काठमाडौं — पन्ध्र करोडभन्दा ठूला बजेटका ६८ आयोजनाको सातमहिने प्रगति समीक्षा बैठक अर्थ मन्त्रालयमा चल्दै थियो । पाँच मन्त्रालयका सचिव, सहसचिव र आयोजना प्रमुखहरू अर्थमन्त्री रामशरण महतलाई प्रगति विवरण सुनाउँदै थिए ।
सुरुआतमै चालू आर्थिक वर्षमा विनियोजित ५ सय १७ अर्ब रुपैयाँमध्ये हालसम्म १ सय ९७ अर्ब मात्र खर्च भएको जानकारी अर्थ मन्त्रालयले दियो । त्यसपछि भौतिक पूर्वाधार, सिँचाइ र पर्यटन सचिवले ठूला पूर्वाधार परियोजनामा भएको प्रगति र समस्याबारे प्रकाश पारे । अब पालो आयो सहरी विकास मन्त्रालयको ।
सहरी विकास सचिवले बहुचर्चित मेलम्ची खानेपानी आयोजनाबाट सुरु गरे । उनी भन्दै थिए, 'दिनको ४० मिटरका दरले सुरुङ खन्ने काम भइरहेको छ । २०७३ साल वैशाख १ गते बिहानै सूर्योदय नहुँदै काठमाडौंका धारामा पानी आउने छ ।'
बैठकमा उपस्थित सचिव, कर्मचारी, सञ्चारकर्मीसहित ६० भन्दा बढी एकसाथ गल्लल हाँसे । गम्भीर मुद्रामा सुनिरहेका मन्त्री महतले पनि हाँसो थाम्न सकेनन् । उनको हाँसोले सहभागीलाई फेरि हँसायो । 'साँच्चै पूरा हुन्छ ?' उनले ठट्यौलो पारामा सोधे ।
यस वर्ष ७ अर्ब ९४ करोड पुँजीगत बजेट पाएको मन्त्रालयका सचिव थापाले विश्वस्त पार्दै भने, 'चाँडो सके ठेकेदार कम्पनीलाई बोनस दिने व्यवस्था गरेका छौं, पानी आउनेमा हामी विश्वस्त छौं ।'
उनका अनुसार २६ किलोमिटर लामो सुरुङमध्ये बाँकी २१ किलोमिटर निर्माण गरी मेलम्ची खोलाको पानी राजधानी ल्याउने काममा इटालियाली कम्पनी सीएमसीको कार्य सन्तोषजनक छ । यसअघि चिनियाँ कम्पनी 'चाइना फिफटन रेल-वे ब्युरोले सुरुङ खन्ने काम पाएको थियो । त्यसले सन् २००९ यता साढे चार वर्षमा साढे ६ किलोमिटर मात्रै खनेपछि सरकारले ठेक्का तोडेको थियो । गत जेठमा फेरि ठेक्का आह्वान गरिँदा सीएमसीले पाएको हो । चिनियाँ कम्पनीले त्यति खनेको ६० करोड रुपैयाँ भुक्तानी लिइसकेको छ ।
सचिव थापाले मेलम्ची आयोजनामा भइरहेको ढिलाइका कारण सरकारले गर्ने काममा खस्किँदै गएको विश्वसनीयतालाई अब यही आयोजनाले सुधार्ने दाबीसमेत गरे ।
खन्न बाँकी २१ किलोमिटर सुरुङ र इन्टेकका लागि सीएमसीले ७ अर्ब ७१ करोडमा ठेक्का सम्झौता गरेको हो । मेलम्चीबाट राजधानीमा दैनिक १७ करोड लिटर खानेपानी ल्याउने सरकारको लक्ष्य छ । काकाकुल काठमाडौंको तिर्खा मेट्न ०५१ मा तत्कालीन प्रधानमन्त्री कृष्णप्रसाद भट्टराईले मेलम्ची आयोजना घोषणा गरेका हुन् ।
समीक्षा बैठकमा सहरी विकासपछि ऊर्जा मन्त्रालयको बोल्ने पालो आयो । ऊर्जा सचिव विश्वप्रकाश पण्डितले विद्युत् प्राधिकरणका कार्यकारी निर्देशक अर्जुनकुमार कार्कीलाई विद्युतबारे बोल्न अह्राए । कार्की बोल्दै गर्दा झ्याप्प बत्ती गयो । बैठक कोठा अँध्यारो भयो । माइक बन्द भएपछि उनी आवाज चर्को बनाउँदै विद्युत् क्षेत्रमा भइरहेको समस्याबारे बोले । उनको पालो सकिएपछि अर्थमन्त्रीले निर्देशन दिँदै गर्दा बत्ती आयो । यसै मौकामा अर्थ सचिव शान्तराज सुवेदीले व्यंग्य गरे, 'पहिले ऊर्जा मन्त्रीले बोल्दै गर्दा बत्ती गएको थियो, ऊर्जा सचिवले बोलिरहँदा पनि बत्ती गएको थियो, आज कार्यकारी निर्देशकको पालो परेछ ?' फेरि हाँसो दोहोरियो । 'मेरै बोल्ने पालोमा बत्ती जानु नियोजित हो,' कार्कीले फर्काए ।
