प्रतिनिधिसभा विघटनविरुद्ध दाहाल-नेपाल समूहको शक्ति प्रदर्शन [तस्बिरहरू]

तस्बिर : अंगद ढकाल, तस्बिर : कविन अधिकारी

काठमाडौँ — नेकपाको दाहाल–नेपाल समूहले प्रतिनिधिसभा विघटनको विरोधमा शुक्रबार काठमाडौंमा विरोध प्रदर्शन सुरु गरेको छ । पार्टीका नेता–कार्यकर्ता उपत्यकाका विभिन्न ९ स्थानमा जम्मा भएर जुलुस निकालेका छन् ।

सबै र्‍यालीका सहभागीहरू नगर परिक्रमा गर्दै भृकुटीमण्डपमा भेला भएपछि विरोधसभा गर्ने तयारी छ । विरोधसभा अंग्रेजी अक्षर ‘टी’ आकारमा सञ्चालन गरिने जनाइएको छ । जुलुसका कारण उपत्यकाको ट्राफिक व्यवस्थापन अस्तव्यस्त बनेको छ

नेकपाले शुक्रबारको विरोधसभाका लागि निर्देशिका जारी गर्दै निर्धारित नाराहरू मात्र लगाउन कार्यकर्तालाई आग्रह गरेको थियो । माइतीघर, डिल्लीबजार, लैनचौर, त्रिपुरेश्वर, कुपन्डोल, प्रदर्शनीमार्ग, शान्तिवाटिका, त्रिचन्द्र कलेजबाट निकालिएका जुलुसलाई विभिन्न नेताले नेतृत्व गरेका छन् ।

विराेधसभामा अध्यक्षद्वय पुष्पकमल दाहाल र माधवकुमार नेपाल, वरिष्ठ नेता झलनाथ खनाल लगायतले सम्बोधन गर्दै छन् । विरोधसभामा एक लाख मानिस उतार्ने दहाल–नेपाल समूहको दाबी छ ।


प्रकाशित : माघ ९, २०७७ १३:५२
प्रतिक्रिया
पठाउनुहोस्

गण्डकी विश्‍वविद्यालयको रजिष्ट्रारमा तिमिल्सिना नियुक्त

प्रतिक्षा काफ्ले

गण्डकी — गण्डकी विश्वविद्यालयले लामो समयपछि रजिष्ट्रार पाएको छ । कुलपति प्रा.डा. गणेशमान गुरुङले एक कार्यक्रमबीच रजिष्ट्रार पदमा कैलाश तिमिल्सिनालाई नियुक्ति गरेका छन् ।

रजिष्ट्रारका लागि नौ जनाले दरखास्त दिएका थिए । विश्वविद्यालयको ऐनअनुसार उपकुलपतिको संयोजकत्वमा गठित सिफारिस समितिको सिफारिसको आधारमा तिमिल्सनालाई नियुक्ति गरिएको गण्डकी विश्वविद्यालयका प्रशासकीय प्रमुख घनश्याम पौडेलले जानकारी दिए ।

पर्वतको मोदी गाउँपालिका–२ घर भएका तिमिल्सिना विभिन्न प्राज्ञिक एवं शैक्षिक कार्यक्रममा संलग्न रहँदै आएका छन् । उनले थाइल्याण्डको माहिडुल विश्वविद्यालयबाट २०१९ मा विद्यावारिधि गरेका छन् ।

रजिष्ट्रारमा नियुक्त भएसँगै सँगै तिमिल्सिनाले गण्डकी विश्वविद्यालयका काम कारबाही तीव्र गतिमा अगाडि बढ्ने बताए । ‘रजिष्ट्रारबिना धेरै काम अधुरो हुन्छ,’ उनले भने, ‘विश्वविद्यालयमा चाहिने कुलपति, उपकुलपति र रजिष्ट्रार सबै जना भएपछि कामलाई तीव्र रुपमा बढाउन सकिन्छ । कतिपय रोकिएका काम पनि अब बिस्तारै गर्दै जाने हो ।’

प्रकाशित : माघ ९, २०७७ १३:३६
पूरा पढ्नुहोस्
प्रतिक्रिया
पठाउनुहोस्
×