रोजगारमुखी बजेट

कान्तिपुर संवाददाता

‘बजेटमा दबाब’ समाचारले सबै पाठकको ध्यान खिचेको हुनुपर्छ  । योग्यता र विद्वत्ताले चुलिएका भए पनि भूगोल र समुदायसँग नभिजेका वर्तमान अर्थमन्त्रीले गत वर्षको ल्याएको बजेट राम्रो भए पनि जनअनुमोदित हुन सकेन  ।

तसर्थ सरकारलाई वर्षभरि नै धारेहात लगाउनेहरूको संख्या धेरै भयो । वस्तुतः बजेट जनमुखी, विकासमुखी र रोजगारमुखी हुनुपर्ने हो, तर हुन सकेन । यस पटक विदेशी सहायतालाई जोड दिने खालको बनाइने भनिएबाटै यो बजेट आकारमा ठूलो हुने लक्षण देखिसकिएको छ । राजस्व मनग्ये नउठ्ने भएकाले विश्व बैंकलाई ब्यापक परिचालन गरी बजेट तजुर्मा गरिएकाले यो वर्ष पनि बजेटले गति नलिन सक्छ । आफ्नो गाउँ आफैँ बनाऔँ, वृद्ध/एकल/बेरोजगार भत्तालाई प्रभावकारी तवरले प्रचारमा ल्याउन अघिल्लो बजेट चुक्यो । अटोमोबाइल आयातमा व्यापकता दिएका कारण खर्बौं रूपैयाँ अनुत्पादक क्षेत्रमा फँस्यो । लाखौँ बाइक र हजारौँ कारहरूले मुलुकलाई ढपक्कै ढाकिदिए र आम दैनिकी अस्तव्यस्त हुनपुग्यो । जग्गा कारोबार स्वच्छ, स्वस्थ र चलायमान बन्न सकेन । भन्सार करको दायरा तन्काउने वा खुम्च्याउने गरे आय बढ्छ भन्ने सोचमा राज्य एकतर्फी रूपमा लाग्यो । निर्यातमूलक उद्योग स्थापना गर्नेतिर बजेटले सम्बोधन गर्न नसक्नु दुर्भाग्यपूर्ण छ ।
– श्यामसुन्दर कुइँकेल, हाँडीगाउँ, काठमाडौँ

प्रकाशित : जेष्ठ ६, २०७६ १२:००
प्रतिक्रिया
पठाउनुहोस्

गाडीमा पहिले नियत सुध्रिनुपर्‍यो

कान्तिपुर संवाददाता

खनिज इन्धनबाट चल्ने सवारी साधनले वातावरण बिगारेका सम्बन्धमा निकै राम्रो लेख पढ्न पाइयो  । फोसल फ्युल अन्य देशले पनि प्रयोग गर्छन्, ती देशमा पनि सवारी साधन अत्यधिक छन्, तैपनि हाम्रोजस्तो गएगुज्रेको अवस्था ती देशमा किन छैन ? किनभने त्यहाँका गाडी हाम्रामा जस्तै थोत्रा र पुराना छैनन्  ।

हाम्रामा सवारी साधनको मर्मत–सम्भार नियमित अन्तरालमा नहुनु, सवारी साधन गुड्दा–गुड्दै ठप्प नरोकिएसम्म चलाइरहनु जस्ता कारणले प्रदूषण अनियन्त्रित भएको हो । त्यस्ता सवारी साधनलाई घुस खाएर प्रमाणित गर्ने सम्बन्धित कर्मचारीहरू प्रदूषणभन्दा हानिकारक बनिरहेका छन् ।


अर्को कुरा, विद्युतीय सवारी साधनले पनि वातावरण बिगार्दै नबिगार्ने भन्ने हुन्न । लिथोनियम ब्याट्रीभित्र रहेको लिड व्यवस्थापनमा हेलचेक्र्याइँ गर्‍यो भने त्यसबाट पनि वातावरणमा प्रतिकूल असर पर्छ । मुख्य कुरा नियमन गर्ने निकाय बेकामे बन्नु भएन । अहिले चलिरहेका खनिज इन्धनवाला सवारी साधनहरूको सर्भिसिङमा कडाइ गरियो भने वातावरण यति साह्रो बिग्रिँदैन ।
– केदारनाथ त्रिपाठी, बूढानीलकण्ठ, काठमाडौं

प्रकाशित : जेष्ठ ६, २०७६ १२:००
पूरा पढ्नुहोस्
प्रतिक्रिया
पठाउनुहोस्