ढिलो भए पनि न्याय पाउने आश
१२ वर्षपछि बम विष्फोटका आरोपित मोहमद आफताब आलम पक्राउसम्बन्धी समाचार कान्तिपुर दैनिकमा पढ्न पाउदा अझै मेरो देशमा थोरै भएपनि न्याय मरेको छैन भन्ने आश पलाएको छ । विभिन्न अपराध गरेर देशको ठूला पदमा पुग्ने व्यक्तिहरूबाट हामीले उनीहरूबाट के अपेक्षा गर्ने ? मनमा थुप्रै पश्नहरू उब्जाएको छ ।
यस्ता अपराध गरेर देशको र जनताको सेवा गर्छु भन्नू आफैंमा लज्जास्पद विषय पनि हो । राजनीतिक संरक्षणमा ठूला पदहरू लिनुदिनु नै गलत हो, किनकि जब कुनै व्यक्तिमाथि अपराधको आरोप लगाइन्छ तत्काल छानबिन गरी वास्तविकता के हो स्पष्ट पार्न सक्नुपर्छ ।
देश बनाउने अठोटका साथ जनताको मत लिएर अपराध गरी जनताले तिरेको करमा रमाउने छुट कसैलाई पनि दिनु हुँदैन । न्याय, कानुन सबैलाई बराबर हुनुपर्छ । एउटा सामान्य नागरिकले सानो गल्ती गर्दा मुद्दा चलाउने र ठूला पद लिएका व्यक्तिहरूले गल्ती गर्दा कुनै कार्बाही नहुँदा आम नागरिकहरूमा शंका उत्पन्न भएको छ । सानालाई ऐन, ठूलाबडालाई चैन भएको हो कि भन्ने समेत भएको छ । जहाँसम्म लाग्छ अपराध गरेका व्यक्तिहरूलाई राजनीतिक दलहरूले उम्मेदवार बनाउन पनि रोक्नुपर्छ ।
यदि राजनीतिक दलहरूले शक्तिको आडमा उम्मेदवार बनाएको खण्डमा सबै शिक्षित व्यक्तिहरू लागेर उनीहरूलाई पराजित गर्नुपर्ने देखिन्छ । सम्मानित पदमा बसेर कसैको बलात्कार गर्ने, कसैलाई रातो पासपोर्ट बेच्ने, कसैको हत्या गर्ने जस्ता कार्यले आम समुदायमा गलत सन्देश गएको छ ।
– चन्द्रप्रसाद खनाल, लम्की, कैलाली