स्मार्ट सिटी केका लागि ?

कान्तिपुर संवाददाता

काठमाडौं उपत्यकामा निर्माण हुने चार वटा स्मार्ट सिटीको समाचारले यो भूगोलको भविष्यबारे सबैलाई चिन्तित तुल्याएको छ  । काठमाडौं उपत्यकामा अहिले नै साइकलसम्म राख्ने ठाउँ छैन  ।

अब किन जनसंख्या थप्नुपर्‍यो ? लगभग आधा करोड जनसंख्यालाई काठमाडौंभित्रै रोजगारी उपलब्ध हुन सक्छ ? आखिर त्यो विशाल जनसागर मनोरञ्जन, शिक्षा, स्वास्थ्यसेवाका लागि काठमाडौं मध्यभागको भीडमै अलमलिने हो । जबकि काठमाडौं उपत्यकाभित्र बसाइँसराइ रोक्नु र कृषि जमिन बचाउनु मुख्य प्राथमिकता हुनुपर्ने हो । काठमाडौंको विद्यमान वातावरणीय तथा सांस्कृतिक सन्तुलन नबिगारीकन वैकल्पिक सहर बनाउन नहुने होइन तर त्यो सहर उपत्यकाबाट कम्तीमा पैंतालिस–चालिस किमि पर हुनैपर्छ । त्यो सहर काठमाडौंमा निर्भर होइन, आत्मनिर्भर हुनैपर्छ । त्यो सहरभित्र उद्योग व्यवसायको अवसरदेखि अत्यावश्यक सरकारी सेवाको सम्पूर्ण सुविधा उपलब्ध हुनुपर्छ । सन्तुलित विकासको मोडल यही हो । सरकारले दूरगामी सोच राखेर सहर निर्माण गर्नुपर्छ तर प्रस्तावित सहर काठमाडौंको व्यस्त रिङरोडबाट खालि दस बाह्र किमि पर बन्न लागेकाले समस्या झनै जटिल हुने निश्चित छ । उपत्यकाबाहिर किन बनाउन नहुने ? भिड, सवारी जाम, अव्यवस्था र प्रदूषणले सिकिस्त काठमाडौंलाई झनै क्षतविक्षत पार्ने गरी मान्छे थुपार्न हुन्न । सम्बन्धित सबैको समयमै ध्यान जाओस् ।
– जय वैद्य, ललितपुर

प्रकाशित : भाद्र १, २०७६ १०:४९
प्रतिक्रिया
पठाउनुहोस्

बाढीले मुहान बगाएपछि गगगढीमा विद्युत अवरुद्ध, तीन एफएमको प्रशारण बन्द 

राजबहादुर शाही

मुगु — भीषण बाढीले गमगाढ साना जलविद्युत आयोजनाको मुहान बगाएपछि जिल्ला सदरमुकाम गमगढी अन्धकारमय भएको छ । शनिबार मध्यान्ह भीषण वर्षातसँगै गमगाढ खोलामा ठूलो बाढी आएर बिद्युतको मुहान र हिलट्याङ्क बगाएको थियो ।

गमगढीमा विद्युत आपूर्ति बन्द भएको नेपाल विद्युत प्राधिकरण गमगाढ आयोजनाका निमित्त प्रमुख पुष्कर सुनारले जनाए । उनको अनुसार मर्मत गरेर विद्युत आपूर्ति सहज गर्न केही समय लाग्ने छ । शनिबार देखि विद्युत सेवा अवरुद्ध भएपछि करिव २ हजार ५ सय परिवार अन्धकारमा बस्नुपरेको छ ।
विशेष गरेर सरकारी तथा बैंकिङ सेवाहरु विद्युत आपूर्ति नहुँदा सञ्चालन गर्न कठिन भएको छ । तीनवटा एफएमको प्रशारण सेवा बन्द भएको छ ।

प्रकाशित : भाद्र १, २०७६ १०:४९
पूरा पढ्नुहोस्
प्रतिक्रिया
पठाउनुहोस्