नबोलेकै जाती
भदौ ९ गते प्रकाशित टीका ढकालको ‘कश्मीरदेखि हङकङसम्म’ पढेंँ । आज अन्तर्राष्ट्रिय स्तरमा यी दुवै मुद्दा छाएका छन् ।
नागरिक स्तरमा नेपालमा पनि आफ्नो आस्था अनुसारको टिप्पणी छापामा आइनै रहेको छ । तर दुवै मामिलामा सरकारले चुप बस्नु नै फाइदाजनक छ । दुई ढुंगाको तरुलले तटस्थतालाई नै इंगित गर्छ । अतः भेनेजुएला प्रकरणमा फ्याट्ट बोलिदिँदा अप्ठेरो परेजस्तै कश्मीर र हङकङबारे बोलिदिँदा पनि हामीले छिमेकी गुमाउने अवस्था आउन सक्छ । भारत र चीन दुवैको जरुरत हामीलाई उत्तिकै छ । कूटनीतिमा सजगता आवश्यक हुन्छ । कूटनीति लेखक वा कुनै पाठकको विचारजस्तो हुँदैन । सार्कको अध्यक्षको नाताले पनि नेपालले केही बोल्न मिल्दैन, जसको लबिङ पाकिस्तानका विदेशमन्त्रीले गर्न चाहेका छन् । कारगिल युद्धमा पनि नेपालले केही बोलेको थिएन । हङकङबारे नबोलेको पनि ठिकै हो । नेपाली दुवै ठाउँमा भएकाले तिनको सुरक्षाको सवाल भने अवश्य उठाउन सकिन्छ ।
– डा.शिवशंकर यादव, छपकैया, वीरगन्ज