लिग २ मा नेपालको पहिलो जित

विनोद पाण्डे

काठमाडौँ — नेपालले क्रिकेट विश्वकप लिग २ मा पहिलो विजय हात पारेको छ । घरेलु मैदानमा एकदिवसीय अन्तर्राष्ट्रिय विजय हात पार्ने क्रममा नेपालले शनिबार अमेरिकालाई ३५ रनले पराजित गर्‍यो । 


१ सय ९१ रनको विजय लक्ष्य लिएर आएको अमेरिका ४४.१ ओभरमा १ सय ५५ रनमा अलआउट भयो । यसअघि त्रिवि क्रिकेट मैदानमा टस हारेर ब्याटिङ गर्न आएको नेपाल ओभरमा १ सय ९० रनमा अलआउट भएको थियो ।


इयान हल्यान्डले ७५ रन बनाए पनि अमेरिकालाई विजय दिलाउन सकेनन् । उनले १ सय ११ बलको इनिङ्समा ७ चौका प्रहार गरे । ६५ रन बनाउँदा ७ विकेट गुमाएको अमेरिकाबाट क्यामरन स्टेभनसनले १९ रन बनाए । नेपालबाट करण केसीले ४, सुसन भारीले ३, सन्दीप लामिछानेले २ र कुशल मल्लले १ विकेट लिए ।


यस त्रिकोणात्मक शृंखलामा नेपालको यो पहिलो जित हो । नेपाल र अमेरिका दुवैलाई उनीहरुको पहिलो खेलमा ओमानले पराजित गरेको थियो । यसअघिका ९ खेलमा ६ विजय हात पार्दै ७ राष्ट्र सहभागी प्रतियोगिताको शीर्ष स्थानमा रहेको अमेरिकाले पछिल्ला दुवै खेलमा हार व्यहोरेको छ ।


यसअघि कुशल मल्लले विश्व कीर्तिमान बनाउँदै अर्धशतकीय इनिङ्स खेलेका थिए । ४९ रनमा ५ विकेटको दयनीय स्थितिलाई सुधार्नेक्रममा विनोद भण्डारीले पनि अर्धशतक बनाएका थिए । कुशलले ५० र विनोदले ५९ रन बनाएपछि नेपालले ४९.२ ओभरमा १ सय ९० रनमा अलआउट भएको थियो ।


कुशलको यो डेब्यु खेल हो । उनले १५ वर्ष ३ सय ४० दिनको दिनमा अर्धशतक बनाउँदै एकदिवसीय अन्तर्राष्ट्रियमा सबैभन्दा कम उमेरमा ५० रन पुरा गर्ने खेलाडी बनेका हुन् ।


उनलाई शनिबार रोहित पौडेलको स्थानमा खेलाइएको थियो र रोहितले एक वर्षअघि दुबईमा युएईविरुद्ध सबैभन्दा कम उमेरमा अर्धशतक बनाएको कीर्तिमानलाई कुशलले उछिनेका हुन् ।


कुशलले ५१ बलको इनिङ्समा ४ चौका र ३ छक्का प्रहार गरे । उनले विनोदसँग छैटौं विकेटमा ८४ रनको महत्वपूर्ण साझेदारी गरी नेपाललाई खेलमा फर्काएका थिए ।


विनोदले ७९ बल खेली ६ चौका र १ छक्का प्रहार गरेका थिए । उनीपछि आएका करण केसी १२ रनमा आउट भए भने सन्दीप लामिछाने शुन्यमा पेभेलियन फर्किए । सुसन भारी आउट हुने अन्तिम खेलाडी थिए । उनले ११ रन बनाए । अविनाश बोहरा ५ रनमा अविजित रहे ।


यसअघि नेपाल २२ औं ओभर नेपालले ४९ रन बनाउदा ५ विकेट गुमाइसकेको थियो । नेपालबाट ३ रनको अन्तरमा ४ विकेट गुमाएपछि दबाबमा आएको हो । कप्तान ज्ञानेन्द्र मल्ल र पारस खड्काले दोस्रो विकेटमा ४० रनको साझेदारी गरेपछि नेपाल १ विकेट गुमाई ४६ रनको स्कोरमा पुगेको थियो ।


तर त्यसपछि ज्ञानेन्द्र २१, दीपेन्द्र ऐरी शुन्य, पूर्वकप्तान पारस १९ र आरिफ शेख २ रनमा आउट भएपछि नेपाल नाजुक स्थितिमा पुगेको थियो। ओपनर सुवास खकुरेल ३ रनमा यसअघि नै आउट भइसकेका थिए । प्रकाशित : माघ २५, २०७६ १७:११

प्रतिक्रिया
पठाउनुहोस्

मानव अधिकार आयोगकै अधिकार संकटमा : अन्सारी

कान्तिपुर संवाददाता

काठमाडौँ — राष्ट्रिय मानव अधिकार आयोगको अधिकार नै संकटमा रहेको आयोगकी सदस्य मोहना अन्सारीले बताएकी छन् । कान्तिपुर कनक्लेभमा बोल्दै अन्सारीले विभिन्न कारणले मानव अधिकारको अधिकार नै संकटमा परेको बताएकी हुन् ।

सरकारले केही पहिले ल्याएको मानव अधिकारसम्बन्धि विधेयकमा अधिकार कटौती गरिएको तर्फ इंगित गर्दै उनले आयोगको अधिकार संकटमा परेको बताएकी हुन् ।

मानव अधिकार आयोगको वर्तमान अवस्थाबारे उनले भनिन्, 'मानव अधिकार आयोग द्वन्द्वकालमा र ज्ञानेन्द्रको प्रत्यक्ष शासनमा यति कमजोर थिएन जति अहिले त्यसमा कमि ल्याउन खोजिएको छ ।'

सरकार जनतातर्फ फर्किनुपर्नेमा शक्ति आर्जनतिर लागेको अन्सारीको भनाइ थियो । उनले भनिन्, 'सरकार जनतातिर फर्किनुपर्ने हो तर शक्तिआर्जनतिर फर्किँदै छ । झिँगा मार्नका लागि बन्दुक पड्काउने भन्ने कहावत फेरि याद आएको छ ।'

कानुन निर्माणमा संसदभन्दा पनि कर्मचारीतन्त्र हाबी भएकाले पनि जनताका मौलिक अधिकार र हक संकुचन भइरहेको उनको भनाइ थियो । 'मौलिक हकसम्बन्धि जति पनि कानुन बन्दैछन् तिनमा कर्मचारीतन्त्र हाबी भइरहेका छन्,' उनले भनिन् ।

नेपाल दुई पाइला अगाडि बढेको तर त्यसको तुलनामान दुई कदम पछाडि गइरहेको पनि उनको भनाइ थियो । मुलुकमा बेरोजगारी, भ्रष्टाचार, गैरन्यायीक थुना लवगायत यावत कुराले व्यापकता पाइरहेको अन्सारीको भनाइ थियो ।

मुलुकमा बेरोजगारिको अवस्था जर्जर रहेको र युवाहरूले आफ्नो भविष्य मुलुकमा नभएर खाडीमा देखिरहेको अन्सारीको भनाइ थियो । उनले हरेक नागरिकले आफू असुरक्षित रहेको महसुसर गरेको बताइन् ।

प्रकाशित : माघ २५, २०७६ १७:०४
पूरा पढ्नुहोस्
प्रतिक्रिया
पठाउनुहोस्
×