कान्तिपुर वेबसाईट
AdvertisementAdvertisement

साताका ७ तस्बिर

कान्तिपुर संवाददाता

काठमाडौँ — यो साता हामीलाई उत्कृष्ट लागेका ७ तस्बिरहरु । सुकेका पातहरु बोरामा राखेर घर फर्कदै पर्सा हरपुरका बालिकाहरु । यसरी सुकेका पातहरु साँझ परेपछि लामखुट्टे तथा किरा फट्याङ्रा धपाउनको लागि घर वरिपरी उनीहरु बाल्ने गर्छन् । तस्बिर: अंगद ढकाल

राष्ट्रिय महिला लिग फुटबल प्रतियोगिताको विजेता टोली ससस्त्र प्रहरी क्लबका खेलाडीहरु लिगको अन्तिम दिन दशरथ रंगशालामा सेल्फी खिचेर खुसीयाली मनाउँदै । कूल सात टिमको सहभागी रहेको सो प्रतियोगितामा सबै १२ खेल जितेर ३६ अंकका साथ एपीएफ विजयी भएको थियो । तस्बिर : हेमन्त श्रेष्ठ

बैतडीमा १७ वर्षीया किशोरी भागरथी भट्टको बलात्कारपछि हत्याको विरोधमा शनिबार काठमाडौंको माइतीघरमा सांकेतिक प्रदर्शन गर्दै पद्मकन्या क्याम्पसका विद्यार्थीहरु । तस्बिर : केशव थापा

संसद् विघटनको विरोधमा नेकपा दाहाल नेपाल तर्फको अनेरास्वीयूले आर आर कलेज प्रर्दशनीमार्ग अगाडी टायर बालेर गरेको प्रर्दशनमा प्रहरीले हस्तक्षेप गर्दै । तस्बिर: प्रकाशचन्द्र तिमल्सेना

श्रीपञ्चमीका दिन स्वयम्भूस्थित सरस्वती मन्दिरको भित्तामा चकले लेख्दै एक बालक । सो दिन बालबालिकाहरुलाई अक्षर शुभारम्भ गर्ने चलन रहेको छ । तस्बिर : संजोग मानन्धर

ललितपुरको बुंगमतीमा भिरालो जग्गामा प्लटिङ गर्न एक्जाभेटरले सम्याउँदै । सरकारले तीन वर्षदेखि रोक लगाएको कित्ताकाट भदौ १६ गते खुलेसँगै गत साउनदेखि चैत्र सम्ममात्र करिब ६ लाख कित्ता काट भएको छ । तस्बिर :अनिश रेग्मी

प्रतिनिधिसभा विघटनको विरोधमा बृहत् नागरिक आन्दोलनले शुक्रबार काठमाडौंको टुँडिखेल वरपर मार्च पासमा सहभागीहरु नारा लगाउँदै । रत्नपार्क शंखधर साख्वा पार्कबाट सुरु भएको मार्च भद्रकाली, शहीद गेट हुँदै महांकाल मन्दिरमा पुगेर सभामा परिणत भएको थियो । तस्बिर: अंगद ढकाल

प्रकाशित : फाल्गुन ८, २०७७ १९:३९
प्रतिक्रिया
पठाउनुहोस्

कोभ्याक्स सुविधाको खोप आउँदै, २० प्रतिशत जनसंख्यालाई पुग्‍ने

रासस

काठमाडौँ — सरकारले यही फागुन महिनाभित्र कोभ्याक्स सुविधामार्फत कोभिड–१९ विरुद्धको ‘कोभिशिल्ड’ खोप ल्याउन अन्तिम तयारी गरेको छ । 

स्वास्थ्य तथा जनसंख्या मन्त्रालयले २० प्रतिशत जनसंख्यालाई पुग्ने गरी कोभ्याक्स सुविधामार्फत खोप ल्याउन लागेको हो । स्वास्थ्य सेवा विभाग, बाल स्वास्थ्य तथा खोप शाखा प्रमुख डा झलक शर्मा गौतमले आफूहरुले सबै प्रक्रिया पूरा गरिसकेकाले फागुन अन्तिमसम्म ‘कोभिशिल्ड’ खोप ल्याउन थालेको जानकारी दिए ।

उनका अनुसार २० प्रतिशतलाई दिइने भनेको खोप कोभ्याक्सले एकैपटक नभई पटकपटक पठाउने छ । विश्व स्वास्थ्य सङ्गठन, ग्लोबल भ्याक्सिन अलाइअन्स’ (गाभी) लगायत संस्थाले निम्न आय मुलुक भएका देशलाई निःशुल्क खोप उपलब्ध गराउने भएको छ ।

‘कोभिशिल्ड’ खोप विश्व स्वास्थ्य सङ्गठनमा सूचिकृत भएकोले नै कोभ्याक्सले सोही खोप पठाउन थालेको हो । यसअघि नेपालमा उक्त खोप लगाउन थालिएको छ । भारत सरकारले उपलब्ध गराएको १० लाख मात्रा ‘कोभिशिल्ड’ खोप गत माघ १४ गतेबाट लगाउन थालिएको हो । सरकारले अहिले स्वास्थ्यकर्मी, कर्मचारी र अग्रपङ्क्तिमा काम गरिरहेका कर्मचारीलाई खोप दिइरहेको छ ।

केही दिनअघि मात्र सरकारले कोभिशिल्ड २० लाख मात्रा खोप किन्ने प्रक्रिया अगाडि बढाइसकेको छ । उक्त खोप केही हप्तामा आउने आउने उनले बताए । सोही किनेको खोप यही फागुन २३ गतेदेखि ५५ वर्षभन्दामाथिका व्यक्तिलाई लगाइने भएको छ । यस्तै चीन सरकारले पनि सरकारलाई पाँच लाख मात्रा खोप उपलब्ध गराउने भएको छ । चीनले ‘भेरोसिल’ नामक खोप उपलब्ध गराउने भनेको छ । उक्त खोप औषधि व्यवस्था विभागले समेत सूचिकृत गरिसकेको छ ।

खोप सोमबारसम्म

यसैगरी पहिलो चरणको खोपअन्तर्गत दोस्रो प्राथमिकतामा परेका व्यक्तिलाई आगामी सोमबारसम्म खोप लगाइने भएको छ । आजसम्म मात्र खोप लगाइएकाले थप दुई दिन खोप लगाउने समय बढाएको खोप शाखाका प्रमुख डा गौतमले जानकारी दिए ।

दोस्रो चरणमा जिल्लास्थित सरकारी कार्यालयका कर्मचारी, स्थानीय तहका पदाधिकारी र कर्मचारी, वित्तिय संस्थाका कर्मचारी, पत्रकार र अग्रपङ्क्तिमा काम गर्नेलाई खोप लगाइरहेका छन् । उहाँका अनुसार अहिले तीन लाख ८४ हजार जनाले खोप लगाइसकेको छन् ।

प्रकाशित : फाल्गुन ८, २०७७ १८:५१
पूरा पढ्नुहोस्
प्रतिक्रिया
पठाउनुहोस्
×