देवगणको मुकुण्डो तयार पार्दै ७५ वर्षीय चित्रकार [तस्बिरहरु]

तस्बिर : बिजु महर्जन

काठमाडौँ — भक्तपुरको याछेँ ६ स्थित ७५ वर्षीय पूर्ण चित्रकार नवदुर्गा देवगणको मुकुण्डो तयार पारिरहेका छन् । जीवित देवताको रुपमा पुजिने भैरव, महाकाली, बाराही, कुमारी, गणेश, ब्रह्मायणी, महेश्वरी, वैष्णवी, बालकुमारी, श्वेतभैरव, सिंह र दुम्ह गरी १३ देवीदेवताका मुकुण्डो उनले बनाउँदै आएका छन् । हरेक वर्ष घण्टाकर्णको दिनदेखि मुकुण्डो बनाउन सुरु गर्छन् र दसैंको नवमीमा सक्छन् । एउटा मुकुण्डोको तौल पाँच किलोदेखि ६ किलोसम्म हुन्छ ।

यो मुकुण्डो लगाएर वनमाला समुदायका कलाकारहरूले नवदुर्गाको नाच सुरु गर्छन् । नवमीको दिन वनमाला समुदायबाट छानिएका नवदुर्गा देवगणलाई कर्माचार्यहरूले मुकुण्डो हस्तान्तरण गरेपछि ‘खमे ब्वाकेउ’ जात्रा सुरु हुन्छ । नौ महिनासम्म भक्तपुरका २२ ठाउँमा वनमाला समुदायका देवगणले मुकुण्डो लगाएर नवदुर्गा नाच निकाल्छन् । यो नाच भक्तपुरमा सीमित रहँदैन, पशुपति, साँखु, नाला, नंखेल, साँगा, बनेपा, पनौती, धुलिखेलसम्म पुग्छ ।

प्रत्येक वर्ष असारको भलभलअष्टमीमा मुकुण्डो जलाएर नवदुर्गा देवगणको विसर्जन गरिन्छ । नवदुर्गा नाच बाहेक यो मुकुण्डो ङाला केगु जात्रा ‘माछा मार्ने जात्रा’, गाईजात्रा, देवीनाच, भैरव नाच, लाखे नाच लगायतमा समेत प्रयोग गरिन्छ । मुकुण्डो बनाउन झन्डै ३ लाख खर्च हुन्छ । त्यसमा नगरपालिका, गुठी संस्थान र धर्म गुठीले केही सहयोग गर्ने गरेका छन् ।


प्रकाशित : आश्विन १९, २०७८ १८:५२
प्रतिक्रिया
पठाउनुहोस्

जनगणनामा छुटेकालाई मौका

कान्तिपुर संवाददाता

काठमाडौँ — केन्द्रीय तथ्यांक विभागले राष्ट्रिय जनगणनाको पहिलो चरणअन्तर्गत घर तथा घरपरिवार सूचीकरणमा छुटेकालाई पुनः मौका दिएको छ । त्यसका निम्ति विभागको टोल फ्रि नम्बर वा वेबसाइटमा आफ्नो घर ठेगाना दिन विभागले भनेको छ । 


गत भदौ ३० गते सुरु भएको घर तथा घरपरिवार सूचीकरण कार्य सोमबार सकिएको छ ।

विभागले मंगलबार विज्ञप्ति जारी गर्दै ‘यस चरणमा कुनै परिवार छुटेको भए विभागको टोल फ्रि नम्बर ११७८ मा फोन गर्न वा वेबसाइटको लिंक प्रयोग गरी आफ्नो घरठेगानाको जानकारी दिन’ अनुरोध गरेको हो ।

आगामी कात्तिक २५–मंसिर ९ मा सम्पन्न हुने मूल जनगणनामा सबैको सहभागिताका निम्तिसमेत विभागले आह्वान गरेको छ ।

प्रकाशित : आश्विन १९, २०७८ १८:४८
पूरा पढ्नुहोस्
प्रतिक्रिया
पठाउनुहोस्
×