कान्तिपुर वेबसाईट
AdvertisementAdvertisement

हनुमान ढोकाको दसैं घरमा जमरा राखियो [तस्बिरहरु]

तस्बिर : सन्जोग मानन्धर

काठमाडौँ — नवरात्रको पहिलो दिन घटस्थापनाको अवसरमा घरघरमा दसैंको जमरा राखिएको छ । दसैंको पहिलो दिन घटस्थापनाका अवसरमा घरघरमा जमरा राख्‍ने गरिन्छ । यही अवसरमा काठमाडौंको हनुमान ढोकास्थित नासल चोकमा रहेको दसैंघरमा पनि जमरा राखिएको छ ।

बिहानै नित्यकर्म गरी नजिकको नदी वा चोखोस्थलबाट बालुवा वा माटो ल्याइ गाईको गोबरले लिपपोत गरिएको कोठामा वा दसैंघरमा जमरा रोप्ने गरिन्छ । घटस्थापना गर्दा पूजाकोठा वा दसैं घरमा विधिपूर्वक दियो, कलश र गणेश स्थापना गरी वैदिक विधिपूर्वक शक्तिकी अधिष्ठात्री दुर्गाको आह्वान गरी पूजा आरम्भ हुन्छ ।

नवरात्रभर दुर्गाका तीन रुप महाकाली, महालक्ष्मी र महासरस्वतीको विधिपूर्वक पूजाराधना गरिन्छ । महाकाली शक्ति, महालक्ष्मी धनधान्य र ऐश्वर्य तथा महासरस्वतीलाई विद्या र बुद्धिको प्रतिकका रुपमा पूजाराधना गर्ने वैदिक कालदेखिको परम्परा छ ।


प्रकाशित : कार्तिक १, २०७७ १४:०९
प्रतिक्रिया
पठाउनुहोस्

थकालीले दिए ९ सय परिवारलाई खाद्यान्न

एलपी देवकोटा

जुम्ला — गुठिचौर गाउँपालिका–१ र २ का ९ सय परिवारलाई स्थानीय युवाले व्यक्तिगत खर्चमा दसैंका लागि खाद्यान्न वितरण गरेका छन् । गुठिचौर गाउँपालिकाका कार्यपालिका सदस्य जनक थकालीले सबै परिवारलाई २० किलो चामल र १ प्याकेट तेल उपलव्ध गराएका हुन् ।

कोरोना महामारीका कारण विपन्न परिवारलाई जीविकोपार्जनमा समस्या भएपछि उनले २३ लाख रुपैयाँको खाद्यान्न वितरण गरेका हुन् । ‘गुठिचौरका अधिकांश बासिन्दाको मुख्य आयस्रोत जडिबुटी हो,’ उनले भने, ‘कोरोना महामारीका कारण जडिबुटी संकलनमा रोक लगाइँदा सबैजसो घरमा जीविकोपार्जनमा समस्या देखिएपछि खाद्यान्न वितरण गरेको हुँ ।’ उनी जडिबुटी व्यावसायीसमेत हुन् ।


उनले संकटको बेला स्थानीयलाई सहयोग गरेको बताए । उनका अनुसार आम्दानी नहुँदा विपन्न परिवारलाई दसैंमा भात खान पनि समस्या देखिएको थियो । थकालीले उपलव्ध गराएको सामग्री गाउँपालिका अध्यक्ष हरीबहादुर भण्डारी, उपाध्यक्ष जानदेवी ऐडी, नेकपा जिल्ला सचिवालय सदस्य आदीप्रसाद न्यौपाने, नेपाली कांग्रेसका गाउँपालिका सभापति अर्जुन महतारालगायतले स्थानीयलाई हस्तान्तरण गरे ।


जडिबुटी टिप्न नपाउँदा यस वर्ष आम्दानी शून्य बनेको स्थानीय मनबहादुर ऐडीले वताए । ‘यति ठूलो राहत कसैले दिएका थिएनन्,’ उनले भने, ‘राहत पाएपछि ९ सय परिवारमा खुसी छाएको छ ।’ उनको कार्यले स्थानीय सरकारलाई समेत चुनौती दिएको स्थानीय अगुवा अर्जुन महताराले बताए ।

प्रकाशित : कार्तिक १, २०७७ १४:०२
पूरा पढ्नुहोस्
प्रतिक्रिया
पठाउनुहोस्
×