१८ डिसेम्बर

कामदारका न्यूनतम अधिकारहरू प्रत्याभूति गर्न दुवै देशका सरकार (स्रोत र गन्तव्य) हरू असफल छन् । खाडी तथा मलेसियामा कार्यरत झन्डै १५ लाख नेपाली कामदार म्यानपावर र कम्पनीबीच मिलोमतोको कारण आफ्ना न्यूनतम अधिकार पाउनसमेत वञ्चित हुँदै आएका छन् । अझ तल्लो तहमा कार्यरत कामदारको अवस्था झनै दयनीय छ । करारपत्रमा उल्लेख सर्त–सेवा नपाउनु, बसाइ तथा खाना गुणस्तरहीन हुनु, कम्पनीबाट शोषित पीडित हुँदा पनि न्यायमा पहुँच पुग्न नसक्नुजस्ता मुद्दाहरू साझा हुन् । कतारमा खिचिएका यी तस्बिरहरूले यही पुष्टि गर्छन् । विश्वकप आयोजक राष्ट्र हुनुको नाताले कतारलाई आप्रवासी कामदारको पक्षमा सुधार गर्न अन्तर्राष्ट्रिय दबाब त दिइयो । उसले एक हदसम्म सुधारको लागि पाइला पनि चाल्यो । त्योभन्दा अझ दयनीय अवस्था रहेको साउदी अरबजस्ता मुलुकमा कामदारले भोगेका जटिल सवालहरूमा कसले बोलिदिने ? विदेशमा कार्यरत नेपालीको हितका लागि नेपालले चालेका कदमहरू झन् धेरै कमजोर र दयनीय छ । यसैलाई सुधार्न घच्घच्याउने दिन हो डिसेम्बर १८ अर्थात् अन्तराष्ट्रिय आप्रावासी कामदार दिवस ।