१९.१२°C काठमाडौं
राष्ट्रको धर्म
बालकृष्ण माबुहाङको लेख ‘हिन्दु अधिराज्य हिन्दुस्तानकै मामिला’ ले सोचमग्न बनायो । धर्मसँग हरेक जाति वा समुदायको अनोन्याश्रित सम्बन्ध रहन्छ नै ।
धर्म व्यक्तिको मात्र हुन्छ, राष्ट्रको हुन्न भन्ने तर्क गर्नेहरूले चाणक्य नीतिशास्त्र पढेका छैनन् ।
माबुहाङजीले भनेझैं अंग्रेजकै शिक्षाबाट दीक्षित भएका गान्धी र नेहरूले आफ्नो मुलुकलाई धर्मनिरपेक्ष बनाए । राजा महेन्द्रले नेपाललाई हिन्दु राष्ट्र बनाएपछि भारतीय हिन्दुहरूले नेपालप्रति गर्व गर्न थाले । यहुदीहरूले जेरुसेलम, मुस्लिमहरूले मक्का र इसाईहरूले भ्याटिकनप्रति जस्तो आस्था राख्छन्, सारा हिन्दुका लागि नेपालको पनि त्यस्तै महत्त्व छ । भारतका मुख्य चार धामको मुख्य शिर हाम्रो पशुपतिनाथ भएकाले विश्वभरिका हिन्दु वा ओमकार परिवारका लागि यो गौरवको थलो हो । भारतमा मोदी वा आरएसएसको जुनसुकै मापदण्ड भए पनि हामी नेपालीले आफ्नो राष्ट्रको भाग्यरेखा आफैंले कोर्न सक्नुपर्छ ।
– डिल्लीराम खनाल, दमक, झापा
