काठमाडौ — केही समय संविधानसभामा नजाने अड्डी लिएको एमाओवादीभित्र समानुपातिक सभासद चयनमा चर्को विवाद देखिएको छ । नेता बाबुराम भट्टराई र नारायणकाजी श्रेष्ठ पक्षले अध्यक्ष पुष्पकमल दाहालले 'आफ्ना' लाई प्राथमिकता दिएको भन्दै तीव्र असन्तुष्टि व्यक्त गरेका छन् ।

दाहाल पक्षले भने समानुपातिक सभासद पार्टीले तय गरेको मापदण्डबाटै चयन गरिएको दाबी गर्दै विरोध गर्नुको औचित्य नभएको जनाएको छ । नेता कृष्णबहादुर महरा निवास धोबीघाटमा सोमबार दिउँसो नेताहरू पोस्टबहादुर बोगटी, महरा, वर्षमान पुन, टोपबहादुर रायमाझी र गिरिराजमणि पोख्रेल सभासद चयन गर्न बसेका थिए । छलफलमा दाहाल पक्षले आफ्नालाई बढी प्राथमिकता दिएको भन्दै भट्टराई निकट रायमाझी र श्रेष्ठ निकट पोख्रेलले बैठक छाडेर हिँडेका थिए । उनीहरूले केन्द्रीय समितिले पारित गरेको मापदण्डविपरीत सभासद छानेको भन्दै बैठक बहिष्कार गरेको जनाएका छन् ।
'केन्द्रीय समितिले तयार पारेको मापदण्डअनुसारै सूची तयार गरिएको हो,' तर प्रवक्ता अग्नि सापकोटाले कान्तिपुरसँग भने, 'अध्यक्षले एकलौटी गर्न खोजेको भन्नु गलत हो ।' दाहाल निकट नेताले भट्टराई र श्रेष्ठले अध्यक्षलाई धम्क्याएर आफ्ना मान्छे बढी समानुपातिक सूचीमा हाल्न खोजेको बताए ।
उता भट्टराई निकट नेताले भने दाहालले आफ्ना मान्छे बढी हाल्न खोजेको भन्दै आफूले विरोध गरेको जनाए । 'अध्यक्षको पुरानो बानी कहिल्यै गएन, यस पटक पनि त्यस्तै भयो,' ती नेताले भने, 'पार्टीमा योगदान गरेकाभन्दा टिके प्रथा बढेकाले विरोध गरिएको हो ।'
दाहाल पक्षले भने मापदण्डभित्र रहेर सभासद चयन गरिएको दाबी गर्दै भट्टराई र श्रेष्ठले आफू निकटका व्यक्ति नपरेको भन्दै बैठक बहिष्कार गरेको जनाएको छ ।
दाहाल निवास लाजिम्पाटमा सोमबार अपराह्न समानुपातिक सूचीलाई दाहाल, भट्टराई, श्रेष्ठ र बोगटीले अन्तिम रूप दिने तयारी थियो । समानुपातिक चयनमा असन्तुष्टि जनाउँदै भट्टराई र श्रेष्ठ बैठकमा गएनन् । लाजिम्पाटबाट दाहालको स्वकीय सचिवालयले बारम्बार टेलिफोन गर्दा दुवै नेता सम्पर्कमा आएनन् । त्यसपछि बोगटी र पुन निर्वाचन आयोग पुगेर सभासदको सूची बुझाएका थिए ।समानुपातिकमा ५४ सिट पाएको एमाओवादीले २७ पुरुष र २७ महिलाको सूची बुझाएको छ ।

अधिकांश अनुहार नयाँ
एमाओवादीको समानुपातिक सूचीमा अधिकांश नयाँ अनुहार परेका छन् । सूचीमा पूर्वपोलिटब्युरो सदस्य सुरेन्द्रकुमार कार्की (राम कार्की), केन्द्रीय सदस्य एवं पूर्वलडाकु कमान्डर सन्तकुमार दरै, केन्द्रीय सदस्यहरू भक्तिप्रसाद पाण्डे, रेखा शर्मा, श्रीप्रसाद जगेबु, डोरप्रसाद उपाध्याय, दलजित विक श्रीपाली छन् ।
बन्द सूचीमा परेका नेताहरू दीनानाथ शर्मा, हेमन्तप्रकाश ओली, डिलाराम आचार्य, झक्कुप्रसाद सुवेदी, कालीबहादुर मल्ल, विश्वनाथ साह, खिमलाल देवकोटा, प्रल्हाद बुढाथोकी, अन्जना विशंखे, देवी खड्कालगायत नेताहरू सूचीमा परेनन् । पूर्वप्रहरी महानिरीक्षक रवीन्द्रप्रताप साह, एमालेबाट प्रवेश गरेका जेबी टुहुरे (जुठबहादुर टुहुरे) र रामसिंह यादव, विद्यार्थी नेतृ निशाकुमारी साह परे । लार्केल लामा, लक्की शेर्पा भने अटाएनन् । स्रोतका अनुसार ५४ समासदमध्ये भट्टराईका १९/२०, श्रेष्ठका ७/८ जना समानुपातिक सूचीमा परेका छन् ।

प्रकाशित : पुस १६, २०७० ०९:१७