त्रिवेणीघाटमा मकर स्नान

तस्बिर : इलिट जोशी

काठमाडौँ — प्रत्येक १२ वर्षमा पनौतीस्थित त्रिवेणीघाटमा लाग्ने मकर मेला शनिबारदेखि सुरु भएको छ । मेला भर्न आएका दर्शनार्थीहरूले बिहानैदेखि त्रिवेणीघाटस्थित कुण्डमा मकर स्नान गरिरहेका छन् ।

सूर्य धनु राशिलाई छोडेर मकर राशिमा प्रवेश गरेको पहिलो दिन (माघ १) देखि एक महिनासम्म १२ वर्षमा एक पटक मेला लाग्ने भएकोले यसलाई मकर मेला भनिएको हो ।कोरोना संक्रमणको जोखिमका कारण स्वास्थ मापदण्ड अपनाएर सामाजिक दूरी कायम गरी एक स्थानमा २५ जना गरी १ पटकमा करिब ४ सय जनाले नुहाउने व्यवस्था मिलाएको पनौती नगरप्रमुख भीम न्यौपानेले दाबी गरे ।

मेलाको रुपमा सञ्चालन नगर्ने निर्णय जिल्ला कोभिड संकट व्यवस्थापन समिति र पनौती नगरपालिकाले गरेको छ । दुवै संस्थाले जारी गरेको सूचनामा २५ जना भन्दा कम तथा भीडभाड नहुने गरी स्वास्थ्यसम्बन्धी सम्पूर्ण सुरक्षा मापदण्ड अपनाएर मकर स्नान गर्न भनिएको छ ।

पछिल्लो समय कोरोना संक्रमण बढ्दै गएपछि २५ जनाभन्दा बढी भेला भएर कार्यक्रम गर्न सरकारले रोक लगाएको आधारमा मेला, मनोरञ्जनात्मक कार्यक्रमहरू भने रोक लगाएको नगरपालिकाले जनाएको छ ।

यसअघि मकर मेलाको अवसरमा पनौतीस्थित त्रिवेणीघाटमा स्नानका लागि देश तथा विदेशबाट भक्तजनको घुइँचो लाग्ने गरेको छ ।


प्रकाशित : माघ १, २०७८ १२:१८
प्रतिक्रिया
पठाउनुहोस्

टुक्रे योजनाले ढिलाइ

टीकाप्रसाद भट्ट

रामेछाप — टुक्रे योजनामा बजेट विनियोजन गर्दा रामेछापको मन्थली नगरपालिकामा यस वर्ष आधाभन्दा बढी योजनाको सम्झौतासमेत हुन सकेको छैन । चालु आर्थिक वर्षमा नगरपालिकाले ७ सय ६ वटा योजनाका लागि बजेट विनियोजन गरेकोमा हालसम्म ३ सय ३८ वटाको मात्र सम्झौता भएको हो ।

अधिकांश योजनामा ५ लाखभन्दा कम बजेट छुट्याइएको थियो । खासगरी वडा कार्यालयले छनोट गरेका अधिकांश योजनाहरू साना छन् ।

प्रमुख प्रशासकीय अधिकृत लीलाराज पौडेलका अनुसार नगरपालिकाले पुस २० गतेसम्म योजना सम्झौताका लागि कार्यतालिका बनाएको थियो । उक्त अवधिभित्र ३ सय ३८ योजनाको मात्र सम्झौता भएको हो । अधिकांश योजनामा उपभोक्ता समितिको गठन नै भएको छैन । योजनाहरू टुक्रे भएकाले उपभोक्ता समिति गठनदेखि निर्माण कार्यका लागि असार मसान्त ताक्ने परम्परा यो वर्ष पनि चल्ने भएको छ ।

‘योजना कार्यान्वयनको अवस्थाप्रति चिन्तित छौं,’ नगरप्रमुख रमेशकुमार बस्नेतले भने, ‘विकास निर्माणमा अपनाइएको कार्यशैलीप्रति गम्भीर समीक्षा गर्नुपर्ने भएको छ ।’ उनले समयमा निर्माण नहुँदा बजेटको सदुपयोग, प्रभावकारिता र उपयोगका सबै दृष्टिले नागरिकले जस नदिने बताए । उपभोक्ता समितिमार्फत कार्यान्वयन हुने टुक्रे योजनाहरूको सम्झौता नहुनु र ठेक्का लागेका ठूला योजनाहरूको समेत काम उल्लेख्य नहुँदा नगरपालिकाले यो वर्ष हालसम्म पुँजीगततर्फ जम्मा ११ दशमलव २१ प्रतिशत मात्र बजेट खर्चेको छ । ‘पुँजीगततर्फको खर्च सन्तोषजनक छैन,’ उनले भने, ‘यसका लागि सबै पक्ष गम्भीर हुनुपर्छ ।’

साना योजनामा वडाका जनप्रतिनिधिले बजेट विनियोजन गरेपछि कार्यान्वयनका लागि नगरपालिकामा पुगेर सम्झौता गर्नुपर्ने नियम छ । वडाले योजना सम्झौताका लागि चासो नदिँदा पनि उपभोक्ताले समयमा नै सम्झौता नगरेका हुन् । नगरपालिकाले उपभोक्ताहरूलाई नगरपालिकाको केन्द्रसम्म पुगेर योजना सम्झौता गर्न असजिलो हुने भन्दै वडा केन्द्रमै पुगेर सम्झौता गर्दै आएको छ । गत वर्ष पनि वडामै पुगेर योजनाको सम्झौता गरेको थियो ।

प्रकाशित : माघ १, २०७८ ११:५६
पूरा पढ्नुहोस्
प्रतिक्रिया
पठाउनुहोस्
×