नयाँ वर्षलाई स्वागत : कतै भीड, कतै सुनसान [२१ तस्बिर]

२०१९ को डिसेम्बरमा चीनबाट फैलिएको कोरोना अझै नियन्त्रणमा नआउँदा विभिन्न मुलुकले बर्सेनि भव्यतापूर्वक मनाउने नयाँ वर्षको स्वागतका कार्यक्रम यो पल्ट स्थगन गरे ।

विश्वका धेरै मुलुकमा नयाँ वर्षका कार्यक्रम स्थगित गरिए पनि कोरोना भाइरसको इपिसेन्टर मानिएको चीनको वुहानमा भने भव्यताका साथ नयाँ वर्षलाई स्वागत गरिएको छ । नयाँ वर्षलाई स्वागत वुहानको हांको कस्टम हाउस अगाडि नयाँ वर्ष मनाउन भीड जम्मा भएको थियो । कोरोना महामारीका कारण हुबेई प्रान्तको वुहानमा गत वर्षको जनवरीको अन्त्यदेखि अप्रिलको सुरुवातसम्म लकडाउन गरिएको थियो ।

अमेरिकाको जोन्स हप्किन्स विश्वविद्यालयका अनुसार २०२० को अन्तिम दिन बिहीबारसम्म कोरोनाबाट ८ करोड २६ लाख ६६ हजार व्यक्ति संक्रमित भए । यीमध्ये १८ लाख ८ हजार १ सय जनाको मृत्यु भयो भने ५ करोड ९७ लाख ६० हजार जना संक्रमणमुक्त भएका छन् । स्वीकृति पाएका विभिन्न कम्पनीबाट उत्पादित कोरोना प्रतिरोधी खोप अमेरिका, रसिया, चीन र क्यानडापछि युरोपमा २७ मुलुकमा लगाउन सुरु भएको छ ।