मनमोहक गुप्सीपाखा [तस्बिरहरु]

गैर आवासीय नेपाली संघ (एनआरएनए)ले भूकम्पपीडितका लागि बनाएको ५ सय ७३ घर धुरीको सामूहिक बस्ती हिउँले ढाकेसँगै आन्तरिक पर्यटकको गन्तव्य बनेको छ । बिहीबार फाट्ट–फुट्ट पर्यटक गुप्सीपाखामा हिउँ खेल्न पुगेका छन् । तर बिहीबार बिहान ३ बजेबाट हिउँ पर्न रोकिएको र चिसो भने बढेको स्थानीय जेसन गुरुङले बताए । ‘चिसो बढेको छ, फेरि गुप्सीपाखाको मौसम कहिले घाम लाग्ने, कहिले ओझेल पर्ने हुन्छ,’ उनले भने,‘हिउँ पर्न रोकिए पनि हिउँ पग्लीसकेको छैन ।’

लाप्राक बस्तीमा रहेको स्थानीय हिउँ रोकिए पनि चिसो बढेपछि घरभित्रै आगो तापेर बसेका छन् । ओसिलो ठाउँ भएकाले लाप्राकको हिउँ पग्लन समय लाग्ने स्थानीयले बताए । गुप्सीपाखा बस्ती हिउँले ढाकेर जनजीवन कष्टकर वने पनि सेताम्मे हिउँको दृश्य भने सुन्दर देखिएको छ । गोरखा बजार, बाह्रकिलो, आबुखैरेनी, मुग्लिनसम्मका स्थानीयलाई हिउँ खेल्नका लागि सबैभन्दा नजिकको गन्तव्य गुप्सीपाखा हो । गत वर्ष लाप्राक गुप्सीपाखामा हिउँ खेल्नेको घुइँचो लागेको थियो । यो वर्ष झनै आन्तरिक पर्यटक बढ्ने स्थानीयको विश्वास छ ।

तस्बिर सौजन्य : जेसन गुरुङ