कान्तिपुर वेबसाईट
AdvertisementAdvertisement

तस्बिरहरूमा हेर्नुहोस् नेपाल र बंगलादेशबीचको मैत्रीपूर्ण फुटबल

तस्बिर : हेमन्त श्रेष्ठ

काठमाडौँ — अन्तर्राष्ट्रिय महिला फुटबलमा बंगलादेशमाथि नेपालको प्रभुत्व बिहीबार पनि कायम रह्यो । नेपालले दशरथ रंगशालामा भएको मैत्रीपूर्ण खेलमा २–१ को जित निकालेको हो । यस खेलसँग नेपालले अन्तर्राष्ट्रिय महिला फुटबलमा दशरथ रंगशालामा डेब्यु गरेको छ । सन् १९८६ देखि अन्तर्राष्ट्रिय फुटबल खेल्न थालेको नेपालले दशरथ रंगशालामा खेलेको यो पहिलो पल्ट हो ।

यसै खेलसँगै नेपाली महिला राष्ट्रिय टिमले पहिलो पल्ट विदेशी प्रशिक्षकको नेतृत्वमा पनि खेलेको छ । नेपालका लागि यो ग्यारी फिलिप्सको पहिलो खेल हो । नेपालका लागि दुवै गोल गरेका खेलाडी सविता राना र प्रिति राईले पनि राष्ट्रिय टिमका लागि डेब्यु गरे । सविताले १३ औं मिनेटमा नेपालका लागि पहिलो गोल गरिन् । बंगलादेशी गोलरक्षक रुपन चक्मा अगाडि बढेको मौका छाडेर सविताले हेडबाट खोली पोस्टमा गोल गरिन् । प्रितिले २३ औं मिनेटमा दोस्रो गोल थपिन् । उनले पेनाल्टी एरिया बाहिरबाट शक्तिशाली प्रहार गर्दै गोल गरेकी हुन् । बंगलादेशमाथि अन्तर्राष्ट्रिय फुटबलमा यो छैटौं जित हो र नेपाल उसको विरुद्ध अपराजित रहेको छ ।

पूरा खेल अवधिमा नेपाल हाबी रहे पनि बंगलादेशले पहिलो आक्रमण बुनेको थियो । त्यसपछि पहिलो हाफमा नेपालले दुई गोल गर्न सफल रह्यो । दोस्रो हाफमा भने बंगलादेशले सुधारिएको खेल प्रदर्शन गरेको थियो र नेपालमाथि दबाब सिर्जना गर्न सफल रह्यो । खेलको ७९ औं मिनेटमा बंगलादेशले पूरा खेल अवधिकै सबैभन्दा राम्रो आक्रमण बुनेको थियो ।श्रीमोति सरकारले पेनाल्टी एरियाभित्रबाट गरेको सटिक प्रहारमा नेपाली गोलरक्षक एन्जिला सुब्बाले उत्कृष्ट बचाउ गरिन् । बंगलादेशबाट सम्भव एक मात्र गोल ८३ औं मिनेटमा तोहुरा खातुनले गरिन् । सब्टिच्युट खेलाडीका रूपमा मैदान प्रवेश गरे लगतै उनले पेनाल्टी एरियाबाट आकर्षक गोल गरेकी हुन् ।

बंगलादेशी खेलाडीले नेपालविरुद्ध गोल गरेको यो दोस्रो पल्ट मात्र हो । यसअघि एसियाली ओलम्पिक छनोटमा नेपालले बंगलादेशविरुद्ध १–१ को बराबरी खेल्दा अखि आतुनले पहिलो गोल गरेकी थिइन् । पछिल्लो समय बंगलादेशले महिला फुटबलमा राम्रै लगानी गरेको छ र टिमको प्रदर्शनमा पनि सुधार आएको छ । बंगलादेशले उमेर समूहको फुटबलमा बढी लगानी गरको छ । नेपाल र बंगलादेशले मैत्रीपूर्ण अन्तर्राष्ट्रिय खेल खेलेको यो पहिलो पल्ट हो । अब दोस्रो खेल आइतबार दशरथ रंगशालामै हुनेछ । नेपालले एसियाकप छनोटको तयारीका लागि यो खेल खेलेको हो । नेपालले त्यो छनोट उज्वेकिस्तानमा खेल्नेछ । नेपाल र उज्वेकिस्तानको समूहमा हङकङ र फिलिपिन्स पनि रहेका छन् । 


प्रकाशित : भाद्र २४, २०७८ १९:०९
प्रतिक्रिया
पठाउनुहोस्

अमेरिकामा कोभिडको कारण अस्पताल भर्ना हुने बालबालिकाको संख्या हालसम्मकै उच्च

सबैभन्दा बढी खोप लगाउने दर कम भएका राज्यमा 
कान्तिपुर संवाददाता

काठमाडौँ — कोभिड-१९ को महामारीका कारण अमेरिकामा लाखौं परिवारले आफ्ना बालबालिकालाई लामो समयपछि विद्यालय पठाउने कि नपठाउने भन्ने दोधारमै रहेको बेला १८ वर्षभन्दा कम उमेरका बालबालिकामा कोरोनाको संक्रमण उच्च देखिएको छ ।

अमेरिकी पत्रिका न्यूयोर्क टाइम्सका अनुसार बालबालिकामा संक्रमण हालसम्मकै उच्च तहमा पुगेको हो । अंग्रेजी वर्षको अगस्ट महिनामा मात्रै ३० हजार बालबालिका अस्पताल भर्ना भएको पत्रिकाले जनाएको छ ।

खोप लगाउने दर निकै कम भएको राज्यका साथै देशभर नै बालबालिकाहरुमा संक्रमण निकै बढेको बताइएको छ । सबैभन्दा बढी बालबालिका भने लुजियाना र टेक्सास राज्यमा प्रभावित भएका छन् । बालबालिकामा कोभिड-१९ को गम्भीर जोखिम वयस्कमा भन्दा कम भएपनि बालबालिकाको बढ्दो अस्पताल भर्नाले चिन्ता बढाएको विज्ञहरुले बताएका छन् ।

'बालबालिकालाई अस्पताल भर्ना नै गर्नुपर्ने अवस्था आउनु भनेको सामान्य विषय होइन । यसले हामीलाई सोच्न बाध्य बनाएको छ । हामीले बालबालिकामा संक्रमण फैलन नदिनका लागि गर्नुपर्ने धेरै उपायहरु छन्,' कोभिड-१९ का कारण अस्पताल भर्ना हुनेहरुको तथ्यांक विश्लेषक तथा युनिभर्सिटी अफ साउथ फ्लोरिडाकी जनस्वास्थ्यविद् जेसन एल सलेमीले भनिन् ।

जनस्वासथ्यविद् तथा स्वास्थ्य विज्ञले समेत कोभिडका कारण बालबालिका अस्पताल भर्ना हुने दर बढेमा बाल अस्पताल तथा आईसीयू व्यवस्थापनमा चुनौती थपिने चेतावनी दिएका छन् । उनीहरुका अनुसार पहिले नै नर्सहरुको अभाव झेलिरहेका अस्पतालहरुमा यसले थप दबाब बढाउने छ ।

'अमेरिकाका अस्पतालमा औसतमा १२ पिडियाट्रिक आईसीयू बेड मात्रै छन्,' क्यान्टकी चिल्ड्रेन्स मेडिकल सेन्टरका पिडियाट्रिक इन्टेन्सिभिस्ट डा. क्रिस्टोफर क्यारोलले भने, 'यस्तो अवस्थामा स्थितिले छिट्टै गम्भीर रुप लिन सक्छ । त्यसमाथि पनि बालबालिकाको उपचारका लागि आवश्यक जनशक्ति पनि कम छ ।'

अस्पतालमा बालबालिका भर्ना हुने दर बढेसँगै अस्पताल व्यवस्थापक एवं चिकित्सकहरुले वयस्कहरुलाई खोप लगाउन ढिला नगर्न, मास्कको प्रयोग गर्न तथा सामाजिक दुरी कायम राख्न आग्रह गर्न थालेका छन् ।

प्रकाशित : भाद्र २४, २०७८ १९:०४
पूरा पढ्नुहोस्
प्रतिक्रिया
पठाउनुहोस्
×