तीज परम्परा कि विकृति ?

पछिल्लो समय पौराणिक मान्यताभन्दा पनि आपसी साथ र सहयोगको विम्बको रूपमा विकसित भएको तीजलाई किन, कसले आलोचित बनाइरहेका छन् ?

तीजमा महिला दिदीबहिनीहरू खुला रूपमा आफ्ना समस्या गीत र नृत्यका रूपमा पस्कने गर्छन् । तीजमा महिला दिदीबहिनीहरू आपसमा भेला भई नाचगान गर्दै दर खाने गर्छन् । यो सामाजिक र धार्मिक पद्धतिमा चलिआएको पर्व हो । हिजोआज निहित स्वार्थ बोकेकाहरू तीजलाई निरन्तरता दिनुपर्छ पनि भन्छन्, यसलाई भड्किलो रूपमा मनाउन पनि प्रेरित गर्छन् । पछि आफै त्यसको आलोचना गर्न थाल्छन् । आज हरेक टोल–टोलमा समूह–समूहमा दिदीबहिनीहरू एउटै पहिरनमा सजिएर तीज मनाइरहेका हुन्छन् । जनप्रतिनिधिहरूले समेत यो कार्यलाई प्रेरित गरिरहेका छन् ।

समाजमा तीजलाई परम्पराको संरक्षणभन्दा पनि विकृति बढ्यो भनी कटाक्ष गर्नेहरू पनि छन् । तीजलाई सहरी दृष्टिकोणले मात्र नहेरौं । आज पनि देशका दूरदराजमा तीजलाई प्रतीक्षा गरेर बस्ने दिदीबहिनी र तीजकै दर खाने भनेर दिदीबहिनीहरूलाई माइती बोलाउने दाजुभाइको ठूलो समूह छ । तीज एउटा परम्परा पनि हो र महिला दिदीबहिनीहरूको विरह पोख्ने थलो पनि ।
– रामकृष्ण बराल, जोरपाटी–२, काठमाडौं