कान्तिपुर वेबसाईट
AdvertisementAdvertisement

हिउँले ढाक्यो मनाङ [फोटोफिचर]

शब्द : आश गुरुङ

लमजुङ — हिमाली जिल्ला मनाङमा बस्ती ढाकिने गरी हिमपात भएको छ । माथिल्लो मनाङ र नार्पाभूमिका बस्तीमा बिहीबारदेखि हिमपात भइरहेको स्थानीयले बताएका छन् । बिहीबार पानीसहित परेको हिउँ पग्लिएकोमा शुक्रबार हिउँमात्रै परेकाले बस्ती पुरै हिउँमय भएको छ । माथिल्लो मनाङ गाउँस्थित होटल तिलिचोका संचालक छिरिङ लोप्साङ गुरुङका अनुसार बिहीबार परेको हिउँ पग्लिएको छ । रातिदेखि शुक्रबार दिनभरी परेको हिउँ भने पग्लिएको छैन । हिउँ पर्ने क्रम जारी छ ।

उनले हिउँ ४ इन्चसम्म जमेको बताए । अन्नपूर्ण संरक्षण क्षेत्र आयोजना (एक्याप) मनाङका स्वास्थ्यकर्मी ललिता गुरुङका अनुसार बुधबार रातिदेखि नै मनाङमा हिमपात भएको हो । हिमपातका कारण चिसो बढेको छ । पर्यटक आउने गरेको उनले बताइन् । उनका अनुसार हिमपात भएपछि पर्यटकलाई गन्तव्यमा नजान सुझाइएको छ । मनाङ ङिस्याङ गाउँपालिका अध्यक्ष कान्छा घलेले हिमपातका कारण माथिल्लो मनाङमा सवारी आवागमन हुन नसकेको बताए । मनाङस्थित घरबाट हुम्डेस्थित पालिका कार्यालयसम्म हिमपातका कारण जान नसकिएको उनले बताए । उनले ढिकुरपोखरी (३,२४० मि.) देखि माथिल्लो क्षेत्रमा हिमपात भइरहेको बताए ।

नार्पाभूमि गाउँपालिकाका निमित्ति प्रमुख प्रशासकीय अधिकृत दीपेन्द्र पण्डितका अनुसार गाउँपालिका केन्द्र च्याखुसम्म हिउँ आइसकेको छैन । नार र फू गाउँमा भने हिमपात भइरहेको छ । चिसो अत्यधिक बढेको उनले बताए । मनाङका प्रमुख जिल्ला अधिकारी रविन्द्रप्रसाद आचार्यले मनाङ ङिस्याङ गाउँपालिका र नार्पाभूमि गाउँपालिकाको बस्तीमा हिमपात भएको बताए । सदरमुकाम चामे र तल्लो क्षेत्र नासों गाउँपालिकाका बस्तीमा पनि हिउँ आइपुगेको छैन ।

तस्बिरहरु : छिरिङ लोप्साङ गुरुङ र ललिता गुरुङ


प्रकाशित : मंसिर १७, २०७८ १९:३५
प्रतिक्रिया
पठाउनुहोस्

वाग्मती कांग्रेसमा ९१ पदका लागि २५७ जनाको उम्मेदवारी

सुवास विडारी

मकवानपुर — हेटौंडामा जारी नेपाली कांग्रेसको पहिलो प्रदेश अधिवेशनमा ९१ पदका लागि २५७ जनाको उमेदवारी परेको छ ।

प्रदेश निर्वाचन समिति सदस्य रामकुमार अधिकारीका अनुसार अधिवेशनले सभापतिसहित ८ जना पदाधिकारी चयन गर्नेछ । सभापतिमा संस्थापनबाट इन्द्रबहादुर बानियाँ, संस्थापन इतर तथा वरिष्ठ नेता रामचन्द्र पौडेल पक्षका जगदिशनरिसंह केसी, कृष्ण सिटौला प्यानलबाट भीमसेनदास प्रधानले उमेदवारी दिएका छन् ।

संस्थापनबाट उपसभापतिमा मदनकृष्ण श्रेष्ठ, धर्मराज गौतम, महामन्त्रीमा राजु श्रेष्ठ र तिलक रुवाली तथा सहमहामन्त्रीमा हरिशरण श्रेष्ठ, महेन्द्र थिङ र निर्मला बस्ताकोटीले उम्मेदवारी दिएका छन् ।

संस्थापन इतर समूहबाट उपसभापतिमा राजेन्द्र बुर्लाकोटी र मोहन बस्नेत, महामन्त्रीमा रामचन्द्र अर्याल ‘माइकल’, कञ्चन वादे, सहमहामन्त्रीमा दिलबहादुर तामाङ, ऋषिराम घिमिरे, जीवन डंगोल उमेदवार दिएका छन् ।

प्रधान समूहबाट उपसभापतिमा चन्द्र महर्जन र पर्शुराम पोखरेल, महामन्त्रीमा सुरेश श्रेष्ठ र गौरीप्रसाद दवाडी, सहमहामन्त्रीमा राजकुमार पाठक, जयनारायण सापकोटा र मोतीमाया तामाङले उम्मेदवारी दिएका छन् । सदस्यतर्फ खुल्लामा ८५ जना, समावेशीतर्फ १४८ जनाको उम्मेदवारी परेको छ ।

निर्वाचन अधिकृत अधिकारीका अनुसार बिहान ८ बजेबाट दिउँसो ४ बजेसम्म मतदान प्रक्रिया सुरु हुनेछ । अधिवेशनमा १३ जिल्लाका २१ सय ३७ जना सहभागी छन् । अधिवेशनबाट दुइ उपसभापति, दुइ महामन्त्री र एक महिलासहित तीन सहमहामन्त्री गरी कुल ९१ सदस्यीय नयाँ कार्यसमिति चयन हुनेछ । खुलातर्फ ४८ र ३५ जना समावेशीतर्फबाट सदस्य निर्वाचित हुनेछन् ।

प्रकाशित : मंसिर १७, २०७८ १९:२४
पूरा पढ्नुहोस्
प्रतिक्रिया
पठाउनुहोस्
×