बकर इदमा सुनसान जामे मस्जिद [तस्बिरहरु]

तस्बिर : सन्जोग मानन्धर

काठमाडौँ — आज (शनिबार) मुस्लिम धर्मावलम्बीहरुको बकर इद (इदुल जोहा) हो । बकर इदको दिन नेपाली जामे मस्जिद, काश्मिरी मस्जिदलगायत देशभरका मस्जिद र इदगाहमा मुस्लिम धर्मावलम्बीको भीड लाग्ने गरेको भएपनि कोरानाका कारण यो वर्ष भने सुनसान देखिएको छ ।

विश्वव्यापी बनेको कोरोना संक्रमणको जोखिमलाई मध्यनजर गर्दै मुस्लिम समुदायले घरघरमै नवाज पढेर बकर इद मनाएका छन् । राष्ट्रिय मुस्लिम आयोगले बकर इदमा घरघरमै बसेर नवाज पढ्न आग्रह गरेको थियो ।

रमजान पर्वको ७० औं दिनमा मनाइने मुस्लिम समुदायको दोस्रो महान पर्व बकर इदमा बिहानै स्नान गरी नजिकैको मस्जिद वा इदगाहमा गइ सामूहिक नमाज पढ्छन् । नमाज पढिसकेपछि एक आपसमा अंकमाल गर्दै शुभकामना आदान प्रदान गर्ने गर्छन् ।

इदका अवसरमा मक्का मदिना जानु शुभ मानिने भए पनि यस वर्ष कोरोनाका कारण अन्तर्राष्ट्रिय उडानसमेत बन्द रहेको छ । जसका कारण हजयात्री मक्का मदिना जान पाएका छैनन् । यस पर्वमा अल्लाहलाई खुशी पार्न मुसलमानले धर्मले जायज मानेका जनावरलाई कुर्बानी (बलि) दिने गर्दछन् ।


प्रकाशित : श्रावण १७, २०७७ १३:३५
प्रतिक्रिया
पठाउनुहोस्

उपरथी हमालले सम्हाले यूएन फोर्स कमान्डको जिम्मेवारी

कान्तिपुर संवाददाता

काठमाडौँ — नेपाली सेनाका उपरथी ईश्वर हमाल संयुक्त राष्ट्र संघ (यूएन) को फोर्स कमान्डरको भूमिका निर्वाह गर्न सिरिया पुगेका छन् ।

सिरियास्थित संयुक्त राष्ट्र संघ डिसइनगेजमेन्ट अब्सर्भर फोर्स मिसनको प्रमुखको रुपमा उनले जिम्मेवारी सम्हालेका हुन् । हमालले साउन १२ गतेदेखि जिम्मेवारी सम्हालेका हुन् ।

सैनिक मुख्यालयले जारी गरेको विज्ञप्तिअनुसार हमालले कार्यभार सम्हाल्दै मिसनका लक्ष्यहरु हासिल गर्नु आफ्नो पहिलो प्राथमिकता रहेको बताएका थिए । साथै, हमालले सबैको सहयोगको अपेक्षा रहेको पनि बताएका थिए । संयुक्त राष्ट्र संघका महासचिव एन्टोनियो गुटेरेसले हमाललाई फागुन १२ मा उक्त पदमा नियुक्त गरेका थिए । यूएन मिसनको प्रमुख अर्थात् फोर्स कमान्डरको भूमिका पाउने हमाल छैँटौं नेपाली सैनिक अधिकारी हुन् ।

प्रकाशित : श्रावण १७, २०७७ १२:५८
पूरा पढ्नुहोस्
प्रतिक्रिया
पठाउनुहोस्
×