उपत्यकामा निषेधाज्ञाको पहिलो दिन : कतै जाम, कतै सुनसान [तस्बिरहरू]

तस्बिर : दीपक केसी, तस्बिर : अंगद ढकाल, तस्बिर : हेमन्त श्रेष्ठ, तस्बिर : इलिट जोशी, तस्बिर : सन्जोग मानन्धर

काठमाडौँ — कोरोना महामारी रोकथाम तथा नियन्त्रण गर्न काठमाडौं उपत्यकामा आजदेखि १५ दिनलाई निषेधाज्ञा सुरु भएको छ । निषेधाज्ञाको पहिलो दिन बिहीबार उपत्यकाका सडकमा चहलपहल निकै घटेको छ । सडक क्षेत्रका पसलहरू खुलेका छैनन्  ।

चोकचोकमा बसेर प्रहरी र ट्राफिक प्रहरीले परिचयपत्र जाँचमा कडाइ गरेका छन् । सहरभित्रका मुख्य सडकहरूमा सवारी चाप घटे पनि कोटेश्वर, बल्खु, कलं‍कीलगायत नाकाहरूमा भने केही बेर ट्राफिक जाम पनि देखिएको छ । बुधबार बाहिरी जिल्लाबाट हिँडेका सवारी बिहान उपत्यका भित्रिएकाले पनि नाकाहरूमा चाप बढेको हो ।

निजी तथा सार्वजनिक सवारीसाधन चलाउन रोक लगाइएको छ भने अत्यावश्यकीय क्षेत्रका केही सवारीसाधन मात्र चल्न दिइएको छ । वैशाख मसान्तसम्म तोकिएको निषेधाज्ञा कडाइका साथ लागू गर्न उपत्यकाभित्र र बाहिरबाट प्रवेश गर्ने नाका तथा गौंडामा नेपाल प्रहरी र सशस्त्र प्रहरी टोलीलाई बाक्लो रूपमा तैनाथ गरिएको छ ।

सडकमा गुडेका सवारी नियमन र अनुगमन गर्न महानगरीय ट्राफिक प्रहरी महाशाखाले १ सय ७२ ठाउँमा नियमित चेक प्वाइन्ट र ५६ स्थानमा ‘ब्यारिकेड’ सहितको डेडिकेटेड चेक प्वाइन्ट स्थापना गरेको छ । निषेधाज्ञा पालना गराउनकै लागि उपत्यकामा ३ हजार ५ सयजति प्रहरी खटाइएका छन् । सडकमा चेक प्वाइन्ट, पिकेट, मोबाइल गस्ती, स्ट्राइकिङ, रिजर्भ र सादा पोसाकका सुरक्षाकर्मीलाई फरक–फरक भूमिकामा परिचालन गरिएको प्रहरीले जनाएको छ ।

अनुमतिवाहकले पनि सवारीमा देखिने गरी सेवा दिने क्षेत्र उल्लेख गरी परिचयपत्र भिरेर हिँड्नुपर्ने नियम बनाइएको छ । प्रहरी र सशस्त्रले निषेधाज्ञा उल्लंघन गर्नेलाई नियन्त्रणमा लिन काठमाडौं, भक्तपुर र ललितपुरका विभिन्न स्थानमा डोरी टाँगेर होल्डिङ सेन्टर बनाएका छन् । अत्यावश्यक सेवा र अनुमतिवाहकबाहेकका सवारी र पैदलै मानिसको आवागमन भए नियन्त्रणमा लिएर होल्डिङ सेन्टरमा राख्न तीनवटै प्रशासनले प्रहरी र सशस्त्रलाई निर्देशन दिएका छन् ।


प्रकाशित : वैशाख १६, २०७८ १०:०२
प्रतिक्रिया
पठाउनुहोस्

सुनसान कर्णाली किनार

गणेश चौधरी

टीकापुर — आन्तरिक पर्यटकले भरिभराउ रहने कर्णाली किनार कोरोना त्रासको कारण फेरि सुनसान बनेको छ । र्‍याफटिङ, पिकनिक गर्ने तथा कर्णाली चिसापानी पुलमा सेल्फी खिच्नेहरूको भीडभाड कोरोनाले गर्दा सुनसान बनेको हो । 

गत सालको चैतमा पनि लकडाउन भएपछि सुनसान बनेको कर्णाली किनार कोरोनाको जोखिम कम भएपछि आन्तरिक पर्यटकले गुल्जार हुँदै गएको थियो । दोस्रो चरणको कोरोना संक्रमणले फेरि कर्णाली किनारमा आन्तरिक पर्यटकको आगमन घटेर जस्तै बनेको हो । होटेल सिद्धार्थ कर्णाली चिसापानीका प्रबन्धक छत्र बोगटी कर्णाली घुम्न आउने बाँके बर्दियाका धेरै हुने र बाँकेमा लकडाउन भएपछि कर्णालीमा पर्यटक स्वतः घटेको बताउँछन् । उनले भने, ‘कोरोनाले फेरि पर्यटन व्यवसाय पुरै धराशायी हुने भो ।’

२०७८ को नयाँ वर्षको दिन चिसापानी पुलमा आन्तरिक पर्यटकको भरिभराउले सवारी साधन आउजाउमा पनि कठिनाइ भएको बोगटीले सुनाए । कर्णाली र्‍याफ्टिङ तथा एड्भेन्चरका सञ्चालक विष्णुप्रसाद जैसी र्‍याफ्टिङको सिजन यही हो तर कोरोनाले गेस्ट नै नआउने बताउँछन् । जैसीले भने, ‘विभिन्न थरीका रूख बोटविरुवा, फूल, चराचुरुङ्गी र जनावरको अध्ययन अवलोकनका लागि कर्णाली अति उत्तम छ ।’ उनले भने, ‘कर्णाली नदीमा र्‍याफटिङ सुरु भएर पर्यटकीय सम्भावनाको खोजी गरिएपछि आन्तरिक पर्यटक पनि दिनप्रतिदिन पर्यटक बढ्दै गएका हुन् । तर कोरोनाले सबैतिर बन्द हुँदै छ । पर्यटक नै आउँदैनन् ।’

प्राकृतिक दृश्य, नजिकै रहेको बर्दिया राष्ट्रिय निकुञ्ज तथा चराचुरुङ्गी तथा कर्णालीको स्वच्छ वातावरण पर्यटकका लागि आकर्षण हुन् । कर्णाली नदी किनारको चिसापानी बजारमा पाइने माछाका परिकारले पनि आन्तरिक पर्यटकलाइ कर्णाली किनार घुमफिर गर्न लोभ्याउने गर्थ्यो ।

कर्णाली नदी किनार जताततै पर्यटक आउन थालेका थिए । हुलाकी सडकमा रहेको कर्णाली पुलमा पनि पर्यटक रमाउने गरेका हुलाकी सडक किनारमा रहेको जीतु कटेजका सञ्चालक जीतराम चौधरीले बताए । ‘कर्णाली किनारमा आउने पर्यटक कर्णालीको पानी र माछाको स्वादमा पनि रमाउँछन्’, उनले भने, ‘कर्णाली किनारमा आउने पर्यटक कर्णालीको माछाको स्वाद नलिई फर्कंदैनन् । तर कोरोनाले मान्छेको आउजाउ नै बन्द छ । हामी होटल व्यवसायी पनि मारमा परेका छौं ।’

प्रकाशित : वैशाख १६, २०७८ ०९:३२
पूरा पढ्नुहोस्
प्रतिक्रिया
पठाउनुहोस्
×