चकमन्‍न काठमाडौं उपत्यका [तस्बिरहरु]

कान्तिपुर संवाददाता

काठमाडौँ — कोरोना भाइरस (कोभिड १९) रोक्‍न सरकारले घोषणा गरेको लकडाउन आज (बिहीबार) तेस्रो दिन । काठमाडौं उपत्यकाका बिहानैदेखि प्राय: स्थान सुनसान छ । सरकारले अस्पताल, खाद्यान्‍न किनबेच, सञ्‍चार तथा सूचना लगायतमा खुकुलो गरे पनि अरु गतिविधि बन्द गर्न भनेको छ । लकडाउन उल्लंघन हुने भन्दै चक्रपथका हरेक चोकमा सशस्त्र प्रहरी र ट्राफ्रिक प्रहरी परिचालित छन् । अघिल्लो २ दिनको तुलनामा बिहीबार मान्छेहरु सडक र चोकहरुमा कम निस्किएका छन् । सरकारले विश्‍वभरी महामारीको रुपमा फैलिएको कोरोना भाइरस नियन्त्रणका लागि भन्दै मंगलबार बिहान ६ देखि एक हप्ताका लागि देशव्यापी लकडाउन आह्‍वान गरेको छ । विश्‍वभर कोरोनाबाट अहिलेसम्म २१ हजारको हाराहारीमा मानिसको ज्यान लिइसकेको छ भने लाखौं संक्रमित छन् । कान्तिपुरकर्मी दीपेन्द्र रोकाले लकडाउनको तेस्रो दिन चक्रपथ देखिएको गतिविधि तस्बिरमा कैद गरेका छन् ।

प्रकाशित : चैत्र १३, २०७६ १५:२२
प्रतिक्रिया
पठाउनुहोस्

सबै प्रदेशमा कोरोना परीक्षण प्रयोगशाला स्थापना गर्न सांसद गिरीको माग 

'प्रदेश २ मा सरकारले गोप्यरुपमा सेना परिचालन गर्‍यो'
कान्तिपुर संवाददाता

काठमाडौँ — संघीय समाजवादी पार्टीकी सांसद सरिता गिरीले प्रत्येक प्रदेशमा कोरोना भाइरस (कोभिड-१९) परीक्षण प्रयोगशाला स्थापना गर्न माग गरेकी छन् ।

प्रतिनिधिसभा बैठक स्थगित भइरहेको अवस्थामा प्रेस विज्ञप्ति जारी गर्दै सांसद गिरीले सरकारमाथि स्वास्थ्य सामाग्री स्वास्थ्यकर्मीलाई उपलब्ध नगराइ भण्डारण गरेर राखेको आरोप पनि लगाएकी छन् ।

सरकारले गरेको 'लकडाउन'को समर्थन गर्दै सांसद गिरीले माग गरेकी छन्, 'प्रत्येक प्रदेशमा कोरोना भाइरस टेस्ट सेन्टर स्थापना गर्नुपर्छ । स्वास्थ्यकर्मीका लागि पीपीई लगायतका सामग्री उपलब्ध गराउनुपर्छ ।' उनले प्रतिनिधिसभाको बैठक बोलाउनुपर्ने माग पनि राखेकी छन् । प्रतिनिधिसभा बैठक २३ गते आइतबारसम्मका लागि स्थगित गरिएको छ ।

गिरीले विश्व स्वास्थ्य संगठन, चीन लगायतका दाताबाट कति रकम र स्वास्थ्य सामाग्री सहयोग आएको हो भन्नेबारे पत्रकार सम्मेलन गरेर गराउन माग गरेकी छन् । खर्चको विवरण पनि सार्वनिक गर्नुपर्ने उनको माग छ ।

प्रदेश २ मा सरकारले गोप्य रूपमा सेना परिचालन गरेको सांसद गिरीको आरोप छ । 'सरकारले गोप्य तवरले प्रदेश २ मा सेना परिचालन गरी संविधानको हननसमेत गरेको छ,' उनको माग छ, 'प्रदेश २ मा सेना परिचालन अन्त्य गरी साधान स्रोतको खर्च स्वास्थ्य क्षेत्रमा गर्नुपर्ने ।'

प्रदेश २ मा कोरोना भाइरस परीक्षण प्रयोगशाला स्थाना नगर्ने संघीय सरकारको निर्णय त्रुटिपूर्ण रहेको सांसद गिरीको भनाइ छ । सरकारले ठूलो र गरिब जनसंख्या भएको प्रदेशलाई बेवास्ता गरेको उनको भनाइ छ ।

जिल्लामा आइसोलेसन र क्वारेन्टाइनमा राखिएकाहरूको उपचार हुन नसकेको गिरीको भनाइ छ । 'काठमाडौं बाहिर धेरै जिल्लाहरूका कैयौं व्यक्तिहरूलाई संक्रमणको आशंकामा क्वारेन्टाइन र आइसोलेसनमा राखिएको छ तर जिल्लाहरूमा आइसोलेसन वार्डमा शंकाको दायरामा राखिएका व्यक्तिहरूको रगत अथवा घाँटीको स्वाब निकाली टेस्ट गर्ने अवस्था छैन,' उनले भनेकी छन्, 'जिल्लाबाट आवश्यक मात्रामा स्याम्पल पठाउन सकिएको छैन । अनुमानको भरमा काठमाडौं रेफर गर्नुपर्ने बाध्यता आएको छ ।'

बिरामीलाई काठमाडौं ल्याउन सहज नभएको र ल्याए पनि उपचार हुने सुनिश्चितता नरहेको गिरीको भनाइ छ । सरकारले कोरोना फैलिएको तीन महिनामा कुनै काम नगरेको सांसद गिरीको भनाइ छ । 'यो समग्र अवस्था अत्यन्त चिन्ताको विषय हो । यसले प्रष्ट हुन्छ सरकारले विगतको तीन महिना सपना हेर्दै वा प्रचारबाजीमा नै अमूल्य समय बिताएको छ । सरकारले पूर्वानुमानको आधारमा इमानदार भइ गम्भीरतापूर्वक कुनै पूर्वतयारी गरेको छैन । सरकारको असक्षमता सबैका उजागर भइसकेको छ,' उनले भनेकी छन् ।

सरकारले कोरोनाको शंका लागेका व्यक्तिलाई आइसोलेसनमा राखेर नियतीको भरमा छोडेको उनको भनाइ छ । सरकारले गैरजिम्मेवारीपनको पराकाष्ठा नाघेको उनको भनाइ छ । आशंका गरिएका व्यक्ति र उनीहरूको सम्पर्कमा गएकाको कोरोना भाइरस परीक्षण गर्नुपर्ने उनको माग छ ।

चिकित्सक र नर्सहरूलाई तत्काल स्वास्थ्य सामाग्री तथा पीपीई उपलब्ध गराउन सरकारसँग सांसद गिरीले माग गरेकी छन् ।

प्रकाशित : चैत्र १३, २०७६ १५:२२
पूरा पढ्नुहोस्
प्रतिक्रिया
पठाउनुहोस्
×