नवरात्रमा पाल्पाको भैरवस्थानमा भक्तजनको भीड

भैरव मन्दिर पाल्पाली सेनवंशीय अन्तिम राजा मणिमुकुन्द सेनले स्थापना गरेका हुन् । हिन्दू धर्मालम्बीहरुको आस्थाको धरोहरका रुपमा यसलाई चिनिन्छ । आफ्नो मनोकांक्षा पूरा होस् र पूरा भएपछि रोट, बलि, पञ्चबलि चढाउने गरिएको मन्दिर व्यवस्थापन समितिका व्यवस्थापक मीनबहादुर बुढाथोकीले बताए ।

अरु बेलाभन्दा दसैंमा भैरवस्थानमा बढी भीड लाग्ने गरेको छ । योबाहेक पनि वैशाख र मंसिर महिनामा दर्शानार्थीको भीड लाग्छ । पश्चिम नेपालकै शत्तिपीठका रुपमा भैरवस्थानलाई लिइने गरिन्छ । मन्दिरमा दर्शनका लागि नेपालमा धेरै जिल्लाबाट आउने गर्दछन् । दर्शनार्थीको सुविधाका लागि रोट पकाउने, बलिका लागि बोका, कुखुरासमेत व्यवस्था छ ।

मन्दिरमा मानापाथीका रोट पकाउन लगाएर चढाउने गरिन्छ । मन्दिर परिसरमा सुन्दर बगैँचा पनि छ । मन्दिरको ४ सय वर्ष पुरानो इतिहास छ । भैरवस्थान मन्दिर तानसेनदेखि ९ किलोमिटरको दूरीमा रहेको छ ।