कान्तिपुर वेबसाईट
AdvertisementAdvertisement

निषेधाज्ञाले रित्ताे ठमेल [तस्बिरहरू]

दिपेन्द्र रोक्का

काठमाडौँ — शुक्रबार । ठमेल छिर्ने बाटो छेउमै प्रहरीहरु खटिरहेका छन् । ३ जना नेपाल प्रहरी, ३ जना ट्राफिक प्रहरी र ३ जना सशस्त्र प्रहरीहरु यहाँ बिहान ५ बजेदेखि बेलुका ७ बजेसम्म पहरा दिइरहन्छन् । करिब ५ घण्टाको अन्तरालमा उनीहरूको ड्युटी गर्ने पालो फेरिने गर्छ ।

निषेधाज्ञाको समयमा मापदण्ड नपुगेका सवारी साधनहरु छेउमै नियन्त्रणमा राखिएका छन् । प्रहरीका अनुसार दैनिक ३० देखि ४० वटा सवारी साधन नियन्त्रणमा लिइन्छ । प्रहरी भन्छन्, 'कोहीकोही त धेरै नै बदमासी गर्छन् । अर्काको परिचयपत्र बोकेर सवारी साधन चलाउनेहरूलाई पनि हामीले नियन्त्रणमा लिएका छौं ।'

प्रहरी चेकिङबाट थोरै अगाडि पर्यटक हेल्प डेस्क राखिएको छ । विदेशी पर्यटकलाई मद्दत दिने हिसाबले दुई जना स्थानीय हेल्प डेस्कमा छन् । पर्यटकहरुलाई पीसीआर रिपोर्ट कहाँ गर्ने कुरा बताउनेदेखि उनीहरुलाई विमानस्थलसम्म छोड्ने काम यो हेल्प डेस्कले गर्दै आइरहेको छ । 'बुधबार अन्तर्राष्ट्रिय उडान हुँदासम्म ४० पर्यटकहरुलाई हामीहरुले पिक एन्ड ड्रपको सुविधा दियौं । अन्तर्राष्ट्रिय उडान बन्द भएकाले अब खासै पर्यटक छैनन् ।', हेल्प डेस्कका एक जनाले भने ।

सडक सुनसान छ ।

सुनसान र रिक्सा चढ्ने ग्राहकको कोही नभएकै कारणले होला पट्यार लागेर एकजना रिक्सा चालक आफ्नो रिक्सामै मस्त निन्द्रामा देखिन्छन् ।

धादिङका ३१ वर्षीय आकाश परियार आफ्नो मोबाइलमा क्यान्डी क्रस खेल्दै थिए । परियार १९ वर्षदेखि यो पेशामा छन् । पहिले पहिलेको वर्षमा दिनको ८ सय देखि १५ सयसम्म कमाई हुन्थ्यो । 'जबदेखि कोरोना भाइरसको सतर्कताका लागि सरकारले लकडाउन र निषेधाज्ञा गर्‍यो त्यसपछि हाम्रो व्यापार ठप्प छ । बोनी मात्र पनि नभएको थुप्रो दिन भइसक्यो,' उनी सुनाउँछन् ।

परियारका अनुसार ठमेल क्षेत्र वरिपरी ४७५ हाराहारीका रिक्सा छन् । जसमध्ये ५० देखि ६० वटा मात्रै अहिले सडकमा भेटिन्छन् ।

अर्जेन्टेनियाबाट आएका मार्टिन र उनका दुई साथीहरु रेष्टुरेन्ट खोज्दै गरेको अवस्थामा भेटिए । उनीहरु १४ दिनअघि सगरमाथा आरोहण गर्न नेपाल आएका थिए । तर सरकारले निषेधाज्ञा जारी गरेपछि उनीहरु कहिले सगरमाथा आरोहण गर्न पाउँछन् भन्ने नै ठेगान छैन ।

छेवैको सानो गल्लीमा निशा श्रेष्ठको नाङ्लो पसल छ । उनको टोकरीमा ५-६ वडा चाउचाउ, चुरोट र सुर्ती राखिएका छन् । प्रहरी देख्नासाथ उनी भित्र लुकी हालछिन्।

निशा बिहानै ठमेल छेउबाट सामानहरू ल्याउँछिन् र आफ्नो नाङ्लो पसलमा व्यापारका लागि राख्छिन् । पहिले ३ देखि ४ हजारको व्यापार गर्ने उनी अहिले २ सयदेखि ३ सयसम्म व्यापार गर्ने बताइन् ।

डल्लुमा बस्ने ५५ वर्षीय सोनाम घिसिङ पेशाले ट्याक्सी ड्राइभर हुन् । ठमेलको एक होटेलमा उनी भारतीय पर्यटकहरुलाई लिन आएका हुन् । २८ वर्षदेखि ट्याक्सी पेशामा रहेका उनी एक वर्षदेखि आफूहरूलाई समस्या परेको बताउँछन् ।

'पहिलेको लकडाउनमा यति पनि चलाउन पाइँदैन थियो । अहिले त धन्न यति भएपनि कुदाउन पाइएको छ । तैपनि सोचेको जस्तो व्यापार छैन,' उनी सुनाउँछन् ।

उनको ट्याक्सीमा भारतका फैजल अब्बास र उनका दुई साथी बसेका छन् । उनीहरु नेपाल हुँदै साउदी अरबमा वैदेशिक रोजगार गर्न भारतबाट नेपाल आएका थिए । शुक्रबारै उनीहरूको हवाई उडान थियो । तर उडान नहुँदा उनीहरु अर्को होटेलमा सर्न विवश भएका भए । एकजनाले पीसीआर गरेको कागज देखाउँदै अब चार्टर फ्लाइटमा साउदी जाने बताए ।

पेशाले सुरक्षागार्ड गर्ने रामराजा भित्तामा अडेस लगाउँदै चुरोट तान्दै थिए । १८ वर्षदेखि सुरक्षागार्डको काम गरेका उनी 'ठमेल क्षेत्र अब बिस्तारै पहिलेको जस्तो हुन गाह्रो छ' भनी बताउँछन् ।

थोरै अगाडि दुईजना विदेशी पर्यटकहरु झोला बोकी उभिइरहेका थिए । उनीहरुलाई हेर्दा बाटो भुले जसरी बसिरहेका थिए । 'आर यु गाइज इन प्रबलम' भनी सोध्दा 'वी डन्ट निड एनी हेल्प' भन्दै आफ्नो बाटो लागे ।

मैनज खानले दैनिक ज्याला मजदुरी गर्ने र भोका सडक बालबालिकालाई निःशुल्क खाना खुवाउँदै आइरहेका छन् । पहिलेको लकडाउनमा पनि उनले निःशुल्क खाना बाँडेका थिए । उनले दैनिक ३०० देखि ४०० जनालाई खाना खुवाउँदै आइरहेका छन् । हरेक दिन उनी भेज बिरयानी र हप्ताको एकपटक चिकेन बिरयानी खुवाउँदै आइरहेका छन् ।

इलामका मानबहादुर राई र देवी राई मैनज खानको खाना खुवाउने ठाउँमा भेटिए । राई दम्पती दैनिक ज्याला मजदुरी गर्दछन् । तर निषेधाज्ञाका बेलामा काम नभएपछि छाक टार्न यसरी नै खानाको खोजीमा हिँड्ने गरेको उनीहरू बताउँछन् ।


प्रकाशित : वैशाख २५, २०७८ १२:२७
प्रतिक्रिया
पठाउनुहोस्

नारायणी अस्पतालमा आइपुगेन रेम्डेसिभिर

औषधि व्यवस्था विभागले मंगलबार र बिहीबार गरी २०४ भाइल रेम्डेसिभिर पठाएको बताए पनि अस्पतालले भने अहिलेसम्म आफूहरूकोमा नआइपुगेको दाबी गरेको छ । 
भूषण यादव

वीरगन्ज — वीरगन्ज महानगरपालिका १२ राधेमाई निवासी ४३ वर्षीय महिला चार दिनदेखि नारायणी अस्पतालको आईसीयूमा भर्ना छिन् । यसअघि वीरगन्जकै एक निजी अस्पतालमा उपचार गराइरहेकी ती महिलामा कोरोना संक्रमण पुष्टि भएपछि गत मंगलबार नारायणीमा सारिएको थियो ।

स्वास्थ्यमा सुधार नदेखिएपछि बिहीबार चिकित्सकले उनका परिवारलाई रेम्डेसिभिरको व्यवस्थापन गर्न सुझाए । आफन्तले वीरगन्जदेखि लिएर काठमाडौंसम्म खोजबिन गरे तर रेम्डेसिभिर जोहो गर्न सकेनन् । जबकि औषधि व्यवस्था विभागले गत मंगलबार ५४ भाइल र बिहीबार १ सय ५० भाइल रेम्डेसिभिर नारायणी अस्पताललाई वितरण गरेको वेबसाइटमार्फत जनाएको छ ।

वीरगन्जकै एडभान्स मेडिकेयर हस्पिटलमा एक ४० वर्षीय पुरुषलाई ६ भाइल रेम्डेसिभिर आवश्यक रहेको अस्पतालले जनाएको छ । गत आइतबारदेखि भर्ना भएका ती पुरुषमा कडा निमोनिया देखिएको छ । आफन्तले यहाँको सरकारी अस्पताल मात्र नभई औषधि र सर्जिकलका बिक्रेताहरुलाई सम्पर्क गर्दा पनि रेम्डेसिभिर फेला परेको छैन् । ‘एक औषधि बिक्रेताले एक भाइलको ३० हजार रुपैयाँ पर्ने बताएका थिए,’ ती संक्रमितका आफन्त भन्छन्, ‘त्यति रकम दिन तयार हुँदा पनि रेम्डेसिभिर पाइएन् ।’ अहिले अस्पतालमा भर्ना भएका कोरोना सिकिस्त बिरामीलाई चिकित्सकले रेम्डेसिभिर सिफारिस गर्ने गरेका छन् । औषधि व्यवस्था विभागले दुई चरणमा गरी २ सय चार भाइल रेम्डेसिभिर नारायणी अस्पताललाई वितरण गरेको आफ्नो वेबसाइटमा सार्वजनिक गरेको छ । तर, अस्पतालमा रेम्डेसिभिर आइनपुगेको अस्पताल व्यवस्थापनले जनाएको छ ।

पर्साका सांसद प्रदीप यादवले शुक्रबार अपराह्न सामाजिक सञ्जालमा औषधि व्यवस्था विभागले नारायणी अस्पतालका लागि रेम्डेसिभिर पठाइसकेको भए पनि यहाँका संक्रमितले रेम्सेडिभिर नपाएको गुनासो गरे । ‘वैशाख २३ मा विभागले एक सय ५० भाइल रेम्डेसिभिर पठाएको छ,’ उनले सामाजिक सञ्जालमा लेखेका छन्, ‘तर, अस्पताल प्रमुखको गैरजिम्मेवारीका कारण नाजुक अवस्थामा रहेका संक्रमितले रेम्डेसिभिर इन्जेक्सन पाउन सकेका छैनन् ।’

उनले अस्पताल प्रमुखलाई तत्काल कारबाहीको दायरमा राखी संक्रमितहरुलाई सहज रुपमा रेम्डेसिभिर उपलब्ध गराउन अनुरोध समेत गरेका छन् । ‘स्वास्थ्य मन्त्रालयमा कुरा गर्दा नारायणीमा पठाइसकिएको भन्छन्,’ सांसद यादवले भने, ‘नारायणीमा बुझ्दा हामी कहाँ आएकै छैन् भन्छन्, आखिर रेम्डेसिभिर कहाँ गयो ?।’

नारायणी अस्पतालका फार्मेसी प्रमुख हरेन्द्र यादवले औषधि विभागले रेम्डेसिभिर वितरण गरेको सार्वजनिक गरेको भए पनि हालसम्म अस्पतालमा आइनपुगेको बताए । ‘रेम्डेसिभिर लिन मान्छे काठमाडौँ पठाएका छौ,’ उनले भने, ‘शनिबारसम्म आइपुग्छ ।’

अस्पतालका मेडिकल सुपरिटेन्डेन्ट डा. सञ्‍जयकुमार ठाकुरले एक भाइल पनि रेम्डेसिभिर नारायणीमा नआएको दाबी गर्छन् । ‘महामारीको बेला चरित्र हत्या गरेर मनोबल खसाउन कम गर्नु हुन्न,’ डा.ठाकुरले भने, ‘एक भाइल पनि रेम्डेसिभिर आएको छैन ।’

प्रकाशित : वैशाख २५, २०७८ १२:१५
पूरा पढ्नुहोस्
प्रतिक्रिया
पठाउनुहोस्
×