कान्तिपुर वेबसाईट
AdvertisementAdvertisement

मनाइयो माघी [तस्बिरहरु]

तस्बिर : अंगद ढकाल

काठमाडौँ — बिहीबार थारु जातिको मुख्य पर्व माघी काठमाडौं लगायत देशभर मनाइएको छ । हरेक वर्ष माघको पहिलो दिन थारु जातिले माघी पर्व मनाउने गर्दछन् । यस वर्ष पनि काठमाडौं लगायत थारुहरुको बहुल्यता भएको विभिन्न ठाउँमा माघी पर्व मनाइएको छ । 

अघिल्ला वर्षहरुमा काठमाडौं लगायत विभिन्न ठाउँमा औपचारिक कार्यक्रम गरी धुमधाम र हर्सोल्लासका साथ माघी मनाइने गरिएको थियो । यसपाली भने कोभिड १९ संक्रमणका कारण देशभर सानो समुहमा अथवा परिवारभित्र मात्रै माघी पर्व मनाईएको छ । माघीमा मिठो मिठो परिकारहरु बनाएर खाने प्रचलन छ । यस पर्वमा मौलिक परिकारहरु चिचर(भत्कुन), सितुवा, घुँगी, हाँसको मासु लगायतका परिकारहरु बनाएर खाने गरिन्छ भने आफ्नो कला, संस्कृति झल्किने पोषाक लगाएर धुमधामसाग माघी मनाइने गरिन्छ । 

माघीको दिन नुहाएर तिलको आगो ताप्नाले वर्षभरिको पाप पखालिन्छ भन्ने मान्यता थारू समुदायमा रहेको छ । यस दिनमा नुहाएर दाल, चामल छोएर मान्यजनसँग आर्शिवाद लिने गरिन्छ । माघीलाई एक आपसमा सम्बन्ध प्रगाढ बनाउने पर्वको रुपमा पनि लिने गरिन्छ । यस दिनमा आफ्ना चेलिबेटीहरुलाई उपचार दिने र चेलिबेटीसँगको सम्बन्धलाई सुदृढ बनाउने गरिन्छ । थारु जातिले माघी पर्वलाई नयाँ वर्षको दिनको रुपमा लिने गर्दछन् भने यस दिनदेखि नयाँ कामको सुरुवात गर्ने प्रचलन पनि रहेको छ । माघीको दिनमा गाउँ समाजको नयाँ अगुवा चुन्ने तथा घरसल्लाह गर्ने काम पनि गरिन्छ । 


प्रकाशित : माघ १, २०७७ १७:२९
प्रतिक्रिया
पठाउनुहोस्

दाहाल–नेपाल समूहको स्थायी कमिटी बैठक, आन्दोलनको स्वरुप परिवर्तनबारे छलफल

कान्तिपुर संवाददाता

काठमाडौँ — नेकपाको पुष्पकमल दाहाल र माधवकुमार नेपाल समूहको स्थायी कमिटी बैठक कोटेश्वर पेरिसडाँडामा जारी छ । प्रतिनिधिसभा विघटनपछि पनि सांगठनिक रुपमा नेकपाको केपी ओली समूह आक्रमक रुपमा देखिएपछि दाहाल–नेपाल समूहले आन्दोलनको स्वरुप बदल्ने तयारी थालेको हो । 

पुस ५ मा प्रधानमन्त्री ओलीले प्रतिनिधिसभा विघटन गरेपछि यो समूहले पहिलो चरणको आन्दोलन सकेर पुस १८ मा दोस्रो चरणको आन्दोलन घोषणा गरेको थियो । आन्दोलनका कार्यक्रमअन्तर्गत पुस २० देखि माघ २३ गतेसम्म प्रधानमन्त्रीलाई विरोध पत्र बुझाउने, गाउँ गाउँमा कालो झन्डा गाड्ने, सरोकारवाला पक्षसँग अन्तक्रिया, प्रदर्शन लगायत थिए ।

तर, दोस्रो चरणको आन्दोलन अन्तर्गतका कार्यक्रमले उपस्थिति कमजोर देखिएको बुझाई पछि यो समूहले ‘देखिने’ खालका कार्यक्रम ल्याउने तयारी गरेको छ । त्यसकै लागि स्थायी कमिटी बैठक बसेको दाहालका प्रेस संयोजक विष्णु सापकोटाले जानकारी दिए ।

आन्दोलनको स्वरुप र कार्यक्रम परिवर्तन गर्ने विषयमा पुस २६ को सचिवालय बैठकमा पनि छलफल भएको थियो । यो समूहको स्थायी कमिटी बैठक पुस १९ र २० गते पनि बसेको थियो । प्रतिनिधिसभा विघटनपछि नेकपाको यो समूहसहित प्रमुख प्रतिपक्षी कांग्रेस, जनता समाजवादीलगायतका दलहरु छुट्टाछुट्टै सडक आन्दोलनमा छन् ।

प्रकाशित : माघ १, २०७७ १७:२५
पूरा पढ्नुहोस्
प्रतिक्रिया
पठाउनुहोस्
×