यस्तो छ नेकपा एकीकृत समाजवादी पार्टीको केन्द्रीय कार्यालय

तस्बिर : अंगद ढकाल

काठमाडौँ — नेकपा एकीकृत समाजवादी पार्टीको केन्द्रीय कार्यालय सञ्चालनमा आएको छ । शुक्रबार बिहान पार्टी अध्यक्ष माधवकुमार नेपालले आलोकनगरस्थित पार्टी कार्यालयको उद्घाटन गरेका हुन् ।

उद्घाटन कार्यक्रममा अध्यक्ष नेपालसहित नेताहरू वेदुराम भुसाल, राजेन्द्र पाण्डे, गंगा तुलाधरलगायतहरू उपस्थित थिए । नेकपा एमालेबाट विभाजन भई नेपाल नेतृत्वमा गत भदौ ९ गते नेकपा एकीकृत समाजवादी पार्टी दर्ता भएको थियो ।


प्रकाशित : आश्विन १, २०७८ १०:५८
प्रतिक्रिया
पठाउनुहोस्

दलमाथिको ‘थ्रेसहोल्ड’ हटाउने तयारी

कान्तिपुर संवाददाता

कास्की — गण्डकी प्रदेश सरकारले साना दलमाथि लगाइएको ‘थ्रेसहोल्ड’ हटाउँदै सेवासुविधा दिने उद्देश्यसाथ ऐन संशोधनको तयारी थालेको छ ।

मंगलबारको प्रदेशसभा बैठकमा कानुन, सञ्चार तथा प्रदेशसभा मामिलामन्त्री बिन्दुकुमार थापाले प्रदेशसभाका पदाधिकारी तथा सदस्यको पारिश्रमिक र सुविधासम्बन्धी ऐन, २०७४ लाई संशोधन गर्न बनेको विधेयक टेबुल गरेका छन् ।

ऐन संशोधन भएपछि साना दलले पनि ठूला दलले जस्तै सुविधा पाउनेछन् । साना दुई दलमाथि लागेको १० प्रतिशतको थ्रेसहोल्ड हट्नेछ । सबै दलका प्रमुख सचेतक पनि पदाधिकारीमा गणना हुनेछन् । जनता समाजवादी र राष्ट्रिय जनमोर्चालाई लक्षित गरी सरकारले ऐन संशोधन गर्न लागेको हो । यी दुवै पार्टीका प्रदेशसभामा २/२ सांसद छन् । यसअघि ऐनले दलको नेता हुनको लागि सम्बन्धित पार्टीका कम्तीमा १० प्रतिशत सांसद हुन अनिवार्य गरेको थियो ।

६० सदस्यीय प्रदेशसभामा जनमोर्चा र जनता समाजवादीका १० प्रतिशत सांसद नपुगेकै कारण उनीहरूले दलको नेता र सचेतकको सुविधा लिन पाएका थिएनन् । पृथ्वीसुब्बा गुरुङ नेतृत्वको सरकार ढलाएर कांग्रेस संसदीय दलका नेता कृष्णचन्द्र नेपाली नेतृत्वको सरकार गठन गर्ने बेला कांग्रेसले साना दुई दलसँग थ्रेसहोल्ड हटाउने लिखित सहमति गरेको थियो ।

ऐन संशोधनपछि एमाले, माओवादी केन्द्रका संसदीय दलका नेता, उपनेता, प्रमुख सचेतक, राष्ट्रिय जनमोर्चा संसदीय दलका नेता र जनता समाजवादी पार्टीका प्रमुख सचेतकले गाडीसहितको सुविधा पाउनेछन् । सरकारका प्रवक्ता एवं भौतिक पूर्वाधार, सहरी विकास तथा यातायात व्यवस्थामन्त्री कुमार खड्काले थ्रेसहोल्ड हटाउन ऐन संशोधन गर्न लागिएको बताए ।

प्रकाशित : आश्विन १, २०७८ १०:४७
पूरा पढ्नुहोस्
प्रतिक्रिया
पठाउनुहोस्
×