मत्स्येन्द्रनाथको रथ सोह्रखुट्टे पाटी पुर्‍याइयो [तस्बिरहरु]

प्रशान्त माली, तस्बिर : हेमन्त श्रेष्ठ, तस्बिर : इलिट जोशी

काठमाडौँ — रातो मत्स्येन्द्रनाथको रथ आइतबार पुल्चोकबाट तानेर त्यही अवस्थित स्तुपा नजिक सोह्रखुट्टे पाटीसम्म पुर्‍याइएको छ । मीननाथको रथ पनि गा:बहालबाट तानेर पुल्चोक ल्याइएको छ ।

अब २२ गते सोमबार पाटनबासीले भु:ज्या (मत्स्येन्द्रनाथ यात्राको क्रममा मनाइने एक प्रकारको पर्व) मनाउने अनि साइत हेर्ने र साइत प्राप्त भएमा २६ गते मत्स्येन्द्रनाथलाई रथबाट ओरालेर सानो खटमा राखेर बुङमती पुर्‍याइनेछ । साइत जुरेकै दिन मीननाथको रथ पनि पुल्चोकबाट तानेर उनकै टंगल टोलस्थित मन्दिरमा पुर्‍याइनेछ ।

पाटनमा रातो मत्स्येन्द्रनाथ जात्रा विषेश गरी चार तवरबाट मनाइन्छ । पहिलो गा:बा: या: भनी रथ पुल्चोकबाट पाटन गा:बहाल पुगेपछि, नुग: या: भनी सुन्धारा, लग: या भनी लगनखेल र जावला या: भनी जावलाखेल पुगेपछि जात्रा गरिन्छ । लगनखेलमा रथको टुप्पोबाट नरिवल खसालिन्छ भने जावलाखेलमा भोटो देखाइन्छ ।

तर, कोभिड–१९ को कारणले यस वर्ष चारै तवरबाट मनाइने जात्रा पुल्चोकमा एकै पटक मनाइएको हो । रथ यात्रामा गुरुजु पल्टन, ललितपुरका १७ औं शताब्दीका राजा सिद्धिनरसिंह मल्लको ऐतिहासिक खड्गलाई भने राजकीय सम्मानका साथ समारोहस्थलमा पुर्‍याइएको छ ।जात्रामा अनिवार्य ल्याउनुपर्ने इन्द्रबाजा र गा:बहाल, सुनधारा, लगनखेल, जावलाखेलका धिमे बाजा सहभागी गराइएको थियो । मत्स्येन्द्रनाथ रथ यात्रामा सहभागी भएमा स्वर्गलोक, मत्र्यलोक भ्रमण तुल्य मानिने विश्वास गरिन्छ ।


प्रकाशित : भाद्र २१, २०७७ १८:०९
प्रतिक्रिया
पठाउनुहोस्

हेलिकप्टरबाट नवजात शिशुको उद्धार

अनिश तिवारी

सिन्धुपाल्चोक — हेलम्बु गाउँपालिका २ इचोकको बर्थिङ सेन्टरमा आइतबार जन्मिएको शिशुको श्वासप्रश्वासमा समस्या देखिएपछि हेलिकप्टरबाट उद्धार गरी काठमाडौं लगिएको छ । 

हेलम्बु १ की ३१ वर्षीया फुर्पा डोल्मा शेर्पाको नवाज शिशुलाई स्वास्थ्यकर्मीको सल्लाहनुरुप तत्कालै हेलिकप्टरबाट थप उपचारर्थ पठाइएको हो । लामो समयसम्म व्यथा लागेर आइतबार बिहान ९ बजेर ५ मिनेट जाँदा फुर्पाले जन्माएकी शिशुलाई एक्कासी श्वासप्रश्वासमा समस्या देखिएको थियो ।

एम्बुलेन्सबाट लैजान ढिलो हुने देखिएपछि हेलिकप्टरबाट उद्धार गरिएको हेलम्बु गाउँपालिकाका अध्यक्ष निमाग्याल्जेन शेर्पाले बताए । ‘बच्चा जन्मिएको केही समयमै यस्तो समस्या देखिएपछि स्वास्थ्यकर्मीको सल्लाह लियौं, एम्बुलेन्सबाट लैजाँदा ढिलो हुने भएपछि हेलिकप्टर बोलाएर कान्ति बाल अस्पताल पठायौं,’अध्यक्ष शेर्पाले भने ।

दुर्गम क्षेत्रमा सुत्केरी हुन नसकेकाहरुको सरकारले नि:शुल्क उद्धार गरी अस्पताल पुर्‍याउने भए पनि बच्चाको उद्धार नर्गर्ने भएकाले गाउँपालिकाको खर्चमा कैलाश हेलिकप्टरबाट काठमाडौं लगिएको उनले प्रष्ट्याए ।

प्रकाशित : भाद्र २१, २०७७ १७:५४
पूरा पढ्नुहोस्
प्रतिक्रिया
पठाउनुहोस्
×