कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १४४
पाठक पत्र

उपकुलपतिको अन्तर्वार्ताले दिएको सन्देश

पाठक पत्र

१. आफैं उपकुलपति भएर आफ्नै विश्वविद्यालयको बारेमा यति तिखो तर सत्य टिप्पणी गर्ने हिम्मत भएका नेपालका विश्वविद्यालयका अरू कुनै उपकुलपति सायदै होलान् । यसका लागि उनलाई साधुवाद छ ।

उपकुलपतिको अन्तर्वार्ताले दिएको सन्देश

२. त्रिवि यति गए–गुज्रेको अवस्थामा पुगिसकेको छ कि त्यहाँ उपकुलपति भनेका केवल राजनीतिक गोटी मात्रै हुन् र उनको योजनाले विश्वविद्यालय अगाडि बढ्न दिइँदैन । धर्मकान्तकै भाषामा उनका १५ बुँदे सुधारका योजना ३ वर्ष बितिसक्दा पनि कार्यान्वयनमा आउनै सकेनन् ।

३. त्रिविमा अपराधी प्राध्यापकको बिगबिगी छ जसले ई–हाजिरीको मेसिन नै उठाएर लैजान्छन् । यसको अर्थ हुन्छ त्रिविका केही शिक्षक, प्राध्यापकका नाममा कलंक हुन् । यस्ता कलंक नहटाएसम्म त्रिविमा सुधार गर्न सकिन्न ।

→ अन्तर्वार्ता : ‘विश्वविद्यालय र उपकुलपतिको चीत्कारको सुनुवाइ भएको छैन’ [भिडियो]

४. त्रिविमा आपराधिक प्रवृत्तिका विद्यार्थीको पनि उपस्थिति छ । आफ्नो व्यक्तिगत वा संघ–संगठनका स्वार्थ पूरा नहुँदा क्याम्पस प्रमुख कुट्ने, शिक्षक कुट्ने, धम्कीको भाषा प्रयोग गर्ने, तालाबन्दी गर्ने, कालोमोसो दल्नेजस्ता घृणित काम तिनीहरूबाट हुँदै आएको छ । यस्ता कुलंगार समूह नहटाएसम्म त्रिवि सुधार हुँदैन ।

५. प्राध्यापक संघ त्रिविको जग्गा भाडामा लगाएर कमाउने धन्दामा लिप्त छ । त्रिविको ४ रोपनी जग्गा बसपार्कलाई भाडामा दिने नियत राख्नुले गैरशैक्षिक क्रियाकलापमा प्राध्यापक संघको संलग्नता रहेको पुष्टि गर्छ र त्यो संस्था पनि कमाउ धन्दामा नै व्यस्त छ भन्ने सन्देश प्रवाह गर्छ ।

६. त्रिविका अधिकांश शिक्षक र कर्मचारी अनुशासनहीन छन् । उनीहरू समय सीमाभित्र काम गर्दैनन् र कतिपय हाजिर ठोकेर अन्तै काम गर्न जान्छन् । यसको अर्थ त्रिविभित्र अनुशासन छैन भन्ने बुझिन्छ । यस्ता तत्त्वको बहिर्गमनविना त्रिविमा सुधार सम्भव छैन भन्ने अन्तर्वार्ताको प्रस्ट सन्देश छ ।

७. गएका तीन वर्षमा ३४२ दिन तालाबन्दी गरेर प्राध्यापक र विद्यार्थीको मुकुन्डो लगाएकाहरूले त्रिविको मात्रै हैन नेपालकै उच्च शिक्षाको अन्तर्राष्ट्रिय बेइज्जती गरेका छन् । आफ्नै मातृ संस्थाको अपमान गर्नेहरूले त्रिवि सुधारको सपना च्यात्ने नै भए । यस्ता आपराधिक हर्कत हटाउन नसकेसम्म त्रिवि सुधार गर्न सकिन्न ।

८. कुलपति र सहकुलपति हुने प्रधानमन्त्री र शिक्षामन्त्रीलाई विश्वविद्यालयको समस्या नै थाहा छैन । यसले के सन्देश दिन्छ भने उहाँहरूले आफ्ना कार्यकर्ता व्यवस्थापन गर्ने थलोका रूपमा दबाब दिन मात्रै उक्त पद ओगट्नुभएको हो । अपराधीलाई दण्ड दिनेभन्दा परेको मुद्दासमेत फिर्ता लिन गृह मन्त्रालय र महान्यायाधिवक्तासमेत प्रयोग गर्ने कुलपति र सहकुलपति भएसम्म त्रिविमा सुधार सम्भव छैन ।

९. यति हुँदाहुँदै उपकुलपतिले गर्न सक्ने काम पनि नगरेको हो कि भन्ने पनि अन्तर्वार्ता पढेपछि महसुस हुन्छ । क्षेत्रीय कार्यालयलाई बलियो बनाएर त्रिविको प्रशासनिक भार कम गर्न सकिन्थ्यो, अहिलेको उक्त व्यवस्थामा थप नवीनता ल्याउन कार्यकारी परिषद् नै काफी छैन र ? फेरि विभिन्न खाले संकाय भएकाले क्यालेन्डर बनाउन सकिएन भन्नु नालायकी हैन र ? संकाय अनुसार नै क्यालेन्डर बनाएर हुबहु लागू गराउन कसैले रोकेको छ र ?

१०.‘मैले त भनेको हुँ तर कामै गर्न दिएनन्’ मात्रै भनेर पन्छन मिल्छ र ? यो यो काम यसरी अगाडि बढाएको छु, यहाँसम्म पुगेको छ, चुनौतीका बावजुद तीन वर्षमा यति गर्न सकें भन्ने कि आफ्नो चीत्कार मात्रै सुनाउने ?
– मनप्रसाद वाग्ले, मीनभवन, काठमाडौं

प्रकाशित : चैत्र ६, २०७९ ११:०३
प्रतिक्रिया
पठाउनुहोस्
जनताको राय

मन्त्रीहरुले आफ्ना र दलका शीर्ष नेताका निर्वाचन क्षेत्र केन्द्रित गरी विनियोजित बजेटमा सांसदहरूले संसद्मा गरेको विरोधबारे तपाईंको धारणा के छ ?

x