हिँड्दाहिँड्दै हराउँछ फुटपाथ

महानगरले हरियाली कार्यक्रमअन्तर्गत ती पेटीमा बिरूवा रोप्दा कति ठाउँमा हिँड्नै नमिल्ने भएको छ । हिँड्दाहिँड्दै पेटी सकिएपछि पैदलयात्रु फेरि सडकमै ओर्लन बाध्य हुन्छन् । त्यति मात्र होइन, सडकपेटीमा खाल्डाखुल्डीका साथै ठूलै भ्वाङ पनि ठाउँठाउँमा भेटिन्छ । सुरक्षित भनिएका सडकपेटी व्यवस्थित नहुँदा जोखिम पनि उस्तै छ । बौद्धस्थित प्रहरी कार्यालयको भवनमुनि सडकपेटी छ । कमलपोखरीमा घरको पिलर सडकमै ठडिएको छ । चारखालमा हिँड्दाहिँड्दै पेटी घरमा पुगेर अन्त्य भएको छ । रातोपुलमा पनि यस्तै छ । सडकपेटीको बीच भागमा बिजुलीका पोल त गनिसाध्य छैनन् ।