माघीका लागि तयार हुँदै चिच्चर (फोटोफिचर) 

रमेशकुमार पौडेल

चितवन — थारु समुदायका लागि माघे संक्रान्ति अर्थात माघी विशेष पर्व हो । उनीहरु यसलाई नयाँ वर्षका रुपमा मनाउँछन् । चितवनको दक्षिणी क्षेत्रमा पर्ने माडी नगरपालिका पनि जिल्लाको थारु बहुल इलाका हो । त्यसैले माडीलाई माघीले छपक्कै छोपेको छ । माघीको विशेष खाना हो चिच्चरको पोका र माछा । चिच्चर अनदीको चामलबाट बनेको नरम भात हो ।

अरु ठाउँमा अनदीको चामललाई घ्युमा भुटेर दुध वा पानीमा पकाएर चाम्रे वा लट्टे बनाएर खाने चलन छ । तर थारु समुदायले अनदीको चामललाई बाफमा पकाउँछन् । पकाउनुअघि राम्रोसँग भिजाउँछन् । कसौंडीमा पानी तताएर त्यसमाथि अर्को भाडो राखेर मोमो जसरी चिच्चर पकाउने गरिन्छ । त्यसरी पकाएको भातलाई जंगलबाट ल्याएको भोर्लाको पातमा पोको पारेर भोलिपल्ट माघे संक्रान्तिमा खाने चलन छ ।

माडी नगरपालिकाका उपमेयर ताराकाजी महतो चिच्चर पोका आगोमा पोलेर खाने चलन रहेको बताउँछिन् । माछा पनि अघिल्लो दिन नै पकाएर राख्ने र भोलिपल्ट खाने चलन छ । पहिला पहिला चिसै बासी माछा खाने गरिन्थ्यो । बासी कुरा त्यसै खानु राम्रो नहुने भनेर अचेल तताएर खाने गरेको उपमेयर महतोले बताइन्  ।  चिच्चर पोका पोलेर खाँदा जाडोमा शरीर तान्ने अनुभव गरेको थारु समुदायका पाका व्यक्तिहरु बताउँछन् ।  

प्रकाशित : पुस २९, २०७६ १८:४२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

वर्षा र हिमपहिरोले पाकिस्तानमा मृत्यु हुनेकाे संख्या ८२ पुग्याे [अपडेट]

अफगानिस्तानमा ३९ ले ज्यान गुमाए
एजेन्सी

पाकिस्तानका विभिन्न क्षेत्रमा तीन दिनकाे भारी वर्षा र हिमपहिरोका कारण मृत्यु हुनेकाे संख्या ८२ पुगेकाे छ । पाकिस्तानको दैनिक पत्रिका 'डन'का अनुसार मौसमको खराबीका कारण बलुचिस्तान र कश्मिर क्षेत्रमा ठूलो क्षति भएको छ ।

समाचार संस्था रोयटर्सले पाकिस्तान प्रशासित कश्मिरमा मात्रै पछिल्लो २४ घन्टामा ५५ जनाले ज्यान गुमाएको जनाएको छ । बलुचिस्तानमा २० र निलम भ्यालीमा ५९ जनाको मृत्यु भएको छ । थुप्रै मानिसहरु हराइरहेको र मृतकहरुको संख्या बढ्ने अनुमान गरिएको समाचारमा जनाइएको छ ।

पाकिस्तानका विपद् व्यवस्थापन अधिकारी मोहम्मद युनुसले 'डन'लाई भनेअनुसार मृत्यु हुनेमा धेरैजसो महिला र बालबालिका छन् ।

पाकिस्तानको छिमेकी अफगानिस्तानमा पनि खराब हिमपहिरोमा परी ३९ जनाले ज्यान गुमाएको अलजजिराले उल्लेख गरेको छ । भारत प्रशासित कश्मिरमा पनि १० जनाको मृत्यु भएको छ ।

प्रकाशित : पुस २९, २०७६ १८:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×