घाँटी हेरी हाड निलौं

हो, नेतृत्वले आर्थिक समृद्धितिर ध्यान दिई अहिलेसम्म मुलुक विकसित भएको भए, कार त के हेलिकप्टरमै अवागमन गरे पनि सायद कसैको आपत्ति हुने थिएन । तर मुलुक अझै अविकसितको सूचीमा छ । हामी साधन र सुविधा पूर्ण विकसित देशकै जस्तो खोज्छौँ । यो कसरी सम्भव छ ? हामी आफ्ना निजी सवारी साधन भए त्यसलाई कैयौँपटक मर्मत गर्दै चलाउँछौँ र चलाउनु पनि पर्छ । तर राज्यको सम्पत्तिमाथि चाहिँ मतलबै नराख्ने, अनदेखी गर्ने नेतागण र कर्मचारीहरूको व्यवहारलाई कसरी जवाफदेही मान्ने ? राज्यको सम्पत्ति पनि त आफ्नै जत्तिकै माया गरेर त्यसको उपयोग गर्दा देश उँभो लाग्थ्यो । देशचाहिँ डुब्ने अनि आफूमात्रै सान र मानले बाँच्ने कसरी हुन सक्ला ? कमिसनकै प्रलोभनमा यसो गरिएको भए त्यो दण्डनीय कार्य हो । त्यसमा अख्तियार र राष्ट्रिय सतर्कता केन्द्रको ध्यान जानु जरुरी छ । मर्मत गरेर चलाउनसके अर्बौं रकम जोगिन्छ । त्यो रकम विकास निर्माणमा उपयोग हुन सक्छ । पिछडिएको समाजको उत्थानमा लगाउनसके उनीहरू राष्ट्रिय मूल प्रवाहमा आउन सक्छन् । स्वास्थ्योपचारमा उपयोग गर्नसके पनि हुने थियो ।

– डा. धनपति कोइराला
कावासोती, नवलपुर