लमजुङका ग्रामीण भेगमा बाक्लो हिमपात [फोटोफिचर]

आश गुरुङ

लमजुङ — लमजुङका ग्रामीण भेगका बस्तीमा मंगलबार बाक्लो हिमपात भएको छ । हिमपात र त्यसपछि बढेको चिसोले जनजीवन नै प्रभावित बनेको छ । केही दिनदेखि मौसम बिग्रिएसँगै मंगलबार दिउँसो हिमपात भएको स्थानीयले बताएका छन् ।

मर्स्याङदी गाउँपालिका १, घनपोखरा ३, हर्सिङडाँडा, बेंसीसहर नगरपालिका १० को पिस हिल, खाँचे, दोर्दी गाउँपालिका ६, दाम्राङ, क्व्होलासोंथर गाउँपालिका ३, घलेगाउँलगायत बस्तीमा हिमपात भएको स्थानीयहरूले बताएका छन् । मर्स्याङदी गाउँपालिका १, घनपोखराका अध्यक्ष रुद्रमान गुरुङका अनुसार यहाँको जनजीवन प्रभावित भएको बताए । पर्यटन व्यवस्थापन समिति ग्रामीण पर्यटन घलेगाउँका सविच उमलबहादुर विकका अनुसार मंगलबार दिउँसो २ बजेदेखि साँझसम्म हिमपात भएको हो ।

विकका अनुसार घलेगाउँमा २ वर्षपछि पुनः हिमपात भएको हो । पिस हिल स्टेसनका संचालक जीत तामाङले तल्लो बस्ती भुस्मेसम्मै हिउँ परेको बताए । समुद्री सतहदेखि २ हजार मिटर उचाइको पिस हिल हिमपातपछि सुन्दर देखिएको उनले बताए । दोर्दी गाउँपालिकाका अगुवा युवराज अधिकारीले दाम्राङ डाँडामा पनि हिमपात भएकाले डाँडा क्षेत्र रमणीय देखिएको बताए । बाक्लो हिमपातपछि हिउँ नपरेको बस्तीमा पनि चिसो बढेको छ ।

प्रकाशित : माघ १२, २०७८ २०:००
प्रतिक्रिया
पठाउनुहोस्

को हुन् एमालेबाट निर्वाचित शेर्पा

कुम्भराज राई

ओखलढुंगा — सोलुखुम्बु नाम्चेका ५३ वर्षीय सोनाम ग्याल्जेन शेर्पा खुम्बुक्षेत्रको लागि परिचित नाम हो । २०३५ सालमै खुम्जुङ माविमा अनेरास्ववियुमा आबद्ध भई राजनीतिमा लागेका थिए । शेर्पाको सक्रिय राजनीतिक जीवन तीन दशकभन्दा लामो छ ।

विद्यार्थी राजनीतिबाट नेकपा एमालेको जिल्ला कमिटी सदस्य हुँदै प्रदेश कमिटी सदस्यसम्म रहेका सोनाम २०५४ सालको स्थानीय निर्वाचनमा नाम्चे गाविसबाट निर्वाचित अध्यक्ष हुन् ।

सगरमाथा राष्ट्रिय निकुञ्ज मध्यवर्ती क्षेत्र व्यवस्थापन समितिका लगातार चार कार्यकाल अध्यक्ष भएका सोनाम खुम्बु बिजुली कम्पनीका अध्यक्ष हुन् । सगरमाथा क्षेत्रमा सफाई अभियान, खुम्बुमा सिसाको बोतल बन्द अभियानजस्ता दर्जनौं सामाजिक काममा सक्रिय सोनाम भूगोल र जनसंख्याकै कारण राजनीतिमा अघि बढ्न सकेका थिएनन् ।

कानुन संकायमा प्रमाणपत्र तहसम्म अध्ययन गरेका सोनामलाई सगरमाथा क्षेत्रका केटाकेटीदेखि वृद्धवृद्धा सबैले चिन्छन् ।

सगरमाथा क्षेत्रको कुनै पनि पर्यटन र विकासको काम गर्नुपरेमा सोनाम ग्याल्जेनको सहभागिता रहने गरेको छ । उनी पर्यटन व्यवसायी पनि हुन् । पर्यटनको क्षेत्रमा उनी केही विवादित पनि छन् । स्याङ्बोचे विमानस्थल बन्द भएको लगायतका केही विषयमा उनको हात रहेको आरोप थियो ।

बुधबार भएको राष्ट्रिय सभाको निर्वाचनअन्तर्गत प्रदेश १ मा सरकारी गठबन्धनका उम्मेदवार जनता समाजवादी पार्टीका हेमराज राईलाई पराजित गर्दै सोनाम राष्ट्रिय सभा सदस्य निर्वाचित भए । भूगोलको दृष्टिले सोनाम ग्याल्जेनले राजनीतिक रुपमा पाएको सफलतालाई खुम्बुक्षेत्रले न्याय पाएको भन्दै खुसी व्यक्त गरेका छन् ।

सोनाम ग्याल्जेन शेर्पा, फेसबुकबाट साभार


प्रकाशित : माघ १२, २०७८ १९:५२
पूरा पढ्नुहोस्
प्रतिक्रिया
पठाउनुहोस्
×