माला बनाउन भ्याईनभ्याई

मनोज पौडेल

कपिलवस्तु — कपिलवस्तु नगरपालिका–९ वनकसियामा तिहारका लागि सयपत्रीको माला बनाउन भ्याईनभ्याई छ । ५ जना मजदुरले ५ दिनदेखि माला बनाउँदै बजार पठाउँदै गरेका छन् ।

प्लस टु अध्यनरत बुटवलका वृजेश गुप्ताले यहाँ फूल खेती गरेका छन् । व्यवसायमा रुचि भएका वृजेश गुप्ताले पढ्दै जग्गा लिजमा लिएर १० कट्ठामा सयपत्री खेती गरेका छन् । साउन पहिलो साता बिउ छरेर बेर्ना तयार गरी फूल रोपेका हुन् । ७० दिनमै फूलको कोपिला लाग्न थालेर अहिले बारी पहेलै भएको छ । तिहारलाई लक्षित गरेर फूल उत्पादन गरी माला बनाई बेच्न उनलाई भ्याईनभ्याई छ । उनले कपिलवस्तु, रुपन्देही र दाङसम्म माला बेचिरहेका छन् । उनले ५ सय रुपैयाँ किलो फूल पनि बेचिरहेका छन् ।

थाइल्यान्डबाट बिउ आयात गरी गाढा सुन्तला रंगको सयपत्रीको बगैँचा मनमोहक देखिएको छ । कर्मा ५५५ जातको फूलको उनले बगैँचामै मजदुर राखेर माला बनाई बेच्न पठाइरहेका छन् । गोलो, अठिलो, मध्यम आकार र छिटो नकुहिने फूल भएकाले यसको माग बढी रहेको छ । सातादेखि उनलाई भ्याईनभ्याई भएको छ ।

तिहारमा बचेका फूल मंसिरको लगनका बेला बेच्ने तयारी गरिएको छ । एक लाख लगानी गरेर सय दिनमा ५ लाख आम्दानी भएको बताए ।


प्रकाशित : कार्तिक १९, २०७८ ०८:५३
प्रतिक्रिया
पठाउनुहोस्

जाजरकोटमा मिनीट्रक दुर्घटना : दुई जनाको मृत्यु

हरिहरसिंह राठौर

जाजरकोट — जाजरकोटमा मिनी ट्रक दुर्घटना हुँदा दुई जनाको मृत्यु भएको छ भने आठ जना घाइते भएका छन् ।

सुर्खेतबाट जाजरकोटको जुनीचाँदे गाउँपालिकातर्फ जाँदै गरेको बा ५ छ २५०१ नम्बरको मिनीट्रक बिहीबार राति जाजरकोटको छेडागाड नगरपालिका–१ ध्यापुटाकुरामा दुर्घटना भएको हो ।

दुर्घटनामा जाजरकोट जुनीचाँदे गाउँपालिका–२ निवासी २६ वर्षीय डिलबहादुर शाही र सोही ठाँउका १४ वर्षीय पारस सिंहको घटनास्थलमै ज्यान गएको प्रहरीले जनाएको छ । घाइते ८ मध्ये सात जनालाई उपचारका लागि सुर्खेत पठाइएको छ । जुनीचाँदे–११ का नवीन सिंह र जुनीचाँदे–९ का धनबहादुर शाही गम्भीर घाइते भएका छन् । अन्यको अवस्था सामान्य रहेको प्रहरी नायब उपरीक्षक मधुकुमार थापाले बताए ।

दुर्घटना बिहीबार राति ११ बजे भएको थियो । रातिको समय भएको तत्काल उद्धार गर्न कठिन भएको थियो । बाटो अफ्ठयारो भएकोले मोडमा ब्रेक फेल हुँदा दुर्घटना भएको प्रहरीको अनुमान छ । ट्रक करिब तीन सय मिटर तल खसेको थियो । ट्रकमा खाद्यान्न लगायतको समान पनि थियो । लोड धेरै भएकोले पनि दुर्घटना भएको प्रहरीले बताएको छ ।

चाडवाडको समयमा गाडी नपाएका कारण यात्रुहरु मिनीट्रक चढेका थिए । तिहार मनाउन घर जान थालेका उनीहरु दुर्घटनामा परेका हुन् ।

प्रकाशित : कार्तिक १९, २०७८ ०८:३३
पूरा पढ्नुहोस्
प्रतिक्रिया
पठाउनुहोस्
×