चारुमती स्काउट एडभेन्चर क्याम्पको नवौं संस्करण सुरु
काठमाडौँ — चारुमती स्काउट क्रुको आयोजनामा हुँदै आइरहेको स्काउट एडभेन्चर क्याम्पको नवौं संस्करण सुरु भएको छ । बूढानीलकण्ठस्थित बीएमसीए स्कुलको प्राङ्गणमा उद्घाटन गरिएको कार्यक्रममा सहभागी विद्यार्थीहरूलाई नजिकको सामुदायिक वन-जंगल र खोलानालामा विभिन्न खाले साहसिक क्रियाकलापमा संलग्न गराइने बताइएको छ ।
३ दिनसम्म चल्ने उक्त क्याम्पमा विविध साहसिक क्रियाकलाप हुनेछन्; जसमध्ये ओमेगा जम्प, टायर क्रसिङ, बोटिङ, क्लाइम्बिङ, क्याम्प फायर प्रमुख हुन् । एउटा विद्यालयबाट करिब २ सय बालबालिका उपस्थित रहेको यस क्याम्पमा नेपालभरका विभिन्न स्थानका विद्यालयमा सञ्चालित क्रियु र ट्रुपमा आबद्ध करिब ३ हजार स्काउटहरू सहभागी हुने चारुमती स्काउट क्रुका संस्थापक दीपक केसी बताउँछन् ।
‘बालबालिकालाई व्यावहारिक ज्ञान प्रदान गर्न र उनीहरूभित्र भएका आँटलाई बाहिर निकाल्न हामी यस्ता क्याम्प आयोजना गर्दै आइरहेका छौं‚’ उनले भने ।
प्रकाशित : मंसिर २२, २०७९ १७:०५
