२९.१२°C काठमाडौं
सीपको सम्मान
‘सीपको सम्मान’ लेखले प्राविधिक शिक्षाको अवस्था घतलाग्दो गरी प्रस्तुत गरेको छ । वास्तवमा सीपको मूल्यांकन अंकमा होइन, तहगत वा ग्रेडमा हुनुपर्छ ।
हामीकहाँ जे काममा पनि खालि डिग्री हेर्ने चलनले काम बिगारिरहेको छ ।
हातमा कुनै सीप हुन्न, प्रमाणपत्रले के काम गरोस् ? मेरो विचारमा सीपको सम्मान नहुनुको एउटा कारण यो पनि हो । नत्र त कृषि, निर्माण, विद्युत्, मेकानिक्सजस्ता विषयमा स्तरीय सीप बोकेका व्यक्तिले समाजबाट सम्मान पाइरहेकै छन् । अर्कातिर सबै प्राविधिक शिक्षालय आफैंमा स्तरीय पनि छैनन् । पूर्वाधार नहेरी, राजनीतिक दबाबमा खुलेका प्राविधिक शिक्षालयका कारण यो क्षेत्रमा बढी बेथिति फैलिएको हो ।
गुणस्तरहीन जनशक्तिले सम्मान पनि कसरी पाओस् ? त्यस्ता शिक्षालयको स्थापनादेखि उत्पादनसम्म गुणस्तर ख्याल गर्नुपर्छ । प्रवेश परीक्षा, अनुगमन, सुपरीवेक्षण, परीक्षा प्रणालीमा समेत सरकारी र गैरसरकारीको भावना नराखी उत्पादित जनशक्तिले समान अवसर पाउने वातावरण बनाउनुपर्छ । निजी र सरकारी संस्थामा प्रयोग गरिने रसायन, भौतिकी र जनशक्तिको मापदण्ड कदापि फरक पर्नु हुँदैन । १० देखि ४ बजेसम्म खुट्टा हलाउने कार्यलाई रोजगारी बुझ्ने संस्कारको अन्त हुन सके सीपको सम्मान स्वतः हुँदै जान्छ ।
– भगवान झा, केन्द्रीय उपाध्यक्ष, निजी प्राविधिक शिक्षालय महासंघ नेपाल
