ गठबन्धन बनेको छ । बाँकीमा दलहरू एक्लाएक्लै प्रतिस्पर्धामा छन् । जितपुर सिमरा उपमहानगरपालिकामा मेयरमा गठबन्धनकातर्फबाट माओवादीका राजन पौडेल र उपमेयरमा नेपाली कांग्रेसकी मेघा शाही उठेकी छन् । त्यहाँ एमालेले सरस्वती चौधरीलाई मेयरको टिकट दिएको छ । उनी अहिलेकी उपमेयर हुन् । भोला अधिकारी एमालेको उपमेयर उम्मेद्वार छन् ।

त्यस्तै कलैया उपमहानगरपालिकाको मेयरमा गठबन्धनकातर्फबाट नेपाली कांग्रेसका राजेशराय यादव र उपमेयरमा जसपाका प्रमोद गुप्ता उम्मेद्वार बनेका छन् । त्यहाँ एमालेले विनोद साहलाई मेयर र रौशन प्रवीणलाई उपमेयरमा उठाएको छ । प्रवीण मुस्लिम महिला हुन् । त्यस्तै निजगढ नगरपालिकामा नेपाली कांग्रेस र माओवादी केन्द्रको मात्र गठबन्धन बनेको छ । मेयरमा नेपाली कांग्रेसका सुरेश खनाल र उपमेयरमा माओवादी केन्द्रका रविराज दंगाल उम्मेद्वार बनेका छन् । बाँकी १३ पालिकामा दलहरू एक्लाएक्लै प्रतिस्पर्धामा छन् ।

प्रतिनिधिसभामा बाराका चार निर्वाचन क्षेत्रमध्ये हालको जसपाबाट दुई, लोसपाका एक र नेपाली कांग्रेसका एक सांसद छन् । त्यस्तै प्रदेशसभाका ८ सिटमध्ये जसपाका तीन, एमाले र लोसपाका समान दुई/दुई र माओवादीका एक सांसद निर्वाचित छन् । २०७४ को प्रतिनिधिसभा/प्रदेश सभा तथा स्थानीय चुनावमा देखिएको समीकरणमा अहिले धेरै नै परिवर्तन आइसकेको छ । दलहरू एकीकरण र विभाजनबाट गुज्रिएका छन्, त्यसको प्रत्यक्ष प्रभाव बारामा पनि परेका कारण स्थानीय तहको आगामी निर्वाचनको परिणाम आकलन गर्न सजिलो छैन ।


प्रकाशित : वैशाख १७, २०७९ १३:५४
प्रतिक्रिया
पठाउनुहोस्

निसासिँदो उपत्यका

तस्बिर : दीपक केसी

काठमाडौँ — काठमाडौं उपत्यकामा वायु प्रदूषण बढाउनेमध्ये इँटा उद्योग प्रमुख छन् । नेपाल इँटा उद्योग महासंघका अनुसार तीन जिल्लामा दर्ता भएका १ सय १२ उद्योगमध्ये सय हाराहारी सञ्चालनमा छन् । ललितपुरमा ३० र भक्तपुरमा ६४ इँटा उद्योग छन् । प्रदूषण घटाउन नयाँ उद्योगको अनुमतिमा कडाइ गर्दै सरकारले सञ्चालनमा रहेका उद्योगलाई पनि उपत्यकाबाट स्थानान्तरणको नीति अघि सारेको थियो । तर २०७२ वैशाखको भूकम्पपछि निर्माण सामग्री धेरै चाहिने र टाढाका उद्योगबाट ढुवानी गर्दा इँटा महँगिने भन्दै थाती रहेको योजना अझैसम्म कार्यान्वयनमा आएको छैन ।

दक्षिणकाली–फर्पिङ क्षेत्रबाट ललितपुरमा देखिएको इँटाभट्टाका चिम्नीबाट निस्केको धूवाँको मुस्लो ।

महासंघका अनुसार कोरोना महामारी अघि देशभर करिब १ हजार २ सय उद्योग थिए । अध्यक्ष महेन्द्रबहादुर चित्रकारले महामारीका बेला धेरै उद्योग बन्द भए पनि तथ्यांक अद्यावधिक हुन बाँकी रहेको बताए । इँटा उद्योगका कारण हुने प्रदूषण नियमन गर्न वातावरण मन्त्रालयले २०७४ माघ ८ मा निस्किने धूवाँ र चिम्नीको उचाइसम्बन्धी मापदण्ड राजपत्रमा प्रकाशित गरेको थियो । मापदण्डले चिम्नीबाट निस्कने कणको मात्राको अधिकतम सीमा पनि तोक्यो । तर, यी मापदण्ड लागू भए/नभएको अहिलेसम्म अनुगमन भएको छैन ।

प्रदूषण कम गर्न धूवाँको मुस्लो निकाल्ने चिम्नीको साटो ‘जिकज्याक फायरिङ सेटिङ’ प्रविधि उपयोगी हुन्छ । महासंघका अध्यक्ष चित्रकार काठमाडौंमा सञ्चालनमा रहेका उद्योगमध्ये अधिकांशमा नयाँ प्रविधि जडान भएको दाबी गर्छन् । ‘काठमाडौंका भट्टाहरूबाट पहिलेको जस्तो धूवाँको कालो मुस्लो निस्कँदैन,’ उनले भने, ‘सबैजसो उद्योगले मापदण्ड पालना गरेका छन् ।’ तर, काठमाडौं बाहिरका उद्योगमध्ये अझै आधाजसोमा यो प्रविधि जडान नभएको उनको भनाइ छ । इसिमोडको सहयोगमा पुराना उद्योगहरूलाई वातावरणमैत्री बनाउने तालिम भइरहेको पनि उनले जानकारी दिए ।


प्रकाशित : फाल्गुन २८, २०७८ ०७:४०
पूरा पढ्नुहोस्
प्रतिक्रिया
पठाउनुहोस्
×