सरकारको समीक्षा

कान्तिपुर संवाददाता

काठमाडौँ — केपी शर्मा ओलीले सरकार चलाएको १ वर्ष पुरा भएको छ । सरकारबाट जनताले निकै अपेक्षा गरेका थिए । जनताले प्रत्यक्ष महसुस गर्ने काम निकै कम भए । अर्थतन्त्रका धेरैजसो सूचकांक नकारात्मक देखिए । केही क्षेत्रमा भने काम भएका पनि छन् । 

राम्रा काम
१. प्रधानमन्त्री रोजगार कार्यक्रम अन्तर्गत बेरोजगारहरूको रोस्टर तयार गरीरोजगारी दिने तयारी । कम्तीमा सयदिनको रोजगारीको ग्यारेन्टी ।
२. विदेशमा सीप सिकेर आएका युवालाई स्वदेशमै उद्यमी बनाउने उद्देश्यका साथ सहुलियत कर्जा दिने योजना ।
३. श्रमिकहरूलाई राहत दिन मजदुर सामाजिक सुरक्षा कोषको थालनी ।
४. वैदेशिक रोजगारी अनुमतिपत्र ७ प्रदेशबाटैहुने व्यवस्था ।
५. भैरहवा, पोखरामा एयरपोर्ट निर्माणमा तीव्रता । फास्ट ट्रयाक निर्माणमा तीव्रता र रेलवेको डीपीआर बनाउने भूमिका ।
६. भारतले हटाउन नमानेको विराटनगरको भारतीय फिल्ड अफिस हटाउनु । निलाम्बर आचार्य, उदयराज पाण्डेजस्ता सक्षम र इमानदार व्यक्तिहरूलाई राजदूत बनाउनु ।
७. अख्तियारलाई सक्रिय बनाउन भूमिका खेल्नु, खराब न्यायाधीशहरूलाई कारबाही गर्न न्यायपरिषदलाई झकझकाउनु ।
नराम्रा काम
१. विदेशी लगानीकर्तालाई विश्वासमालिन नसक्दा वैदेशिक लगानी १० अर्बले घट्नु । महँगी बढ्नु । भारतसँंगको व्यापारघाटा चुलिनु ।
२. पुँजी बजारलाई नकारात्मक रूपमा हेर्दा र पुँजीगत लाभकर हचुवाको भरमा वृद्धि गरिँदा १६ लाख जनताको ७ खर्ब पुँजी गुम्नु ।
३. बैंकहरूको ब्याजदर वृद्धि हुँदा औद्योगिक वातावरण बिग्रनु ।
४. आत्मनिर्भरताका योजना कागजमै सीमित हुनु । चीनबाट रेल र तेल ल्याउने अनि नेपाललाई ६ महिनासम्म पुग्ने इन्धन भण्डार क्षमता बढाउने कुरा अगाडि नबढ्नु ।
५. मेलम्ची र अपर तामाकोशीलाई समयमै पूर्णता दिन असमर्थ हुनु ।
६. झापा, चितवनमा धेरै योजना थुपार्नु ।
७. राजधानीको धुलो, धुवाँ र खाल्टाखुल्टी जस्ताको तस्तै हुनु ।
८. वाइड बडी विमानमा भएको अनियमितता, अख्तियार आयुक्त राजनारायण पाठकले गरेको भ्रष्टाचार, न्यायाधीशहरू गोपाल पराजुली, दीपकराज जोशीहरूले गरेका विवादास्पद फैसला छानबिन र कारबाही गर्ने भूमिकाखेल्न नसक्नु ।
– गोपाल देवकोटा, गोकर्णेश्वर, काठमाडांै
प्रकाशित : फाल्गुन ६, २०७५ ०८:५५
प्रतिक्रिया
पठाउनुहोस्
ADVERTISEMENT

सबै सेवा एकै ठाउँ

कान्तिपुर संवाददाता

भक्तपुर — सूर्यविनायक नगरपालिकाले विषयगत कार्यालयहरूको सहकार्यमा एकीकृत घुम्ती शिविर आयोजना गरेको छ । सूर्यविनायक–७ गुन्डुमा आयोजित शिविरमा नगरपालिका कार्यालयबाट प्रदान गरिने सामाजिक सुरक्षा भत्ता वितरण, घर नक्सापास, भवन अभिलेखीकरण, व्यवसाय दर्ता, कृषि बीउबिजन वितरण तथा प्राविधिक सल्लाह, गोबर परीक्षण र नाम्ले रोगको औषधि वितरण, ज्येष्ठ नागरिक/अपांग परिचयपत्र वितरण गरिएको छ । 

शिविरमा जिल्ला प्रशासन कार्यालयले नागरिकता, राहदानी, नाबालक परिचयपत्र तथा आदिवासी जनजाति सिफारिसको सेवा प्रदान गरेको छ । डिभिजन वन कार्यालयले बिरुवा वितरण तथा जनचेतनामूलक कार्यक्रम, डिभिजन खानेपानी कार्यालयले खानेपानीको गुणस्तर परीक्षण, निर्वाचन कार्यालयले फोटोसहितको मतदाता नामावली संकलन, घरेलु तथा साना उद्योगले उद्योग दर्ता, राष्ट्रिय पुनर्निर्माण प्राधिकरण अनुदान व्यवस्थापन तथा स्थानीय पूर्वाधारले भूकम्पपीडितको गुनासो व्यवस्थापन कार्य गरेको छ ।

त्यस्तै, भूमिसुधार तथा मालपोत, नापी, सडक र सिंचाइ कार्यालयले सेवाग्राहीलाई परामर्श सेवा, नेपाल टेलिकमले सिमकार्ड वितरणलगायतका कार्य एकै स्थानबाट प्रदान गरेको सूर्यविनायक नगरपालिका ८ का अध्यक्ष रवीन्द्र सापकोटाले बताए ।

कार्यक्रममा नेपाली सेना वीरदल गणले बृहत् स्वास्थ्य शिविर आयोजना गरेको थियो । शिविरमा जनरल फिजिसियन, स्त्रीरोग, नाक, कान, घाँटी, बालरोग, हाडजोर्नी, छाला रोगलगायतको विशेषज्ञ तथा सर्जनद्वारा स्वास्थ्य परीक्षण र नि:शुल्क औषधि वितरण गरेको वीरदल गणका गणपति शिवप्रसाद पौडेलले बताए । शिविरमा प्रहरी वृत्त जगातीले प्रहरी साझेदारी, जनचेतनामूलक परामर्श सेवा दिएको थियो ।

शिविरमा ४ हजार २ सय ४७ सेवाग्राहीले सेवा पाएको नगरपालिकाले जनाएको छ । जसमध्ये ५० जनालाई नागरिकता वितरण, ३ सय ६५ ज्येष्ठ नागरिकलाई वृद्धभत्ता, ८ सय १७ को स्वास्थ्य परीक्षण तथा औषधि वितरण, ५ सय १७ लाई पशु स्वास्थ्यसम्बन्धी सेवा, ९ सय २५ लाई कृषिसम्बन्धी सेवा, ३ सय ५० लाई सिमकार्ड वितरण, २८ जनाको भूकम्पपीडित गुनासो व्यवस्थापन, १६ जनालाई मालपोत सेवा, १४ को घरेलु उद्योग दर्ता, ८ को व्यवसाय दर्ता, १९ को नक्सापास, १ सय ६० लाई आयुर्वेद सेवा, ५ सय ५० लाई बिरुवा वितरण तथा परामर्श र ४२ लाई जैविक मल वितरणलगायत सेवा प्रदान गरेको गणपति पौडेलले बताए । विषयगत कार्यालयको सहकार्यमा नगरपालिकाले प्रत्येक वडामा एकीकृत घुम्ती शिविर सुरु गरेको सूर्यविनायक नगरप्रमुख वासुदेव थापाले बताए ।

प्रकाशित : फाल्गुन ६, २०७५ ०८:५४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×